我的英國公立學校日記

KIMLIFEINUK

大家好！
之前有啲事冇上網。所以冇覆到一些留言。十分抱歉。
之前整理咗我女嘅一些日記。關於佢初到英國，第一次返英國公立學校。同埋學校既情況等等。答應左會係度到大家分享一下。呢啲全部係我阿女自己嘅個人經歷，可能喺唔同嘅學校遇上唔同嘅老師、同學會有唔同嘅經歷，不過呢個系佢第一次喺英國（今年九月），初初上中學時候嘅情況。佢而家已經順利過渡咗第一個係英國既學期.


8月初:
今日要去買校服。因為肺炎情況, 間校服店已經唔係日日開，所以要特登約時間去試校服。本來唔試都得，不過又驚校服太大件。今日去到舖頭時原來已經有幾個人喺度等緊試校服。好彩一早打電話約咗時間。原來啲校服都比較大件。鋪頭嗰個人叫我買最細碼。即係有少少覺得我唔夠高。結果試校服其實都唔係太需要，衹要買最細碼就ok喇。件校服好靚喎, 成套返工套裝咁，件校褸好靚，跟住條裙亦都好靚，學校做要求間鋪頭幫我哋每個人嘅initials 繡上去嗰個衫度。因為學校仲有netball 同埋足球學，所以我哋仲要買埋波鞋同埋護膝。  咁前後都已經用咗300幾磅校服加埋所有其他嘅accessories.

最好笑係我後面試衫嗰個女仔, 到佢試衫嘅時候,間鋪頭攞佢學校嗰個校服比佢試, 因為一間鋪頭其實係做好幾間唔同學校嘅校服嘅。 嗰個女仔竟然當眾喊咗出嚟。佢話點解佢間學校個校服竟然係橙色。超級難睇。所以佢即場喊左出嚟！佢阿媽唯有喺側邊氹下佢，跟住我睇下佢件校服。又真係幾橙喎！好彩唔係我件校服嗻！怪唔得佢喊啦。

校服鋪頭嗰個女人非常之好喎，本身我淨係買最細碼已經可以，但係佢都幫我不停喺度試下度下，然後又建議下我應該要點樣配搭，買幾多件恤衫加幾多件褲，仲有又建議有d可能買少啲有啲又要買多啲換。

買好曬校服之後，我就專心等開學，心情十分之緊張但係又好擔心。

另外仲有書包，學校規定一定要深色嘅書包。 唔可以七彩或者鮮豔顏色。好彩我都喺香港買咗個書包帶過嚟。

跟住學校有問我哋需唔需要訂午餐，但係佢話因為而家肺炎情況，所以將唔會有熱食提供，只會售賣三文治又或者我哋可以自己帶。噉我就揀左自己帶三文治，反正三文治容易整，如果買佢啲三文治，好似淨係得火腿同芝士，噉又太單調。

臨返學之前，我哋不停查下邊一架車可以直接到到學校，有好多唔同嘅巴士都可以去到，但係我哋又要睇返停站嘅時間，同埋嗰條線有冇兜路，所以都用咗好長嘅時間去睇。主要係儘量睇下啲巴士路線唔好停咁多間學校，否則嘅話間間學校都上同一架巴士，可能就會比較爆。雖然冇位坐都可以，不過最好有啦。

另外返學之前，可以買個全年嘅學生交通證。噉就成年搭任何交通工具都唔需要再另外畀錢。都係3000幾蚊港幣。除咗返學可以搭校車，同埋可以搭任何交通工具之外。其實成年內，包括放假任何時間，都係可以憑嗰張證免費搭任何交通工具。所以第一時間就即刻去買。

KIMLIFEINUK

當晚老師就回應左，指咁樣係絕對unacceptable, 第二天早會時仲同所有同學講，唔可以再發生，之後情況就改善左好多。但係而家亦仲係有偷文具既情況出現，但因為係偷，所以通常唔會知係邊個人做，惟有帶D比較平既文具，咁唔見左都無咁傷。





。

KIMLIFEINUK

同大家分享一下最近既一件  “bully 小事件”

話說同學之間初時都好鐘意互相整古下對方，初時大家互相嚇下大家，都無乜特別, 但係有幾個女仔特別鍾意收埋人哋啲嘢，有時候趁你見唔到佢嘅時候，就將啲嘢收埋咗，跟住之後又扮唔知，噉你就周圍搵d野，搵極都搵唔到嘅時候，佢都唔會話比你聽喺邊。亦唔會認有攞到你D野。

有時候可能過咗一日之後，就話返畀你知係佢攞左，或者甚至乎係偷偷放喺你張枱度冇話畀你知。當然亦不時發生真偷文具事件，係偷左無回頭果種。其實不論係真偷，或者只係偷偷地收埋咗之後再攞返出嚟。都係一件好煩嘅事。

因為有啲人不停互相收埋啲嘢嘅緣故。就進展到如果你收埋我啲嘢，我轉頭又去收埋返你啲嘢。可能佢哋就係比較“天真”, 所以會鍾意玩埋啲噉嘅嘢。

阿女同我講話有一次佢有個同學成個書包攞去收埋咗。係成個書包攞走咗！跟住又見到有啲同學將人哋個水壺收埋咗。另外有啲俾人收埋咗嘢嘅同學，因為勁嬲嘅緣故，亦都將人哋個書包放落垃圾桶度。

就係噉樣，佢哋搞下搞下，呢一件事就變咗越嚟越過分，同埋越嚟越麻煩喇。

之後仲演變為轉一轉身連張凳都俾人收埋咗！成張凳竟然都可以喺無聲無息底下，攞走咗去第二度！

跟住啲同學開始好敏感，就算攞文具都唔敢成個筆袋攞出嚟，要喺書包嗰度偷偷攞一支筆出嚟，然後嗰一支筆用完又要再即刻放番喺書包度，收返埋嗰一支筆。以免支筆俾人攞咗！


有一日我個女放學返嚟，十分嬲。佢話佢又唔見咗兩支筆，但係其實係俾人偷咗！因為係靚果2枝，同埋除左放過喺枱度之外，都再冇攞過出嚟。

跟住佢同幾個同學商量過之後，一致決定（我阿女）應該同老師講。佢哋都一致覺得噉樣係bullying！

因爲我女太嬲嘅緣故，就憑住嗰一鼓作氣，佢決定咗要同老師講，要寫一封email 比老師。

於是佢自己一個人硏究咗好耐應該點樣寫。反復思量。用左一個肯定而禮貌既tone寫左呢個email, 指出呢個風氣已經失控，令人無法集中上課。

佢寫email果陣已經差不多黃昏時段，佢睇完滿意之後，佢就果斷咁按send！

....待續....

KIMLIFEINUK

關於成績表的一些事

今年已經派咗兩次成績表。而家年代唔同, 已經唔會再有紙張嘅成績表派喇。我就懷念以前有張紙嘅日子。不過你可以自己打印出嚟嘅。但係總係覺得感覺有點不同。

派成績表嘅日子到左，就會收到電郵通知。然後登入系統裏面，就會見到張成績表。張成績表係pdf file.

家長通常會喺個學生未放學之前，已經send 左俾佢whatsapp 佢睇，好有效率嘅喎。

我以為會係.....

好似去年派成績表噉，我諗住等阿女返屋企之後，大家坐低先一齊先睇，認真慢慢睇清楚後，再一齊研究，檢討...親子talk 之類


現實係.....


點知佢下晝就短訊我。話人人都已經睇到自己張成績表，因為阿媽第一時間即刻send比佢, 叫我要即刻火速send 畀佢！等佢.....快D同同學討論！（唔係同我討論！）

仲不停咁摧，係咁whatsapp我....快D啦！快D啦....‘


佢哋嘅成績表係唔會有名次嘅。但係會詳細列清楚你每一科嘅得分係幾多。個分數係包括測驗同埋做project 既平均分。然後側邊會寫級嘅平均分係幾多，噉你自己就可以比較你自己嘅得分，其實係全級嘅平均以上，定係以下。同埋佢都有幾個等級分，會話你知到底你果科係乜嘢評價。

跟住我哋家長睇過成績表之後，就會網上簽收。證明自己有睇過。

KIMLIFEINUK

laijenny99 發表於 21-5-5 11:09
多謝你一直分享!好好睇, 讓我了解好多英國上課情況, 阿女好乖

謝謝鼓勵啊！

laijenny99

多謝你一直分享!好好睇, 讓我了解好多英國上課情況, 阿女好乖

KIMLIFEINUK

學校最近整左個功課表俾家長，主要係俾我地睇下，佢每日有D乜野功課要做同要交，我唸唔知係咪想家長關心吓，定係幫手嗺阿女交功課呢？

但我聽阿女講，人人都有準時交功課。應該唔駛家長動氣！

學校話依照佢地個表，每日唔會多過2樣功課，我見其實好多時所謂既功課已經係堂上做好左。既然己經上左中學，無理由仲要我理佢交功課與否，所以個表，我睇下算啦。

佢既同學都幾進取型，除左測驗日會大家一齊溫習之外，仲會交換下筆記。佢上堂既時候，老師會有 ppt 跟住講，又會有本書，但本書係學校既，你唔可以攞出課室，有D家長會去書店買本書，但只係少量家長買。上堂既時候，阿女喜歡係咁寫筆記，老師講乜，佢都會儘量記低，我叫佢其實如果本書有，上堂就唔駛係咁寫，咁辛苦，但佢話寫左一次，其實易記好多。咁測驗前，佢係屋企再寫一個summary 嚟溫書。通常寫係張 a4 紙度，佢有個同學就鍾意寫係D咭紙度，阿女試過，但咭紙又厚又多張數，最後改返 a4紙，話易睇D。另外，果個女仔只會遠處 show 張咭纸你睇下，話你知佢幾叻，但唔準你睇佢D notes啊！

咁如果有 test, 果日佢就會早上再同朋友仔一齊溫書，睇下互相筆記有無野漏。我覺得佢既同學仔幾乖。不過明顯地同學之間係存在競爭氣氛的，成績好與唔好係會著緊既！

好似最近一次計分project, 老師竟然用左新招式！連我都估佢唔到！一上堂，老師話會派返改好既 project 俾你地啦！只見檯上2堆部，左右各一堆，老師話，右邊既係做得好，分數高既，左邊係做得差果D！

然後佢叫名, 派右邊果堆，叫你名，你就出嚟攞番自己本部，叫哂右邊 (做得好果堆) 之後，左邊果堆就唔叫名啦，傳過去攞，但其實係人都知無叫名果堆, 咪即係做得差果D。

唔知咁樣既「激勵」有無作用？！真係要下次 test result 先知！

KIMLIFEINUK

另外一對好朋友事件係近期發生，一返到學校，2個女仔已經俾 head of year 叫左入房，跟住出番嚟，一個喊住囗，另一個就黑住面，最慘係因為己經上緊堂，所以佢地係課堂中段行番入課室，自然人人望住佢地，老師就故作開心無事，叫佢地返去個位到，仲顯得異常 embarrassed.

於是佢地就低住頭行番去個位到，以後唔知有冇機會拆掂佢！

好彩阿女既朋友圈比較「平淡」，無咁大起大落，否則除左老師成日要開解D學生之餘，做家長都好難處理佢地既情緒！

KIMLIFEINUK

四月中商店可以開番之後，人人都有種似放監既感覺，我同阿女星期六去左商場行街，發覺人頭湧湧，彷彿全世界都一齊出街咁，我見到大減價，於是超開心買左一袋二袋！但係今年四月中仲係咁凍，又大風，因為而家食野只可以坐戶外位，唔可以坐室內，我地又因為只可單向行路，走嚟走去好耐，先揾到個指定出囗！結果我覺得自己係狂風中食麥記，除左個薯條隨時會飛走之外，我又要睇住個包，結果好快食完，入番去。

後來阿女同學短訊，原來人人都係果日去左同一個商場！

話說開學雖然一段時間，但除卻中間網課及假期，其實唔算長時間。但已經有幾個唔同既朋友圈反目左了！中學生也許就係大情大性。

頭一對好朋友，由小學己經認識，一齊升同一間中學，唔單止成日係網上晒有幾 best friends, 仲成日孖公仔咁，點知有一日，兩個係學校打交，係，係女仔互相扯頭髮，俾校長叫左去訓導，喊住出番嚟，從果一日開始，佢地無論行路，上堂，都會當對方透明，彷彿老死不相往來！但原因至今仍是一個迷！

另一對 best friends, 因為興趣相近，所以成為 best friends, 日日一齊，點知早一個月，突然係通訊程式既狀態度互相暗鬧！佢地既反面，好似比較和平，無大件事發生，但結果而家都係當對方透明！

KIMLIFEINUK

放復活節假期之前既呢個星期，有數學和英文test, 總結一下學校開番所教過既 topics.


我見阿女既英文科，其實已經冇教任何文法或者串生字之類。我相信上左中學之後。可能就已經唔需要教呢啲。我覺得如果喺香港過嚟嘅小朋友。可以過嚟之前儘量打好個文法基礎。因為上咗中學實在再無呢方面嘅教學。我見佢而家最多係睇文章，分析文章嘅寫作風格，同埋嘗試各種唔同嘅創意寫作。

其實我覺得啲細路仔喺香港嚟真係好叻，英文程度可以咁快追得上。如果係我當年，我相信我自己就唔得。

KIMLIFEINUK

阿女由九月開學至今己經轉眼半年，可以話係一半係學校，一半係屋企。

短短既日子裡，學校既朋友圈已經有不少變動！開學初期，有2個女仔特別friend, 成日一齊玩，但最近佢地就反左面！連係走廊行過見到都當對方透明，但係無人知佢地反面既原因！

另外有2個本來都一齊玩既女仔，唔知因為乜野事，係學校大打出手，竟然互扯頭髮，最後去左見校長！仲喊住行出校長室！ 之後又係互相當對方透明，又係無人知點解！

之前有個女仔，由開學到近期都係一個人，佢無朋友，食午餐時間都係自己一個人，但近期有另一個女仔同佢組左一個朋友圈，事源因為果個女仔又同佢既 friend 反左面，所以佢就「立」左呢個single girl 做 friend.


我就唸唔到其實佢地有乜野會反面致此，而家年青人就係夠直率。

KIMLIFEINUK

Grammar school 的迷思

阿女同D同學傾開，佢地大多數都對 11 plus 既考試印象深刻！!以下係一些節錄。


*有個女仔話佢係家族第一個入到 grammar school 既人，super proud.


*有個女仔話，自從佢阿哥早幾年入左間grammar school 之後，佢阿媽就突然覺得入 grammar school唔係夢，於是係咁幫佢操個考試，叫佢要入到。


*有個女仔係考試年半前佢阿媽先知有個咁既試，所以遲左開始溫習，不過好彩得左，而家佢個妹今年五歲，佢阿媽決定佢要早D開始預備 11 plus, 仲打算send 佢去 prep school!


*有一個女仔話佢由 year 4 開始，佢阿媽己經home school 佢 11 plus 既 workbook and technique.


* 有個女仔話佢以為自己一定 fail, 因為張卷尾有好幾題唔識，放 result 果日，佢阿媽仲嚇佢，同佢講 fail左，佢話咁以為入硬另一間choice, 點知佢阿媽係咁笑，原來佢係同佢講笑，佢話嚇死佢！


*有個女仔話放 result 果日，佢阿媽開心到喊！

KIMLIFEINUK

Apple_Orange_T 發表於 21-3-28 13:00
French & German 都好，
可能英國公立學校多啲有法文，德文少啲，如果錯，請更正
...

學法文既人數比德文多好多，根據數字，咁應該係，我阿女間學校有法文及西班牙文，但無德文提供

KIMLIFEINUK

我見有 news話脫歐後少左人學法文

Apple_Orange_T

Poyau 發表於 21-3-28 10:14
GCSE MFL 趨勢
法文 ↓ 西班牙文↑ 德文2020

French & German 都好，
可能英國公立學校多啲有法文，德文少啲，如果錯，請更正

Poyau

Apple_Orange_T 發表於 21-3-28 08:26
Very good sources thank you!
May I ask you there is any government website showing the certain info. ...

GCSE MFL 趨勢
法文 ↓ 西班牙文↑ 德文2020

Coronavirus and languages GCSEs, 2020
http://www.alcantaracoms.com/coronavirus-and-languages-gcses-2020/

Apple_Orange_T

Very good sources thank you!
May I ask you there is any government website showing the certain info. I would study it in depth.
Thank you very much for your advice

KIMLIFEINUK

In 2019 there were approximately 122.8 thousand high school students in the UK taking French at GCSE level, compared with 96.8 thousand taking Spanish and 41.2 thousand taking German.



Most popular choice in 2019
1 French
2. Spanish
3. German

KIMLIFEINUK

Apple_Orange_T 發表於 21-3-27 20:50
我想請問：
如果就讀公立學校，中學及小學，請問有沒有法文讀，可以揀的？謝謝資料！
...

有呀！英國政府中學有 modern languages 可以選,  多數係法文，德文，或西班牙文，也有 mandarin, Latin, Arabic, Russian, Japanese, Urdu等等.

要睇個別學校有乜野外語可揀！唔係間間都有你所想學的，但通常都有法文，如果你打算想讀法文，學校既網頁會講有乜外語司以 offer

Apple_Orange_T

KIMLIFEINUK 發表於 20-10-27 16:57
大家好！
之前有啲事冇上網。所以冇覆到一些留言。十分抱歉。
之前整理咗我女嘅一些日記。關於佢初到英國， ...

我想請問：
如果就讀公立學校，中學及小學，請問有沒有法文讀，可以揀的？謝謝資料！