2006年入讀主流小學的障礙兒童家長請進來傾下

kmwun

mamailoveu & DOUGLASMAMA

小學方面你地可以問吓其他人心儀的學校的口碑，上學校網頁了解吓，同有小朋友入讀的家長打聽吓，例如返學放學時間去學校同人傾吓，直接打電話同校長傾。

另外我仔仔K3時參加咗協康會的小一班，係模擬小一情況幫小朋友熟習，由每年9至10月開始隔星期上兩小時，一路上到第二年6月，我稔佢地應該重有辦可以早d打電話去問吓。我覺得幫到小朋友好多。希望大家都入到適合的學校啦！

mamailoveu 寫道:
DOUGLASMAMA

我個仔跟你個仔的情況差不多, 私人的評估有自閉傾向或過度活躍，只是邊緣, 而政府的評估就未知，其他正常，現在都係讀緊主流學校K2, 但還未開始做早期訓練，今年九月便開始幫他報小學，我都唔知可以怎樣做.  

kmwun

mrsphcheung

唔該晒！近日工作又忙，身體又唔好，所以好少時間上嚟。

mrsphcheung 寫道:
協康會小一班的資料＝〉
中心名稱 : 海富早期教育暨家長資源中心
地址     ：九龍旺角海泓道海富苑海欣閣地下及一樓
電話     ： 2777  5588

[quote]
phoebelamlam 寫道:
我都想知道協康會的小一班的查詢電話,
如果可以可否pm比我呀,
十萬個唔該

[/quote]

kmwun

mamailoveu

早期係到六嵗，我仔仔完咗早期，而家由早期轉番去醫院上PT同OT。

mamailoveu 寫道:
DOUGLASMAMA

多謝你的分享!希望二月頭便可開始接受訓練(因他有快位)就好啦.

Mamailoveu

kmwun

mamailoveu

PT 物理治療 針對大肌肉
OT 職業治療 針對小肌肉

mamailoveu 寫道:
Hi kmwun

請問什麼是PT同OT? 謝謝!

mamailoveu

kmwun

BNC

我知道我仔仔學校有為讀寫困難嘅小朋友考試時做調適，你可以向心儀的學校查詢吓。

BNC 寫道:
phoebelamlam, 請問志蓮小學會有咩特別支援?  我個仔有讀寫困難, 新學期想同佢轉學校, 志蓮都係我心目中o既選擇, 你覺得佢地 D 老師有愛心同耐性嗎?

kmwun

BNC

我聽老師提過學校有為有需要嘅小朋友做放大卷或讀卷，我稔最重要係睇你小朋友有咩需要，同老師傾吓可以點做，針對到至有用，舉個例俾個助聽器個近視嘅小朋友唔會幫到佢架。

我自己就會同學校講小朋友嘅問題，如果學校唔接受勉強亦無幸福，況且瞞得一時小朋友確實係有特殊需要又可瞞得幾耐。你提到小朋友無心機，睇吓可以點幫到佢，例如俾d獎勵，上網搵d得意d嘅補充練習，幫小朋友改善吓專注，俾多d中場休息。總之大家都努力啦，小朋友會知架。

BNC 寫道:
kmwun, 你好, 我仔仔學校o係考試時都有調適, 不過只o係時間加長, 我之前以為還會讀卷; 你仔仔學校有咩輔助呢?

其實佢而家呢間學校對佢黎講太深, 出年想同佢留班, 但係要知道o係原校留班係十分困難, 所以來年想同佢搵間淺一 D, 又有特別支援o既學校; 如果插班面試時, 應唔應該講小朋友有呢個困難呢?  講咗又會唔會被標籤呢?  好頭痛, 因為佢都無咩心機讀書, 可能佢讀黎讀去都唔識係原因.

kmwun

ricky&sara

尋日打好一大篇，點知hang機今日再努力過！7月16日睇吓另一個又係石鐘山收咗嘅小朋友有無時間去tea buffet，如果見到面你地可以互相認識，多個伴。去年嘅輔導老師比較有經驗，我六月註冊後已經收到佢電話，約我7月新生簡介會之後見吓小朋友。我建議你不如主動打電話約輔導老師，我pm個名俾你呀。嗰日我做咗個仔仔嘅file俾老師，簡單介紹吓小朋友嘅性格、有d咩鍾意唔鍾意，同d報告副本咁。

aldemchan

我仔仔今年讀小一，我欣賞間學校早幾年已經主動參加融合教育，有d融合生已經升到高年班。學校嘅老師(起碼曾經教過融合生嘅)會對我地嘅小朋友有一定嘅認識。學校hi tech方面做得唔錯，高d年級會有電子書包、電子白板、無紙美術，好多介紹hi tech小學都會介紹佢地，我仔仔就好鍾意用電腦，我稔佢會讀得開心。每學期一測一考幾合理，真係有學校一年六次，平均個幾月一次，大人細佬都癲。功課量都合理，唔計扭計發脾氣嘅時間，平日夜晚唔使一個鍾可以做完功課。今年開始有一班小一用普通話教中文，仔仔都讀得幾好，我揀係因為考慮讀寫一致，小朋友會掌握得好d。學校有輔導老師，不過年初換咗人，新老師我覺得要俾多d時間佢。校長亦係去年中上任，上任後學校嘅曝光率係高咗。對校長老師嘅印象唔錯。不過我亦聽過有媽咪聽過有人唔推薦依間學校。

始終每個小朋友都好唔同，搵間適合自己小朋友嘅最重要。建議你如果有心儀學校，當然可以上嚟打聽吓；上學校個網址睇吓，例如仔仔學校網址可以去家課冊睇到一年級要做咩功課；直接打電話同校長溝通吓；揀小學嘅時候好多小學會攪簡介會；如果識人安排到可以考慮去新生簡介會，feel吓間學校。返學放學時間去學校門口睇吓d學生，同d家長傾吓計。總之努力！加油啦！

kmwun

BNC

我覺得你先搵出自己又有d咩期望，小朋友有d咩強項、弱項。我去年9月仔仔剛升小一，有一次做功課，仔仔發脾氣，攪到我又發脾氣，，卒之係兩個攬住喊 之後我稔清楚，讀書唔應該係咁嘅，所以決定無功課交就算，千祈唔好傷感情。我會期望小朋友開心返學，合格就ok。另外我地嘅小朋友一般睇嘅接收能力較強，聽指示就較差，有時小朋友上堂唔專心，我建議過老師貼張寫低簡單嘅提示嘅提示卡喺小朋友枱面，有需要就指吓張卡，老師唔使開聲阻礙上堂。不過要考慮小朋友會唔會唔鍾意同學仔見到張卡。我仔仔鍾意用電腦，所以買咗d光碟補充佢玩。起初仔仔喺課室都有攪嘢，老師好好心機介紹一次俾佢知，滿足咗好奇心又講清楚有咩唔可以攪，情況已經好好多。我會明仔仔手肌弱空間感差，寫字會比較差，唯有慢慢嚟，有時用d易記d嘅方法提仔仔，例如公園會有泥土，所以個園字入面有個土字。個別小朋友情況好唔同，你又覺得你小朋友有d咩唔理想呢？

BNC 寫道:
kmwun, 多謝你o既意見同分享, 其實我都毫無頭緒, 自己都唔知需要 D 咩野叫做可以幫到小朋友; o係學習上, 你會點樣幫助同引導你o既小朋友呢?  有無特別o既輔助工具或者器材, 請賜教.

kmwun

ricky&sara

我嘅經驗係學校電話有人接，不過好難搵到老師。有時到老師覆電話，又輪到我唔得閒。而家我同輔導老師多數用email溝通，班主任都好好，有講低佢某日有空堂時間會比較方便聯絡。

ricky&sara 寫道:
kmwun
早期都有三個小朋友入咗,但有兩個無填特殊需要。學校時時打唔通 16／7希望你朋友有時間去tea buffet   

kmwun

BNC

學期初學校輔導老師聽到我同仔仔做功課嗰種慘烈法都有建議我揾補習幫手，我比較好彩暫時仔仔只係寫中文比較有問題。我稔人不礙乎要威逼利誘，我都係捉住仔仔痛腳，唔聽話就無電腦玩、無機打。另外學校有個老師都好有計，生字寫得好下次可以寫少d。試吓可能的話將功課斬件，分一段段短時間做。因為仔仔好鍾意地鐵，早前買咗個地鐵路線掛布，乖就有個thank you印，儲夠thank you印就可以換地鐵站章。唔乖就有sorry印，會抵銷thank you印，目的係要小朋友睇到有後果，唔係無thank you印咁簡單。另外我自己嘅經驗係越唔夠時間先越識分配時間，可以試吓安排d小朋友有興趣嘅課外活動，唔快d做好功課就無得玩。功課真係太多的話試吓同老師傾吓調節數量，例如人抄五次生字，就減到三次。造句可唔可以大人幫小朋友寫，好過大人幫佢作，等佢抄。

我覺得融合都係一個名詞，要睇本質，揀有愛心、接納同有能力嘅學校，當然有經驗的話大家都會輕鬆d，但亦要小心近年有無人事變動會有影響。而家嘅教育制度真係好病態，功課多同深又代表咩呢，學校同家長有無稔清楚咩先至適合小朋友呢，食得太飽都會滯啦！我覺得今日學唔識咪聽日學囉，再講學唔識唔使死，但無咗學習嘅興趣就真係大件事。我覺得揀淺d嘅學校會對小朋友好d，與其擔心日後不如先處理好目前嘅問題。

kmwun

ricky&sara

今朝輔導老師打過電話俾我同我傾咗一陣，佢遲d會覆你。我提咗老師舊年新生簡介會可能太多人又用咪，仔仔嚇到pa咗喺地下，我建議你如果擔心小朋友無耐性會有問題，最好多一個大人一齊去，去到禮堂坐喺側邊，如果真係有需要就帶小朋友出去。如果開始前先同禮堂d老師打個招呼可能更好。

ricky&sara 寫道:
kmwun
我今日打通咗啦 我同輔導老師講想約見佢傾吓仔仔啲問題,佢話佢都係新入職,所以唔知上年係點做,佢要問問校長之後再聯絡我,佢問咗仔仔個名 (我有話識你呀) 而嫁要等佢電話啦

kmwun

羊咩咩太太

我都贊成要同學校溝通，大家有誤會就無謂啦。你試吓同你姨甥解釋有讀障同近視無咩分別，如果有近視無戴眼鏡又唔同人講咁無人會明架噃！

羊咩咩太太 寫道:
ricky&sara

昨天和家姐傾過,原來她可以申請時向學校提出孩子有讀障,學校會有另一方法去interview該批孩子;但係我兒甥唔想disclose自己既問題,家姐解釋緊如果唔disclose,學校唔知佢有讀障,就會當佢係唔用功既學生了!