好苦惱, 可否比些意見 ?

HOT123

細女7歲 (二年班),   由幼稚園開始,  成日個書包都有的唔係佢既文具, 小玩具,  我知有時佢問同學攞,  有時同學主動送比佢.
我已同佢講,
唔可以貪心,
佢話明白又應承唔再攞,
但依然係咁.

而且,
佢重要講大話,   問佢點解有呢個文具,
佢話老師送,
我問多兩問,
佢知騙唔到我,
先講話係同學送.

我地唔係特別有錢,
但佢要既野,
絕對足夠有餘.

佢而家咁細,
已覺得講大話可以騙到人,
咁唔誠實,

我真係好擔心,
有什麼辦法.

Charlotte_mom

原帖由 HOT123 於 15-04-22 發表
細女7歲 (二年班),   由幼稚園開始,  成日個書包都有的唔係佢既文具, 小玩具,  我知有時佢問同學攞,  有時 ...

嗯....我會要求佢俾返晒同學。唔
好令小朋友覺得係懲罰，而係原則上靚文具都係家長買，家長同意送出了嗎？如未經家同意，小朋友唔應該隨便送俾人，父母賺錢好辛苦小朋友要懂珍惜。每個人都應該學識保護自己財物，特別係父母送的禮物係一種祝福。教女女都一樣要珍惜父母送的一切

慢慢黎啦，小朋友係無呢d概念，要解釋架

happy_lavender

原帖由 HOT123 於 15-04-22 發表
細女7歲 (二年班),   由幼稚園開始,  成日個書包都有的唔係佢既文具, 小玩具,  我知有時佢問同學攞,  有時 ...

其實有無想過為何不讓他接受別人禮物呢？正面來看，他收到那麼多同學的禮物，代表他在班內受歡迎，又或社交能力好，可以讚一下。當然我也不鼓勵貪別人的禮物，可否教他回禮呢？若不想花錢，自己畫個心意咭道謝也不錯。孩子接受別人好意及幫助沒問題，只要懂得以正面態度回應便可。

人類是群居的，總有幫助人和需要被幫助的時間，若想孩子將來遇事懂得適時找人/接受別人幫助，從接受同學的小禮物開始學習也不錯呢。

關於孩子說慌，明顯因為你和他的意願不同，但他未懂表達，而又不想被責備，便以慌話瞞騙，這也是正常反應。你不宜過度責備，和他談談他的意願，並表示諒解和接納(接納孩子但不接受講大話的行為。將人和行為分開才容易幫孩子戒除壞行為！)，再慢慢糾正其行為吧！越責備，他越逃避，只會以更多大話來逃避罪責。只有諒解和接納才能令孩子回頭。

HOT123

你咁講， 都好有道理， 我試下用呢個方法再同佢傾下， 但我怕我接受佢攞人地的禮物， 佢會越來越貪心， 第時遇到壞人， 因貪心比人理用……

HMmummy

建議：問佢原因，只係俾個機會佢講大話，索性同佢講不接受同學送禮，退回給同學，你同佢講會向同學媽媽道謝，等佢知不能講大話。

happy_lavender

其實不同的方法也會有效，亦會無效，視乎對象是什麼樣的孩子。但戒除偏差行為的不二法門是將人和行為分開，簡單講就是孩子是乖的，但行為可以是壞的，只要不作壞行為便可，這令孩子知道有改過的機會。

wan_sosin

我個仔有類似情況,成日有同學送嘢比佢,我知佢係因為受同學歡迎,所以一般會比佢收,但我會提醒佢唔好問人攞.
我會叫個仔送返嘢比同學,或小息請同學食嘢,最初我仔都有點不想回禮,但可能我同佢講得多,又叫佢留意返同學鍾意什麼,有機會送回同學喜歡的東西,加上同學付出比佢,都慢慢感染了佢,佢開始會送返比同學,其實都係學社交的一種機會.

你怕佢貪心,第日會受騙,呢樣嘢可以再教,只要佢見到你們父母都是大方付出的人,相信佢總會受你們影響.

Yanamami

其实我好明白楼主既憂慮｡成日見書包筆袋內唔係自己買既文具，好难分得出係同学送吖，个女攞人地吖定佢叫人送俾佢。偏偏呢d事係低小經常出現｡我分得出老師送既都係教協買果d, 同学既通常較精美｡有时佢地甚至話互借文具一个星期

我有同女講版主果番話，話人地父母好錫佢地仔女先買禁精美文具俾佢地，如佢地隨便送俾人唔珍惜，佢父母会唔开心｡我遇过唔少較複雜情况，如同学貪玩，乱禁將其他同学文具調乱，或暗擺入其他同学書包，有時送左俾人又後悔，或mami问到怕鬧就話边个边个要佢送俾佢，如果互借時有乜損坏又要賠俾人……為免瓜田李下，都係唔好再借黎借去，送黎送去，又要回礼禁煩｡受欢迎，好朋友唔需要用物質表達｡佢明白就以後少好多呢d野｡间唔中同学去旅行会買个小小手信俾佢，我就覚得OK.

little_yolky

happy_lavender 發表於 15-4-22 20:15
其實有無想過為何不讓他接受別人禮物呢？正面來看，他收到那麼多同學的禮物，代表他在班內受歡迎，又或社交 ...

越責備，他越逃避，只會以更多大話來逃避罪責  <=== 你好似講緊我哋特首大人咁


他收到那麼多同學的禮物，代表他在班內受歡迎 <==== 真係乜嘢唔好嘢你都可以有正面既諗法, 真係服咗你。



雖然受歡迎係好, 就如其他JM話齋, 驚佢哋自己攞人、問人攞就唔太好。因為始終只有佢哋响學校。我囡囡雖然乖, 但都有呢個問題, 而且, 佢有一個大缺點, 係好鐘意禮物！覺得自己做得好, 就想要禮物, 就算貼紙、簿仔都好, 就係好想收禮物。我第一個反應係：港女！！！！！




我經常告訴她不要常常想著要禮物, 媽媽賺錢好辛苦的, 小朋友未學識賺錢又常常要禮拜, 不應該, 因為那不是自己的錢。不過, 似乎作用不太大。我現在只擔心生產了一個港女出來, 為她以後的男友老公擔心。

wan_sosin

其實咁多咁嘅情況，即是現在初小有咁嘅文化，互送或交換文具！雖然我叫我仔唔好問同學攞，但我唔介意佢嘅同學問佢攞，比唔比佢自己決定，佢從中都可以學點去決定，付出比人還是拒絕人，試過有同學話要同佢交互智能學生証個套，佢無答應，佢返屋企問我，我問返佢，你知唔知同學個媽肯唔肯先，佢當然唔知，我無好肯定咁同佢講好唔好，佢最後無交換到！佢自己都覺得好似未必咁好。
到目前為止，我自己係我仔間學校，未聽過或試過因為呢類文化，而有問題。

wan_sosin

原帖由 little_yolky 於 15-04-23 發表
越責備，他越逃避，只會以更多大話來逃避罪責

小朋友想獎勵都好平常，我試過同個仔講，做得到是應該的，唔一定要獎勵，証明你已經有能力做好嗰件事，我同佢舉個例，我每天煮飯比你哋食，我唔會叫你哋獎勵我，你哋講唔該，多謝我煮飯已經夠，類似嘅生活例子舉一兩個，好快明！
我亦會同個仔開個玩笑，例如，你已經識換衫沖涼，唔通仲要沖完涼要獎勵你呀，你話獎你D乜好呀？獎你沖多次呀？類似又係生活例子，講完佢會同我一齊笑，一齊再講，佢自己都講埋一份，唔通做到乜嘢乜嘢就要獎呀！不過呢D傾偈早在幼稚園時講嘅，初小唔知！

Jane1983

我小朋友K2、K3時，成日書包有小禮物，都係公主鉛筆、假寶石、公主貼紙。因為我女吾鍾意公主，吾想浪費想退番都吾知邊個，所以估計同學仔友善送俾一大班人人，吾至佢一個。

教好小朋友吾好問人攞野，吾好貪心就得。其實吾係好大件事，未去到覺得小朋友的character有問題。

Charlotte_mom

little_yolky 發表於 15-4-23 08:26
我囡囡雖然乖, 但都有呢個問題, 而且, 佢有一個大缺點, 係好鐘意禮物！覺得自己做得好, 就想要禮物, 就算貼紙、簿仔都好, 就係好想收禮物。我第一個反應係：港女！！！！！

介紹你睇一套書
http://www.5lovelanguages.com/

之前上過一個溝通課程, 社工主要圍繞住DR GARY CHAPMAN嘅FIVE LOVE LANGUAGES, 佢話, 原來唔同人有唔同愛語, 點解有人溝通唔到, 就係原來大家愛語唔同 (佢原先係做婚姻輔導, 之後將個THEORY運用到其他人)

而其中一種愛語, 係禮品
原來某D人心目中, 收禮物/送禮物就係愛的表現, 禮物唔一定係金錢物質, 可能你行行下公園見到塊樹葉執黎送俾佢, 佢都會當係寶咁收一世
但在某D人心目中, 服務(ACT OF SERVICE)或PHYSICAL TOUCH比禮物更重要
所以大家溝通唔到就係咁解

幾有趣架, 睇完會對身邊人都認識多左; 鐘意收禮物未必關港女唔港女事呢

Jane1983

回覆 Charlotte_mom 的帖子

我估係咁樣，我小朋友從無扭禮物，連生日、過年都無，話獎勵佢，都吾係特別熱衷。
我吾覺得係佢特別吾貪心，佢都「爲食」的，只係吾覺得禮物係big deal。

Charlotte_mom

wan_sosin 發表於 15-4-23 10:02
其實咁多咁嘅情況，即是現在初小有咁嘅文化，互送或交換文具！雖然我叫我仔唔好問同學攞，但我唔介意佢嘅同 ...

點解我會話小朋友唔識呢D呢....

我個女, 天生樂觀合群, 個個都係朋友, 果時入到間心儀直資, 開心C我啦, 買左好多好靚嘅文具俾佢準備上小一
幼稚園果時, 唔駛帶文具架嘛, 個個書包又一樣, 一上小一, 嘩 ! 幾多姿多彩得架!
開學無耐, 我發現我女D靚靚文具唔見晒, 變左D好核突嘅返黎......原來我女話: 我同同學交換左

心痛啊! 成SET SANRIO靚靚文具咁就無晒, 我無嬲人地個小朋友, 見到人地靚, 想擁有好正常, 問題係點解個女咁隨便就送晒D野出去 (拿, 我亦唔排除有家長會遷怒於同學, 覺得有無攪錯有無家教架, 問人LOR野!)

所以在收人禮物時, 亦要考慮對方家長感受 (可能我唸多左, 但我好怕會令對方留下唔好印象)

wan_sosin

原帖由 Charlotte_mom 於 15-04-23 發表
點解我會話小朋友唔識呢D呢....

我個女, 天生樂觀合群, 個個都係朋友, 果時入到間心儀直資, 開心C我啦, 買 ...

可能我無特別買文具比我仔開學，我仔幼稚園老師送嘅，朋友送嘅，用都用唔晒，筆袋都老師送埋！不過我仔換返嚟嘅都係普通文具，無公仔的，我諗可能佢嘅同學鍾意我仔文具D公仔，但我仔又鍾意嗰D普通無公仔文具，又鍾意用喎，最初開學時，我都叫佢，唔好成日換，最後見佢哋換得開心就算，而家少咗啦，但間中都會話有人送比佢，仲話人哋放係佢櫃桶要佢要，試過有個同學比咗D顏色手功紙比佢，但大家家長都無乜意見，由得小朋友，所以我叫佢，如果知人鍾意乜嘢，有就送返比人！但我相信小朋友再大D,就唔會玩呢D嘢架啦！

Yanamami

Charlotte_mom 發表於 15-4-23 10:40
點解我會話小朋友唔識呢D呢....

我個女, 天生樂觀合群, 個個都係朋友, 果時入到間心儀直資, 開心C我啦, 買 ...

我就喺怕其他家長會有你既感受，所以叫女唔好要人野，就算人地真喺要送俾你，你多謝左人就算。

little_yolky

Charlotte_mom 發表於 15-4-23 10:40
點解我會話小朋友唔識呢D呢....

我個女, 天生樂觀合群, 個個都係朋友, 果時入到間心儀直資, 開心C我啦, 買 ...

唔一定係攞文具。

有一次, 我晨咁早5:30起身整小食俾囡囡返學食, 放工我問佢好唔好食, 點知囡囡話無食過, 但食物盒D小食無晒喎。原來佢一攞出嚟, 四方八面既小蜜蜂飛晒過嚟, 連高年級唔識既小朋友都問佢攞嘢食。


我心諗, 阿囡, 媽媽好眼瞓的, 小食唔係整俾同學仔食的, 但唯有欣賞阿囡既人緣, 同自己既手藝啦, 阿Q精神。

little_yolky

wan_sosin 發表於 15-4-23 10:20
小朋友想獎勵都好平常，我試過同個仔講，做得到是應該的，唔一定要獎勵，証明你已經有能力做好嗰件事，我同 ...

有講道理架, 但依家小朋友好醒, 說話好有技巧。阿囡問你想要某禮物時, 會跟手講：不過我知道咁係唔啱既, 因為嘥媽咪啲錢, 媽咪好辛苦賺錢既, 所以唔駛買俾我喇, 我係講吓啫。

然後再另加一雙柔情似水既眼神望住你, 你見佢咁乖, 又識諗, 又咁可愛+可憐, 又唔係貴.......下加十個理由, 咁你就會中佢圈套, 買咗俾佢了。呢個人, 10次有8次係爸爸, 我大概中2次招咁啦。

小時了了

little_yolky 發表於 15-4-23 12:49
唔一定係攞文具。

有一次, 我晨咁早5:30起身整小食俾囡囡返學食, 放工我問佢好唔好食, 點知囡囡話無食過,  ...

見您講開自己捱眼瞓整小食俾女, 竟然係俾同學仔食晒, 我都身同感受.

話說呢兩個禮拜阿女帶住家"老火靚湯"返學校食晏飲, 點知同組同學一個話想飲, 另一個又話想飲...阿女又好好心地同同學分享, 試過一日阿女好鍾意飲唔記得係咩野湯, 分晒俾同學後佢自己無得飲, 嗰晚對住我係咁投訴同學飲晒佢啲湯, 佢好唔開心,(我都有"吓"咗,因為成"擔"心機煲嘅湯, 竟然俾同學飲晒而阿女無得飲!!!) 之後我教佢以後倒一碗俾自己先, 其他才分俾同學. 依家阿女午餐時有幾個飲湯粉絲架!