出通告,好多時都係知會家長,下面簽名果到冇「唔參加」呢個選項,而且好多時唔參加,要畀好多證明,家長費事煩,同埋呢 d 營都係叫「XXX 訓練/全能發展/領袖培訓營」,畀著我做家長都會畀佢去,當係訓練下個小朋友,邊會預料到原來 d 營咁樣(家長果代冇呢類營,所以真係唔知裡面有咩玩同埋班教練原來咁變態)。
d 營好恐怖架,識得令你有 Stockholm Syndrome,洗腦洗到你甘願被教練鬧同埋指導,覺得教練懲罰自己係啱嘅。同埋活動最後會大搞溫情同埋派零食,獎勵同學,所以之前 d 懲罰都忘記得一乾二淨,只會覺得好開心,苦盡甘來。呢點先係令人寒心,同埋點解冇人反映意見。同埋離開營地之前,老師會派問卷,但係果陣咁開心,教練又有獎勵人又善良,自然唔會記得之前有幾苦。我自己玩過咁多年,年年都係先苦後甜,會好容易唔記得教練原來咁變態,仲覺得呢 d 營好好玩(認真,d 設施好好玩,有得攀爬間水,不過班教練就....)。如果唔係呢幾年咁多人提起,我都唔會記得原來曾經我同埋同學畀人咁虐待過!
好彩依家資訊科技發展快同發達,一事傳千里。同埋依家父母意識提高左,換作我父母?我投訴老師,佢叫我反省下係咪自己做得唔好。
我讀 Band 1 女校,幾年前就咁樣被學校強迫玩訓練營,唔參加要向學校證明,如果兩日一夜活動有一日唔得,得果日一定要去,唔去當曠課。同埋女校(尤其小學),被學校訓練到好善良,如果有女兒讀天主教女校都知道,呢種學校真係特別容易出小綿羊,畀人欺負都唔會點出聲。
我地學校回條冇「唔參加」呢個選項,就算捐錢回條都係咁,逼你一定要去做。
同埋呢好似我咁講,唔好睇少 Stockholm Syndrome 呢樣野,小朋友特別容易受影響,然後會選擇性忘記之前教練 d 刻薄事件。因為訓練營尾聲係開心到爆炸,教練都突然變好人、有講有笑,會沖淡 d 刻薄事件,所以好少投訴。仲有入營要沒收手機同電話,所以唔可以第一時間通知父母今日教練幾變態,要等到第二日,但係通常第二日因為好輕鬆,好開心,所以會唔記得。