時光倒流回到初小時

csy_ma

回復 Rainy 的帖子

我既鋪排，會係早少少俾小朋友睇少D字既英文書－－我係睇咗資深網友Eviepa當年既分享後，先至將都幾多生字既公主英文書（所以只有我地臨睡時讀俾佢聽，佢自己唔會攞黎睇），換成d一版得一句既簡單英文書俾我囡。結果雖然佢都會有睇英文書既習慣，但而家都係睇d字體都幾大、仲係圍繞著公主內容既英文書睇

csy_ma

motherotk 發表於 12-3-6 14:35
1) Hong Kong boy graduated from famous local university
2) Hong Kong girl graduated from famous university in New York

對，我本身是內地大學畢業，而老公是本地大學的，發現友儕中本地畢業生關心的東西都相對窄，聚會話題相對少而沉悶。我反倒跟外地畢業的同事聊得更歡，縱然有些是短期留學的，對自己的見識都有較高要求。
試過介紹兩位分別來自香港和廣州的居德朋友予去書展並順道遊德的香港朋友認識，兩位都善良和樂於助人，但遊德朋友回港後，就震撼於內地八十後的世界觀、環保意識較她接觸的很多本地朋友要廣（她在雜誌編文化版，接觸的已屬較"另類"一群），進而頗擔心下一代的競爭力……

她說，自己揀逛法蘭克福書展來度假，在同期同學中已被視作另類（但她修的是人文學科），但居德廣州朋友的旅遊地卻是黎巴嫩、伊拉克、西班牙等，縱是港人熱衷的泰國，觀照角度也全然不一……轉個頭回到香港，我那群於地區名校就讀的中五學生，有精力關心的，不過是能否如期在考試前趕起選修課作業，而不致累病，能有什麼餘暇去拓寬眼界？？

csy_ma

ohnono 發表於 12-3-7 13:10
假如您是老師，有創意而未學曉駕馭自己創意既學生響您手上，肯定冇運行……連響討論區吹水都咁需要正軌，講 ...

謝指教

＂人人自有定盤針，萬化根源總在心，卻笑從前顛倒見，枝枝葉葉外邊尋＂

Ohnono：在此樓中，我想我不是第一個沒有緊扣主題而發言的，為您所不喜的，大概是我的態度，或是show off吧？事實上，show off的人是可悲的，因為佢對自己的真正見解沒有自信，所以至顧左右言他，show off本身，最能show出的，大概就是其自卑？

若果我的言辭有得罪您的地方，請容接受我的道歉。無論公開或者私下我都講過，因為不接受＂教育講場＂版主既處事手法，我不會再出現在該地。假如這裡的版主認同您這意見合理，同樣可以出言明示，我也不認為被絕跡於此有什麼不合理

csy_ma

Rainy 發表於 12-3-8 11:17
你不是痴線呀... 好聰明醒目添, 我個仔小二啦, 不能找一條龍了, 我已覺得自己問得太遲了..
但我現在關心 ...

叻媽問得並不遲呵。

三三四其實是一個重大的教育改革，今年是第一年，在這之前，大家都是按照以前一貫的模式選校，但估計在今年有了切實結果之後，選校的策略會漸漸有所改變。

改變一，自然是有關通識科的。現在所有學校都是摸著石頭過河，我估計，今年由於是第一年，顧及輿論，會頗易過關；不過，該課慢慢就會有要求。其實，您可以查一下，現在在教局負責課程統整的官員，很多是贊成母語教學的；當年老懂強推母語，又推得極蠢，現在可謂全盤失敗，不過，設計教改的官員，大概會以必考的通識課來顯示母語教學的好處，從其相當一部分課程有關當代中國，以及不能死背答案的個人成長，便可略窺端倪。

改變二，同樣是有關通識科的。您不妨留意一下，以前，很多在公開考試戰績彪炳的，多是理科生；很多考績優良的學校，最好的老師都是教理科的（整個班級傾向都是最好的學生就選理科，縱然其學科興趣在文科）。但教改令理科生不能只專注於操練或發展興趣，而通識，又難有特效藥，要同時改善思維層次和語文能力，方可應付。因此，這幾年內的學校排名大有可能洗牌，一些專門催谷學業的學校表現可能會褪色，而同時著時文理、擁有較厚人文基礎的名校有可能板前，另外，收生時不單看成績、並會面見家長的直資學校亦有可能搶灘，因為人文素養、恩維層次和方法不易打補針，學生家庭背景便更呈重要。

改變三，聆聽和說話分數佔愈來愈重要的比重。這個，同樣對傳統名校有利，因為英語為非母語，為顧及平均水平，會考的英文要求不如中文高。讀寫基礎，在初中開始以催谷形式可以達致。但聽講能力則更需要相關語境。尤其是講，近乎英語人的口音，很少在中學以後可以練就，雖然，說話內容所佔分數，應較口音為高。但同組應試，眼看身旁的學生口音悅耳，不免心怯，易影響表達水準。
基於此，單重成績、平日靠功課催谷的新晉名校有可能失準，因為聽和講都需要有閒暇去聽或看視聽作品才可練就，在此情況下，著意培養學生領導能力、表達能力的學校可能會冒起。此所以，為什麼現時愈來愈多學校把英語戲劇納為課程，亦較注重學生的誦讀能力。有子女就讀競爭激烈學校的高中家長告訴我，英文聽講部分的分數，是級排名的關鍵。

改變四，選修課範圍廣，並加入校本評核課業。這近乎把大學交論文的形式放在中學課程上（國際學校行之已久）。做過論文的人都知道，用中學那套應試學習（即背誦模擬答案）方式去應付，肯定沒有好結果。交文在乎觀點，靠鸚鵡學舌很難取得高分，但中學生如何能發前人所未發的觀點？訓練跨學科思維大概是較有效的方法。

什麼是跨學科思維？
就是……當談及中學選校時，關注點不單聚焦小學教育，還要關注社會要求的改變，包括大學收生準則的教育改革等，在綜觀全局後，落實到具體的細微方面，就可以有較堅實的基礎提出具創意又站得穩的論點。

為令家長對此有具體概念，以下請恕我show off自己的經驗，如帶來不安謹此致歉！
話說我大學唸了一門公共課，叫"漢初七十年＂，該課的教授相當出名，講名上學不點名，單憑功課給成績。結果，上課情況真是每況愈下，本來百多二百人坐滿的教室，後來僅得勉強成幾的二三十人上課。老師倒不介意，照例不點名，完課後也光憑交來那近二百份功課作評分，管你是否來上課。那門課，我得到最高分，老師還特地找人傳話，說由於我的功課較跟他那兩位歷史系研究生都做得好，想見見我。我的那份功課，是要交功課那星期才趕做的，只做了幾天，而且，文章的開頭，是引述當時新鮮熱辣的《信報》時評專欄文章，它講的是時事，我卻用以作"漢初七十年＂功課的楔子……

之後我曾經在香港當過大學教授的槍手，幫其應付各種學術討論會的論文。學術論文總的要求是要有新觀點，但老實說，素材都是那一堆，如何年年新？關鍵在翻出個新的角度，以舊的素材、結合社會或學術圈最新話題，以不同的文字組合，撐出一篇看來是新的文章。這不過近乎文字上的砌磚遊戲吧了，但能否矇人，就要看文字融合能力，和切入角度是否夠敏銳。這樣的技巧，不能靠死背範文而來（所以我舊老闆以前還可以找其研究生做，但後來的學生水準似乎不足駕馭，只好另覓渠道）。現時的教改，針對落伍的應試催谷方法作了很多改革，例如中文作文題目加入考學生融合能力和切入角度的選擇，僅＂檸檬茶＂三個字要學生成文，顯示平日不按框框的胡思亂想的重要（我通常會叫學生避開這種題目，因為冇得教）。

噢，又夠鐘了，又在不務正業了說到這裡吧，總括而言，教改大概會令到香港中學重新洗牌，這樣的效應大概會在幾年後才慢慢呈現，現在以傳統思維挑選的學校，未必適合將來的形勢。

csy_ma

Chau444 發表於 12-3-8 17:00
在填寫申請表的時候, 深深感受原來學習也是要“經營”的！作爲家長都想小朋友愉快學習，但現實是不能只有愉快的生活，而達不到應有的學術水平。

Chau444：

BK以前的"教育政策"（現搬至＂教育講場"）的資深網友Eviepa，以前不斷以自身的教女經歷分享既要快快學習，又要達到應有的學術水平是可能的；另一位現時仍久不久出現的資深網友ChiChiPaPa，亦以網誌見證了近似的成功經驗。

至於中一學位申請表的內容……倒想跟您分享一則自老公聽來的趨勢：他是其母校的一個mentor，不久前參加母校一年一度的座談，會上，有一位來自銀行界的演講者謂，今時今日，原來求職都是看你在學期間參加的其他非學術活動。
為什麼呢？
他說，你要說服你的僱主要聘用你，首先得講你能為僱主貢獻些什麼？一個大學剛畢業的新鮮人，可以有甚麼貢獻？那就是你的網絡關係。從何得見，從你的課餘活動的參與，便知道你的社交圈有多大，社交能力的訓練夠不夠……

於是，造成社會循環：僱主向大學叫價＞大學向中學叫價＞中學向小學叫價＞小學向幼稚園叫價……

這是讓人哀傷的世襲制，因為除社會服務外，其餘各方面發展，要達到超越同群的專業水準，在在需財
不過，對孩子發展來說，多接觸不同範疇，讓其探索自己的個人潛能，也是健康人生所需吧？

csy_ma

motherotk 發表於 12-3-8 19:27
About "一條龍": Most of us understand that this will be better than going through again the secondar ...

以前的理解，一條龍的好處是學校可以不用倒模在升中呈分試的應試課程上，可以以更長遠的眼光培育小朋友。不過，囡囡的畫班朋友，來自一間沒有那麼貴族氣、公開試成績亮麗的一條龍女校小友來我家做功課，囡囡說她校的數學較囡囡就讀屋邨學校淺多了，而她自己就不斷說她班的同學很hea，擔心繼續下去，該校會變band2云云……

從另一個角度看，愛玩，是小孩的天性，而能把上課變成玩般有趣的老師如鳳毛鱗角，那有適當的刺激，如師生共同面對一個殺戮戰場，確實能調動教的和學的，還有旁觀家長的積極性？

另外，一條龍學校始終給人藍血的感覺，以前有朋友從幼稚園到中學都唸同一間女校，亦即是，由幼稚園到中學畢業都認識同一班生活圈和背景接近的朋友，雖云，這類中學都會積極鼓勵學生參與聯校活動，但深入接觸的來來去去都是同一群人，能否有礙小朋友切身體會到世界的多元可能性？

我個人在內地唸大學（認為我分享個人看法，有所比較，是抬高自己或踐踏他人的網友，請不要讀下去了，我不想打外交辭令官腔，這似乎有違我的本質，亦違我耗費時間的本意），初時最目不暇給的，是發現來自不同地方的同學，身上都有其地方的水土特性，有時是他們自己也覺察不了的晶石（因屬於其地方的人文特質，孕育的時間遠較同學們當時的年齡長），例如來自蒙古同學比較率真，來自江浙的同學說話較委婉，所謂講野有骨，來自北京的同學－－最初只能聽到他們一句的頭尾幾個字……這些不同的地方品性，固然也帶來交流障礙，但更多是衝擊火花。我當時是已經出來工作然後才去唸書的，對著那些思維相對純真的同學，最初是沒有太大興趣交流的。後來發現一個我同樣是二進宮的同學（他比較傳奇，社會歷練非常厚），竟然從那群年輕的學生學到些東西，還模仿在自己身上，覺得很受衝擊。於是再細心留意一些我眼中不算佩服同學，原來也有很多可發掘點。

在香港唸書，都是來自一個近似的文化氛圍，看同一些電視、電影，看相同的書……缺少平衡衝擊，這可能也是部分港人視界相對較窄的原因？假如由幼稚園到中學，交往的都是同一批同學，會不會加深這種藍血小圈子的井底觀？

csy_ma

ZZdaphne 發表於 12-3-8 17:37
我不能好具體講''公主書''有什麼不好, 只列出2點不適合幼小女童,

您講既我都部分同意，奈何，好明顯，我囡同我細個時既喜好截然不同呢個可能係佢幼稚園時我要返工，放咗佢響呢一位喜歡公主既朋友仔度有關（果位，就係向您請教既我的疑惑），之前佢寄存響另一個全家布滿高達既男同學度，會鍾意同同學打劍……

不過，由於要陪阿囡睇迪士尼公主書同公主碟，我認為迪士尼已不多不少作出現代社會既調校，以便釋去家長既顧慮。呢個，亦係我欣賞迪士尼既地方。

跟蹤迪士尼公主既故事內容，直頭可以寫篇研究社會價值觀轉變既論文您看看最早的仙履奇緣，好像是上世紀六十年代(?)，那時女孩子最大的幸福，是嫁個有錢有地位的人；跟住，到白雪公主，宣揚逆來順受，殺手由小矮人做，公主係會暈低既弱者，不過，到咗美女與野獸，主角已唔係藍血貴族或溫柔弱者，而係救爸爸，柔化野獸，敢於向誤被鼓動既群體說不既現代女性，就算人魚，都會同王子一齊抗敵，唔係暈咗就算……我同我囡都好期待今個復活假上映既公主做賊搶王子既白雪公主新版

對唔住！完全離咗題好彩係版主您帶頭講開既，咁未致於被消失？

csy_ma

ZZdaphne 發表於 12-3-8 19:06
csy_ma  另，如好友中有性格不太值得欣賞的同學，但又因自幼相熟，該生又不大有人緣，遂選擇常跟她一起－－ ...

謝謝意見

csy_ma

jojoplanet 發表於 12-3-9 09:45
呢間小學小二開始有精英班我唔係好鐘意，因小兒係１１月尾細仔我怕佢入到精英班有壓力，入唔到無自信－

Jojoplanet：

小朋友、尤其是初小既，自信好多時如鏡一樣，係父母目光既反照。我囡來自有精英班既學校，一樣有非精英班同學仔（佢有讀寫障）好有自信，呢個要睇學校既文化：會唔會俾學業成績稍遜同學有其他勝於人既機會（果位同學今年就代表學校去參加rummikub)既全港比賽）。最重要既，係您們如何向佢演繹呢個可能性（細仔未必學業差）。

我囡響學校一直參加戲劇班，會被分派有頗多對白既角色，但呢幾年，主角都係由同一位同學擔任。去年起，導師話想做咩角色要自己報名，導師再響報名中人選中藉試演選角。舊年佢應該想做主角，但係唔敢報名，結果公布後果日放學，佢同另一位想做主角又冇報到名既同學不斷咬耳仔。跟住我照例聽到好多負面情緒，投訴這投訴那，我就同佢講，你想做，就首先要爭取，連表達意願都唔敢，邊個敢搵你？既然報名既同學中，個主角好明顯實力最強，咁仲講咩？？

到今年，佢真係報名爭取做主角，事前校長又讚佢英文口音好，而今年套劇係英文，作為校慶十周年慶祝活動之一，學校參與較多，連我都誤會咗，以為校長暗示佢有可能做到主角。不過，選角權最後都係由外聘既專業話劇導師決定，主角仍然係過去幾年既同一位。無可否認，果位同學係有表演天分既，但係英語口音需改進。我認為結果都算合理，咁點安慰阿囡呢？我同佢講，導師姐姐俾咗個全劇最有挑戰既角色俾佢做（The Wizard of Oz裡的Wizard)，呢種咁既特殊角色，主角都未必做到佢咁放架。於是，佢後來就幾開心咁話俾人聽，佢做個劇名

套劇係今年演，不過舊年暑假我已安排佢課外活動上話劇班排演同一個戲碼，果次又俾NET選佢做男巫師，佢都唔係好開心，都好快就識氹返自己。我跟住會同佢鬥奸笑，睇吓邊個做得似壞女巫。後來，做壞女巫既朋友仔做得唔係好，又唔想做，我囡就爭取到做埋壞女巫（第一次選角，佢其實已報名話想做壞女巫）。結果俾導師讚佢演得放……

成世人流流長，小朋友遇到挫折，係在所難免既。趁佢地仲肯講野您聽，聽您講時，不妨陪佢地經歷一下挫折。我囡升中第一輪揀既首志願，係band1頭，而佢係band1中。我囡既性格，係疑似8號，即係假如佢某方面明顯不如同輩，佢好可能會放棄（如學琴）。所以，我地其實想佢揀間同學普遍程度冇咁高既學校，不過，既然佢堅持，又講出佢既理由（今年家長會後，我地去問副校長野，副校長同我地解釋完，直接望住阿囡問佢野，加上校長響會上話外評評佢間學校老師好好，佢就話因為間學校d老師好，堅持揀佢），只好由她。

都驚佢會吃力，所以就：
1  做定資料搜集，藉義務教中學生得知而家佢最弱果科中文到中學時學d乜，已約咗同學仔暑假時一齊玩吓文言文翻譯遊戲；
2 剛開始隔個禮拜去學少少英數，給她較長既時間適應；
3 買定好多關於歷史既漫畫同故事書，而家佢似乎未有興趣睇，但到有機會接觸時，就可以用故事助佢記憶；
4 買齊三套既《魔法校巴》影碟，供佢不斷重看（重覆強調到了初中，須把字幕由中文轉為英文），亦有幾多字少圖多既自然科學書，
5 英文係阿囡自小成績最好既一科，我地去年開始屈服現實，俾佢上屬學術方面既英作班，而屬於佢既興趣，英朗誦或話劇班，亦仍然繼續。佢喜歡看中文書多點，一旦佢表示對某套英文書感興趣，我地就整套買，有殺錯冇放過。
6 我而家已逐少收集講歷史名人既影碟，供佢學到時可隨時參考，佢鍾意睇既翻譯小說既電影、電視版，亦俾佢不斷重看（佢既好處係鍾意果樣野，會不斷重覆睇，E D係陀羅入命既典型特徵）

唔俾佢感覺到壓力，唔等於冇部署，稍後同您分享我認為小學最重要是學些什麼等資深網友成日講既老生常談

csy_ma

jojoplanet 發表於 12-3-9 11:22
回復 csy_ma 的帖子

我都同個仔裝備緊入小學等佢快d適應..我個仔又係有時想乜但唔夠主動囉...k1-k3先生都 ...

Jojoplanet：

以下係我以前同我囡學校新生家長寫既野，謹供參考：

1. 英默：這是之前受活動教學幼稚園既小朋友家長既惡夢，舊年係第4周進行，默既係超過20字既key structres（響本書既p4）．唔好以為好淺，未默過書既小朋友，可能連is am my都要費神背同分辨，幾頭痛架．
最好而家未雨綢繆，每日同佢背2-3個字，叫佢地將背咗既生字寫/貼響細卡紙度．張細卡紙可以貼響當眼處或隨身擕帶，閒時玩抽卡背字遊戲（張卡第時仲可保留玩砌句遊戲）．

2. 中默：以下兩個網址係老師介紹既
http://www.dragonwise.hku.hk/dragon2/schools/archives/morph.php （文字由來動畫）
http://www.dragonwise.hku.hk/dragon2/schools/archives/stroke.php （筆順）
可以令小朋友加深對中文字既興趣，尤其是筆順既遊戲，讓佢地多做幾次，對默書好有幫助．
我舊年聽過學校的一個講座，教我地同小朋友在空中默寫好似佢個人仔一樣大既字，我囡都幾興奮，亦可以加深記憶．
當然，聯想法都有用，例如我地話唔知點解，做錯咗都有錢收？佢就對個錯字既偏旁頗有印象了．
我都有試過將d字界開叫佢砌番埋，對喜歡玩砌圖既佢都ok work，不過就太太麻煩了，後來都唔再搞．

3. 輔助教材：Longmam隻CD-ROM（建議唔好考慮買CD，我兩隻都試過，CD吸引度低好多）雖然約200蚊，但真係引到佢地成日睇成日聽課文既興踙，仲有認字遊戲玩，真係幾好（上下學期都係果隻）．
普通話隻VCD都買得過，因為呢樣野係考聽音同分辨平上去入，假如冇漢語拼音底，真係唔識點同小朋友溫．我地上學期就係睇隻VCD一次，做辨音練習時一齊猜一齊做，都過到骨．下學期出版社好似冇黎到學校做推廣，冇買到下集VCD，結果就唔知點同阿囡溫，成績自然就......

3. 數學：小一數學都係基本既加減數，練得多就識．我暑假同阿囡都好懶，日記同做番中文一年級既閱讀理解練習都做做吓冇影，倒係百子格算術練習做到過20日，發現佢既運算能力進步咗幾多．
百子格既原理好簡單，係每日做同一批數（標準係格仔本既橫10行直10行，即係做100題，所以叫做百子格），然後計時，如小朋友做得準確，又快過昨日，即可獲獎勵．
我地大概會響個多星期左右轉換一次，先是個位加法，然後逐次滲入10-20既數，現在也不過是20以內的加減．不過小一初入學生可能能力有限，家長可以試令佢地計10以內既加數，每日10題，做熟完再練減數．

4. 常識：考試都有課外題，不過冇仁立咁深，家長平日可以同佢地一齊睇吓新聞報道，過時過節解釋吓節日既來由同時間（可參閱中華里http://www.chinalane.org/），應可應付到．

csy_ma

回復 jojoplanet 的帖子

不過，好多資深網友都分享過佢地既經驗，學前最成功既策略，就係培養佢地中英文既閱讀興趣。我囡小一果班，幾乎半班以上都流行睇《老鼠記者》，我囡係小二升小三先睇半字書，所以中文追得好辛苦。英文讀字書既習慣更到小四五至形成，但學前成日重覆睇英文字幕既學前VCD，後來至發覺佢真係有睇字幕架喎

csy_ma

jojoplanet 發表於 12-3-9 12:11
之前係ｐｌａｙｇｒｏｕｐ形式架但佢唔得呀因為佢怕羞唔敢出聲，於是我同佢轉公文佢唔駛對住其他同學有比 ...

嘻嘻，我以前睇完囝囝爸同Eviepa有關公文既討論後，都同阿囡去學過一排公文英，初時佢好鍾意聽隻CD，但後來生字太多，老闆娘又話要查晒先得，就捱唔到落佢勒。

建議俾佢學朗誦。我囡第二志願學校有位F4姐姐講野好得，會代表學校去推銷，聽完令我游說阿囡將第二改為第一。佢阿媽後來同我講，姐姐細個時好細膽，唔肯講野，連笑都唔多肯，有日等搭校車，教會有位家長走埋黎，話要教佢朗誦，學咗後，慢慢個人就開朗咗好多

公文數就唔晒勒，做百日格就得。百日格係連續兩三個星期做同一批數，個小朋友睇住自己既進步，就會建立到運算既信心。中文既話，如佢抗拒，不如同佢講數，叫佢每日揀個古仔講俾您同弟弟聽，講到就唔駛去？咁做訓練到佢既，遠比做公文既多，條數夠抵

csy_ma

趁仲記得，搵返王丹早幾日響面書寫既野同大家分享：

繼續高等教育的話題：以我在哈佛十年的觀察，哈佛確實很難進，但是畢業並不難。平時的壓力大多來自於競爭和榮譽感，而不是擔心無法畢業，因為老師對學生一般是相當寬容的。

我認為這是對的。因為：好的大學要保證優質生源，是因為可以形成一個精英環境。但是學生一旦進入大學，如果獲得文憑和畢業證書的壓力太大，就會變得死讀書，這不是好的大學的教育目的。

csy_ma

我認為中學都唔應該以死讀書，響公開試試掄元為最主要目的。老師對學生是否有同理心，亦非常重要

中學係成長期幾關鍵既階段，如果去到有如殺戮戰場（記得以前有人在bk分享一個如何部署升中既網誌，其部署包括要阿囝韜光養晦，放假消息話俾對手知唔係揀佢既目標學校，等個對手家長唔駛針對佢……小學已經需要長期策略性講大話，真係令人鬱結)般既學校，就算入到大學，個人發展可能都唔係好開心??

csy_ma

至於小學，我囡既小學唔係我既心水，我目標既小學係少抄寫，少功課既新教育學校。

不過，六年即將過去，我而家亦教緊來自當年我想阿囡揀既目標小學既畢業生，發覺就算係對自己幾有要求，成績幾唔錯既該校畢業生，寫既字都令人忍不住著其改善（對於即將面對公開試既高中生，字體都係攞分既重要工具），亦有F3生識既字仲少過我囡中文成績達A但未臻頂尖既小六同學。

而有小少閱讀障礙傾向既阿囡，其小學生涯也過得不賴，所以，都有少少懷疑小學揀唔谷既學校係唔係一定好d？不過，老師一定要好，遲吓有機會分享我聽返黎既唔同學校例子