名幼定附近幼稚園？非常掙扎...

dragonwarrior

本來一心諗住報屋企附近既幼稚園，覺得接送較方便，有乜頭暈身㷫都即刻接到阿仔。

但眼見其他爸爸媽媽想盡一切辦法令小朋友入讀名校，我就想問，係咪我有問題呢?如果阿仔真係讀到名校，而我唔比佢讀，咁會唔會抹殺左比佢完全發揮潛能既機會呢?我意思係，如果佢有潛質變鯨魚，但我只比佢響河度游，咁點都變唔到鯨魚了!
其實點解各位爸爸媽媽都想小朋友讀名幼，之後讀名校呢?唔通只有咁，小朋友第二時先會變名人?定係因為自己讀唔到，想小朋友幫自己實現夢想呢?（我唔係想踩人架!自己都唔係名校出身，不過眼見太多人希望自己既小朋友替自己完成無法達成既願望...）

我都希望為小朋友選擇最好的，但點先為之最好呢?

kumiso

應該係咁講，我認為能夠比到最好既野佢，我會盡力做，佢潛能有幾多？無人知，有待發掘，但我唔比機會佢第時佢埋怨我咁點好，如果我乜野都安排晒比佢，佢都唔珍惜同唔比心機讀，咁我都冇法啦，但我地碼做左家長既本份先。佢地而家咁細個冇選擇權同能力，好多時家長都唔敢輕率，而家街上面個個都係大學生，將來出來搵工要求可能仲高所以，個個都咁緊張囉

mimwing

非常認同樓上，其實细時就要俾佢習慣，你唔比佢試，佢大個一定話你唔俾機會，俾佢試下啦，同你5元買匯豐，現在先買已經唔同

dragonwarrior

Agree!

但如果要佢每日來回搭個幾兩個鐘校車，再有N咁多樣課外活動、興趣班（好似幾年前個M記廣告咁，又學小提琴，又學游水，冇得抖，企係M記門口唔肯走...），小朋友會唔會太辛苦，冇童年，冇童真呢?

kumiso

原帖由 dragonwarrior 於 13-05-21 發表
Agree!

但如果要佢每日來回搭個幾兩個鐘校車，再有N咁多樣課外活動、興趣班（好似幾年前個M記廣告咁，又學 ...

慢慢嚟，你帶住你個小朋友按住佢既能力同興趣陪養佢，佢唔鍾意就唔好迫佢，等佢試下先，一定有佢喜歡的，你同佢一齊行，解釋佢聽，個個小朋友有唔同性格，教佢唔好咁易放棄，同佢搵興趣班之餘，你都要留返啲親子時間比自己同佢傾計，都好重要架

bigheadchiu

其實每個家長想法都不一樣。冇話對定錯。亦冇話一個成功方程式。更沒有guarantee 。做家長最重要清楚小孩需要和自己期望，在能力範圍內作出適合的選擇。

TeriAnla

樓主不要給壓力自己和受別人影響。每個父母都會俾認為最好的俾自己囝囡，每個人的最好都有所不同。每人心中名幼都不同。

經常見爸爸媽媽分享，沒有最好的幼稚園，只有最適合。名幼亦有很多不足之處。我地出嚟做嘢，讀名大學，中學可能好有幫助，但幼稚園我又唔覺有影響。名小學都係吸納最Top的學生，眼見讀地區普通幼稚園，都有很多例子考入名小學。

我相信你一定會選最適合的給囝囡。加油！

lovebb2

原帖由 dragonwarrior 於 13-05-21 發表
本來一心諗住報屋企附近既幼稚園，覺得接送較方便，有乜頭暈身㷫都即刻接到阿仔。

但眼見其他爸爸媽媽想 ...

其實名幼都唔易考，有offer再用心比較，會更知道自己想點。

bhsien

我覺得幼稚園唔需要讀名校, 反而越近屋企越好, 日日坐成粒鐘校車好慘架!  重有呀樓主你話你都唔係名校人, 咁點解一定要讀名校呢?  勉強要容入人吔ge圈子你同小朋友都會好辛苦.  

好學校係要, 但大個d先la. 不如你search 下附近邊間幼稚園好d!

poodlema

入名幼都係想幫助佢第時入名小再入名中, 係香港個遊戲規則, 入到名中, 其實對第時做野都好有幫助, 好多老闆請人, 如果有幾個比佢揀, 佢會揀名中果個, 而且好多名中O既同學, 第時可能做野都會幫到自己, 有好多會係大官貴人, 做老闆, 人際網絡係會比平平凡凡O既村校好D, 雖然好似好黑暗, 但哩個係事實, 係香港就係咁啦... 當然都有好多叻仔叻女讀村校都創一番事業啦, 哩個係佢地努力得返來, 凡事無絶對O既...

補充: 如果小朋友要丹居勞動先去到O既學校, 太辛苦小朋友啦, 咁都係讀村學近DO既好, 大個人先再舖路囉...

dragonwarrior

原帖由 lovebb2 於 13-05-21 發表
其實名幼都唔易考，有offer再用心比較，會更知道自己想點。

我都知難考！不過如果決定根本唔讀，就索性唔考lu

dragonwarrior

多謝你提醒了多...我從來都冇諗過入名校為乜，直至幾年前有位朋友同我講，特登租左自己響旺角個單位比人，自己帶埋D仔女租左北角，為左入名校，等仔女識D「好同學」，第二時入大公司，搵好工都易D!我嗰刻先知，原來D人真係咁諗架!

tabo.eddy

其實真係冇對或錯。完全個人喜好。亦唔係真係咁重要。有d家長有自己信念，覺得唔需要就唔需要，完全冇問題。

solomonwong

dragonwarrior 發表於 13-5-21 05:22
本來一心諗住報屋企附近既幼稚園，覺得接送較方便，有乜頭暈身㷫都即刻接到阿仔。

但眼見其他爸爸媽媽想 ...

我的意見係，讀近的幼稚園．
首先，近的幼稚園冇咁出名，就代表差ｄ？邊個專家講？


而有ｄ所謂好的幼稚園(唔係全部)，不外乎係提早吹谷學生，係咪真係好要將來先知，我就話揠苗助長，多數都係衰，


而近的幼稚園，你自己想像下，就知道對仔女有幾多好處．

GCG

原帖由 dragonwarrior 於 13-05-21 發表
本來一心諗住報屋企附近既幼稚園，覺得接送較方便，有乜頭暈身㷫都即刻接到阿仔。

但眼見其他爸爸媽媽想 ...

我估可以用45分鐘做底線，如果路程不超過45分鐘可以接受，如果超過就真係唔係咁好！

KittyMelody1

bhsien 發表於 13-5-21 10:14
我覺得幼稚園唔需要讀名校, 反而越近屋企越好, 日日坐成粒鐘校車好慘架!  重有呀樓主你話你都唔係名校人,  ...

我都覺得唔需要讀名校, 跟本讀名幼係自己家長虛榮心作粜, 名小學跟本唔係睇你讀邊間名幼而收, 係睇面試表現同關係, 一線神校仲講埋家長背景同職業. 識人個小朋友讀sc, 全軍覆沒, 最後走去讀二線小學only. 反而有親戚小朋友讀屋村幼稚園, 俾佢考到x守仁......既然係咁,, 做乜要個小朋友咁辛苦呢??

happy.rita

原帖由 dragonwarrior 於 13-05-21 發表
多謝你提醒了多...我從來都冇諗過入名校為乜，直至幾年前有位朋友同我講，特登租左自己響旺角個單位比人， ...

如讀名中學，入唔到名大學，就算中學時識到啲有家底嘅同學，人地只會睇你唔起，唔會介紹份好工俾你。但即使讀唔到名中學，只要入到名大學，到時先networking都未遲，所以最重要都係要有實力。

dragonwarrior

原帖由 KittyMelody1 於 13-05-21 發表
我都覺得唔需要讀名校, 跟本讀名幼係自己家長虛榮心作粜, 名小學跟本唔係睇你讀邊間名幼而收, 係睇面試表 ...

我都好同意呀!有時的確係家長們的虛榮心，甚至係一廂情願!我有朋友個女考入sc，讀到K2先發現唔適合自己個女!女女較文靜，而家中以廣東話為母語，所以較難跟同學相處。見女女每日都話唔想返學，心都痛埋但又太遲發現問題，唯有讀埋K3

taktakchichi

dragonwarrior 發表於 13-5-21 15:34
我都好同意呀!有時的確係家長們的虛榮心，甚至係一廂情願!我有朋友個女考入sc，讀到K2先發現唔適合自己個女 ...

利益申報, 我個仔都係讀SC, 係屋企我地主要都係同佢講廣東話, 但無呢個問題囉.
個仔D同學其實平時主要用廣東話溝通, 英文老師每日都只係部份時間係度.
除非唔識英文同普通話又去咗讀英普班 (其實都無乜可能, 因為一定要通過評估先可以), 如果唔係無乜可能會溝通唔到.

我覺得無論去邊間幼稚園, 如果你一心諗住送個小朋友去學校就會幫仔教掂佢, 自己唔理個小朋友, 呢D問題先會出現. 如困係咁, 咁係邊間都幼稚園讀都會有問題啦.

讀名校, 要求自然高D, 家長付出亦要多D, 就算我平時唔同個仔講英文, 都規定佢睇Video主要都係睇英文版, 講話事主要講英文故事. 當有assessment, 或者老師對佢英文程度有意見, 都要花多D花間同佢練習英文, 例如得閒同佢當玩遊戲要10分鐘內只講英文.

No pay, no gain