有無愉城方方家長？

薳然媽媽

Hi Carmen,

係呀，薳然好鐘意利和希架，但薳然成日ｕｐ唔正佢個名，話袁和希，之前我都問過梁老師，利和希個正名，不過我大肚婆無記性唔記得，所以跟左薳然叫佢做袁和希囉．

薳然件運動服用洗衣機洗無甩色，件校褸呢，因為我見ｄ質地差，所以打電話問學校要點洗，佢話用手洗，然後用大毛巾印乾ｄ，之後先至ｌｏｎｇ，不過我無用大毛巾印乾，就咁用手洗完之後就ｌｏｎｇ，無事播．

您可能件校褸甩色，整到件運動衫染左色．

見呢個星期涼左，我今日比薳然著左冬季運動衫返學啦．

另外，子俊係咪姓保架？　薳然成日話保子俊．
仲有ｍｉｎｇ　ｍｉｎｇ呢，我記起啦薳然話佢叫廖敏明，我覺得好似女仔名咁，我問薳然幾次佢都話係男仔，唔知薳然係咪又講得個同學仔個名唔正呢？

原文章由 子俊寶寶 於 07-10-31 20:55 硐表
hi Tracy & Vanessa,

子俊星期一&二都無返學, 因為咳同流鼻水. 今日好番返左學喇, 今日我接子俊放學, 見到工人姐姐接家睎, 我叫家睎, 但家睎都係無睬我呀, 不過可能係放學時門口太多人, 家睎聽唔到我叫佢.
另外係車 ...

薳然媽媽

Hello Carmen & Vanessa,

好耐無上黎啦 !  生完細b 發生太多事情啦, 無咩心機上黎傾.  呢幾日返工, 因為返工舒服過響屋企對住薳然, 所以可以上網.
細b好曳(反話), 好難湊 (又係反話), 不過家姐仔薳然好扭計, 好反叛, 雖然佢好鐘意妹妹, 但係依家變得成日大大大大喊, 喊親都好嘈, 好令人討厭o個隻, 終於我地頂佢唔順, 咁啱又換左個工人, 新賓賓又唔多理薳然, 我地覺得佢唔鐘意小朋友, 所以由十二月開始比佢返全日班, 但家下請多左一個新工人比薳然啦, 薳然開頭返全日班感覺新鮮, 但依家開始又好似對於返全日班好悶, 老師姑娘成日同我講佢又四圍走, 無時定落黎, 薳然應該覺得太悶啦.  我尋晚問佢下個月唔響學校食飯&瞓覺好唔好, 出去學畫畫學琴琴好唔好, 佢話好呀, 去new school學畫畫, 我話之後姐姐黎接您好唔好, 佢又話好呀, 姐姐同媽媽一齊黎接我啦, 之後又加多一個, 又話daddy都一齊, 姐姐媽媽daddy三個一齊黎接我啦.  

所以2月份開始會比薳然返半日上午班啦, 下午就比佢去學野.  您地有無興趣比小朋友學普通話呀 ?   我問左南豐專業普通話教室, 有兩個小朋友就可以開班, hk$500/4堂.  我已經搵多左一個朋友一齊參加, 依家預算逢星期二 (下午4:30 - 5:30)上堂.  不過覺得2個小朋友上堂會悶d, 您地有無興趣, 有就話我聽啦.   我就去同普通話教室聯絡, 黎緊2月開始學.

薳然媽媽

Hi Vanessa,

真係好嘞, 您都想比家晞一齊學普通話, 咁星期一學得唔得 ?
因為我預備幫薳然安排另一個音樂課程響星期四, 想隔得d日子好d, 唔駛佢連續幾日都要學野, 出出入入咁攰.  
若果您星期一都ok, 我就問吓我朋友得唔得.

我暫時都未決定係咪做working mum, 因為呢排實在太多轉變, 剛巧舊老闆又未ready新business idea, 所以維持現狀先.  但總括來講, 要我依家全時間對住薳然都幾受罪, 佢真係好扭計, 好反叛, 事無大小都喊一餐, 又特登同我作對, 挑戰我, 又特登好大聲嘈住妹妹, 我地相信佢係應該jealous妹妹, 我雖然好小時間抱妹妹, 但係一抱親妹妹, 薳然就發顛, 佢佔有慾實在太強啦, 有時真係想學隔離屋既嫲嫲推個孫出門口, 刪埋道門, 但我又驚對薳然將來有不良影響.  我試過同佢講若果佢再扭計大喊, 我就學隔離屋嫲嫲咁推個姐姐出去, 講過幾次後, 點知薳然同返我講, 我耍出去, 叫我開門比佢走, 我即刻咋聽唔到, 同埋諗, 好彩禁得住自己唔推佢出去, 否則第日大小小, 佢實自己走出街, 依家都唔敢再提話學人推個小朋友出門口.  

依家好後悔炒左個舊印印, 雖然佢臨尾做得差, 但若果佢響樹, 我起碼唔駛照顧薳然咁多, 可以休息得多d.  我地響坐月既時候炒左佢, 跟手新賓又來, 新賓唔好, 唔鐘意小朋友, 做左幾日我老公就唔耍佢啦, 但我真係承受唔到又再耍教多一個新人, 尤其係我正直坐月時候, 依家新賓做左一個半月嘞, 我地都決定唔要佢, 依家著手搵過一個, 有時佢蠢唔識唔緊要, 但係佢根本唔鐘意小朋友, 尤其係女仔 (因為佢有3個女, 最細個女同薳然一樣大), 又懶, 又野又慢, 有兩次9點幾同我講話頭痛要早d瞓, 我都算, 但好幾次, 我帶薳然出左成日街, 返到屋企佢一d家務都無做到, 搞到成個書房都係衫, 亂七八糟, 我問佢, 佢話妹妹成日無瞓, 佢熨唔到衫, 第一次我都信佢, 第2,3,4,次, 我老公就'興'嘞, 同我講話佢無能, 做小小家務都做唔到, 又搞到d野亂哂龍, 咁我就問佢點樣安排工作, 同話佢聽有d野可以唔駛日日做, 點知佢唔開心, 想喊, 我問佢咩事, 佢話覺得我閙佢, 我真係想死, o個一次之後, 我就打算唔要佢啦, 我根本無閙佢, 我只係同佢一齊商量點樣安排好工作, 第日下下佢喊我就唔得了.  另外, 同佢出街, 成日照鏡, 抱住妹妹都係咁照, 照到個鏡都爆咁濟, 有次我幫妹妹響育嬰間換片, 薳然係樹搞水喉, 佢無理薳然, 但就係咁照鏡.  尋日睇眼仔, 見到佢單手抱住妹妹, 單手攞左薳然塊玩具鏡黎照. 原來d賓賓真係咁衰, 依家黎一個新印印就好好多, 自動自覺, 幫我做左好多野, 乖好多.  我依家要換都係要換賓, 但會搵未結婚o個d, 同要鐘意小朋友o個d.  希望快d搵到, 唔駛我再煩落去.

原文章由 lsw0316 於 08-1-17 00:53 發表
Hi Tracy,

您終於出「山」嗱!
我都估您生完細B 會好忙o架啦, 所以都唔敢打電話俾您, 等您忙完先傾.。 呢排我細仔要求由姐姐送午餐，因為學校訂嗰啲飯太難食，以前放學成日話肚餓，自從改咗食企飯之後，細仔放學都無咁餓鬼 ...

薳然媽媽

Vanessa,

原來家晞近來都有大喊, 真係唔知佢地搞咩鬼, 薳然d喊聲好大好大, 我怕佢嘈醒妹妹, 所以關埋佢道房門, 由佢喊, 但係佢d喊聲可以令到成間房震哂, 令人好困擾, 試過連續好多晚, 佢每隔一個多鐘就大喊一次, 我同我老公幾晚都無瞓過, 因為妹妹飲完支夜奶, 跟住薳然喊, 我地搞到薳然瞓返, 跟住輪到妹妹又飲奶, 真係好辛苦, 我覺得我可能有小小產後抑鬱.  返左工好好多, 同多d同事傾多d計, 無咁煩.

您自己揍家晞都好呀, 可以同佢一齊多d.

另外, 您地早前話出左門d小朋友無掛住, 我舊印印走左之後, 薳然都無問過, 因我地見o個排開始成日大喊, 就試探問佢auntie去左邊, 睇吓佢係咪掛住舊工人, 但唔識表達, 點知佢無咩反應, 只係依家新工人黎左負責照顧佢之後, 佢先問我auntie去左邊, 我話佢返左屋企, 點知佢話, auntie will come back later.  另外, 我入醫院生bb幾日, 薳然都無問過我去左邊, 但佢o個幾日好乖, 無扭計, 我諗依家d小朋友係唔掛住照顧佢d人架啦, 真係無良心 .

薳然媽媽

Vanessa,

其實印印都未必蠢過賓賓架, 我屋企件肥賓都唔醒, 反而舊印印&新印印仲醒目好多, 做野乾淨利落, 快手快腳, 又識得幫我地跟頭跟尾, 件肥賓淨係識得食.

薳然喊時, 我地實有陪住佢, 我試過同佢一齊大喊, 仲同佢鬥大聲.  但真係好傷身, 所以依家佢喊, 我採取不理會方法, 或者等daddy望住佢, 因為可能我啱啱生完,  賀爾蒙有d失調, 又食左補品燥d, 禁唔住自己d皮氣, daddy陪薳然呢, 就即刻收聲, 所以呢排由我老公睇薳然多d.

至於陪薳然, 若果薳然係屋企, 我地真係全時間陪薳然, 除非佢嘈聲妹妹, 妹妹叫, 我地至會輪流抱妹妹, 但一定唔會有一個人忽略薳然, 查實妹妹係唔喊同埋唔扭抱架, 佢要夜奶都係叫幾聲, 都無嘈醒過薳然, 只係薳然成日嘈醒妹妹, 由出院至依家, 都係大喊過唔超過5次, 每晚七點後, 妹妹多數瞓左, 我地就困妹妹響房關上門, 我地可以陪薳然, 妹妹真係讓哂比薳然架, 我仲有時覺得對妹妹唔住添, 因為我地都好忽略妹妹.  我成日同薳然講, 妹妹好可憐架, 佢成日比我地困住響房, 無人理佢, 又唔可以次次同我地一齊出街, 薳然幾幸福, daddy媽咪成日帶薳然出街, daddy媽咪幾錫薳然, 薳然要錫妹妹, 講過好多次, 佢都係點頭,  但係每次都接受唔到我地抱妹妹, even好短暫.  所以我覺得薳然既佔有慾好強.   之前梁老師同我傾計, 我話比梁老師聽薳然成日喊, 梁老師幫我問佢點解成日響屋企喊, 佢垂下頭唔出聲一會, 跟住就話媽媽抱抱妹妹.  我依家都同薳然講妹妹依家唔識行, 唔識得坐, 又唔識得自己搾奶樽, 所以要我地抱抱, 薳然係大bb大個女好叻, 識得行識得走, 所以媽媽會遲一陣抱薳然, 第日妹妹大個左呢, 就會行, 就可以同薳然一齊玩啦, 薳然聽到笑微微, 但過後又控制唔到自己.

哈哈, 我都知嗰啲晦氣說話唔好, 但真係忍唔到架, 尤其係對住左佢一日, 但依家返左工又好d.  不過總括而言, 薳然都係超級麻煩友, 我帶左佢去做game therapy, 佢響街就好正常, 但返到屋企就多數會發顛, 唔知係咪屋企唔乾淨, 因為上次我家姐個囡囡 (3個月bb)晚上黎我度, 一入屋就喊, 喊到走咁濟, 我家姐話佢未試過咁喊法架, 又有連續好多晚薳然半夜半夢半醒喊得好淒涼, 拍極佢都唔醒, 之後我陪月話可能d污糟野, 我又唔得閒去幫佢祈福, 咁就每晚同佢祈禱, 祈左禱又無事囉, 係咪好得人驚呀.

至於普通話, 我會安排, 有最新消息再通知您.

薳然媽媽

Vanessa,

尋日去左普通話教室攞左d 報名表啦, 我會放響薳然返學個交收袋, 麻煩梁老師幫我放響家晞個交收袋, 咁我地就唔駛左約右約去攞form啦.  您收到之後, 請您填妥, 然後直接去交報名表&費用 (地址: 南豐1006室).

自從我返左工之後, 薳然好似好左D啦, 之前梁老師都話我返左工之後, 薳然會好D, 但我起初諗住好D既原因係我分散左D注意力, 依家發現原來薳然自己好D, 無咁惡C啦, 仲好錫妹妹, 我諗諗吓之前薳然咁扭, 可能係覺得我無返工, 成日係屋企對住妹妹, 錫哂妹妹, 依家有返工, 有得同等比較, 確實係我地對住薳然時間多好多, 佢自己都一定FEEL到, 所以佢乖返.   之前佢成日係我地面前扮錫細妹, 但依家會學我地坐響妹妹旁邊陪妹妹, 又幫妹妹拉個音樂公仔有聲出, 之後仲會話: 妹妹多謝家姐幫您拉啦, 都幾好笑架.  一早起身第一時間就問妹妹呢, 唔見妹妹響廳呢, 就四維去搵妹妹.  雖然薳然依家都有扭計扮野, 但已經軟化左好多, 之前C到唔肯認錯講對唔住, 好硬頸, 依家扭左一陣會話對唔住, 希望佢繼續好落去.  不過有時真係會小器O個喎, 好似話妹妹唔喊唔扭計, 呢幾日返左工成日同同事傾計講開都話妹妹好湊, 話口未完, 妹妹今日飲奶奶扭計, 仲喊得都幾惡喎, 唉, 已後都唔敢讚佢囉.  

原文章由 lsw0316 於 08-1-19 00:41 發表
Tracy,

聽妳咁講，其實妳可以做嘅都已經做晒囉喎，薳然真係妒忌心好重，同埋始終佢仲細，講道理佢雖然明，但自己又控制唔到，妳同妳老公真係要俾好多耐性教佢先得，不過，呢種情況又唔係得薳然係咁，好多時兩姐妹/弟差距細都會容易啲 ...

薳然媽媽

Hi Vanessa,

講開寫日記, 我之前都有幫薳然寫架, 寫到兩歲半, 因為薳然太癡身, 所以終斷左lu.  依家都想幫妹妹做返個website, 但邊有時間呢 ? 薳然一響屋企, 就真係邊個都唔得閒.  依家薳然成日呷醋, 第日大個佢自己睇返我幫佢做既網頁 & 日記, 佢就真係知媽咪同佢做既野多過妹妹好多.  

係呀, 之前聽您講您細仔好乖, 好錫家晞, 原來佢心裡頭都有比較, 好彩佢大個, 懂得開口講, 起碼您知道發生咩事, 唔駛好似我咁估估吓, 咁您有無坐底慢慢解釋比細仔聽, 您呢排無返工, 都係想對佢多d時間架 ?   希望佢明白您既心意.  其實到依家我都係覺得做全職媽媽對小朋友既發展好d架, 不過好矛盾呢, 我唔返工薳然就扭我, 或者遲吓睇吓點.

我都好期待家晞同薳然一齊上普通話呀, 我估佢地唔喊架啦, 呢排我都成日帶薳然出去試堂, 每次都係要放低佢自己一個, 我同佢講話我係門口等佢, 叫佢記得落堂一定要出黎搵我, 我響門口等佢, 佢都玩得好開心, 佢地依家大過左, 會好獨立架啦.  況且家晞同薳然都一齊上堂, 慣左有伴.  第一堂, 我會請假帶薳然返, 到時我地可以落去m記傾吓計lu.

家晞依家有無瞓晏覺呀 ?  薳然響學校有瞓晏覺, 以前只係得舊工人可以搞得掂薳然瞓覺, 若果佢下個月轉返上午班, 我都唔知佢瞓唔瞓晨覺架, 尤其係新印印添, 若果佢唔瞓, 我驚佢下午扭眼瞓, 上堂唔知點算啦.  薳然好衰架, 係我地面前, 佢唔鐘意依家個印印呀, 佢唔肯比新印印幫佢換校服, 依家都係daddy幫佢搞返學d野, 又要賓賓幫佢束鞭, 點都唔肯比印印掂佢, 連印印行過佢身邊都唔得, 仲話姐姐走啦, 唔好過黎呀, 又試過指住新印印同我老公講話:我唔鐘意佢呀, 又試過推開印印, 比我地教訓過佢好多次, 都係咁, 最多之後又對唔住姐姐.   但係放學呢, 無我地兩公婆時, 佢就肯同工人玩, 肯拖住工人, 薳然真係好衰架, 好玩野.  

原文章由 lsw0316 於 08-1-22 01:09 發表
Tracy,

收到張報名表啦，諗住聽日趁家晞返 phonics 班時去交 form，唔該晒﹗ 好期待薳然同家晞一齊上普通話班，希望到時家晞見到薳然一齊返學肯自己上堂，唔好喊咁耐啦﹗我最驚家晞影響埋薳然同埋另一個同學仔，到時唔好意思囉﹗

...

薳然媽媽

Vanessa,

薳然有d係因為爭寵, 所以要賓賓, 但其實薳然開頭見個印印時, 佢自己話鐘意佢架, 呢個姐姐陪佢玩好架, 開頭幾日都肯同姐姐玩, 但係之後又唔鐘意跟佢, 我見可能係印印太過殷勤, 薳然呢就有d"扭檔唔值錢"既性格, 所以玩野囉, 反而賓賓成日都唔理薳然, 但薳然成日去撩賓賓, 但賓賓都只係當薳然係路人甲, hello一聲就行左去, 我老公因此好唔滿意個賓賓.  不過早兩日我突然諗起, 可能印印講廣東話d聲唔好聽, 又諗起以前工人一路都係同薳然講英文, 所以前晚同印印講叫佢試吓同薳然講英文, 睇吓薳然會唔會接受多d, 點知真係得喎, 薳然對返姐姐好d, 尋日仲叫姐姐幫佢沖涼, d小朋友真係奇怪, 學您話齋, 好固執同唔鐘意人打亂佢地既routine.

我睇返您之前d post, 您最近帶過細仔去日本玩, 佢應該會覺得您好重視佢架, 因為您都無帶家晞&大哥哥, 可唔可以提醒佢呢件事&其他您對佢好既事情, 等佢唔好成日記住您錫家晞.  不過其實您囝囝真係好矛盾, 可能佢自己都好辛苦添, 或者真係多d同佢傾計啦, 唔好等佢諗埋一邊.  又希望佢氣管好返哂啦.  係啦, 成日對住真係會多d機會產生磨擦, 您努力d搵工啦.  查實有無聽過樂施會呀 ?  有d part time 文職job, 如咩咩coordinator等等, 唔會太困身, 且可以揀時間架, 我有個舊同事依家做緊, 不過人工方面都唔清楚ok唔ok, 但勝坐可以有份工, 有d勢藝.  我都周不時上去佢地個website望吓, 睇吓有無啱自己既機會, 您都睇吓啦.

妹妹同薳然一模一樣架, 但係係開心版, 成日笑架.  我有次攞住薳然幅bb相問佢邊個黎架, 佢都以為係妹妹, 佢都話自己同妹妹似樣.  妹妹一出世, 我見佢同薳然一樣樣, 好開心, 心裡頭諗第日大個d, 兩個著埋同一樣衫, 成對twins咁.  我無幫妹妹曬相出黎呀, 不如您比email address我, 我e比您睇呀.

上幾個星期開始, 我耐唔耐就同薳然講下個月唔響學校食飯瞓覺, 去新學校學野好唔好, 佢話好, 有一次佢話要學phonics, 查實我之前無同佢提過學phonics架, 唔知係咪佢見家晞&其他同學仔有得學? 唔知係咪佢地傾計話比薳然聽學phonics呢 ?  定係梁老師話佢聽呢 ?  我見學校有d drama學, 都想比薳然學, 但咁啱佢返全日班, 我覺得又比全日學費, 又比學drama費好唔抵, 所以無報名, 希望會再開班啦, 我就會報名嘞.  

2月4日見, 到時大把野傾.

原文章由 lsw0316 於 08-1-22 18:48 發表
Tracy,

妳好似係話請個印印返嚟係照顧薳然，反而薳然唔鍾意佢呀？ 可能佢知賓賓係照顧妹妹嘅，所以都一定要賓賓幫佢做啲嘢等妹妹唔可以獨佔賓賓啩？ 佢咁樣都可能係爭寵嘅表現，唔係真係唔鍾意個印印姐姐嘅，如果肯定唔係印印 ...

薳然媽媽

Vanessa,

您想唔想同社工了解吓細仔既情況, 係因咩事呀 ?  小童群益會有個社工, 佢好犀利架, 能解大部份難題.

早前薳然發顛, 我同呢個姑娘講薳然既情況, 佢幫左我好多, 我依家帶薳然去呢個社工做game therapy, 今日係第5堂, 要做6堂架, 做完之後, 佢會評估薳然有咩問題 & 提議我如何教導薳然.

呢幾個月薳然成日響屋企佢自己個鞋架學老師掉d鞋落地, 每掉一對就講一個同學名, 佢應該係學老師派鞋放學, 我同老公睇見佢覺得佢好似short short 地咁, 有d擔心, 跟住我問姑娘, 姑娘話好正常兼仲係好事, 因為佢自己玩緊 (以前多數要人陪佢玩, 依家都叫做自己玩), 做緊role play, 小朋友快則3歲玩role play, 有d成5歲故仲玩, 不過佢玩鞋仔就污糟d.  另外, 佢都成日攞屋企個mic, 學老師放學叫: bb班咩咩咩, k1咩咩咩, 我地起初真係覺得佢有問題&好無撩.

若果您都想搵個姑娘傾傾, 話我聽呀? 我比佢電話您.

薳然尋晚又話學phonics喎.  家晞響學校學得好唔好呀? 我比較過, 學校收既學費唔太貴, 下次有機會都會幫佢報名.  我可以想像得到家晞入門口喊個情況, 之前薳然都係咁, 搞到我都想喊架.  您試吓同家晞哂佢會驚既情況出黎, 等佢release左ｄ不安出黎，之前小童群益會個姑娘教我架，好有效．

妹妹叫梓穎，英文名Trini, 本來想改”津然”架（可以跟返家姐個然字呀麻，但師傅話八字唔夾囉，我老公英文名係ｅ字行頭，　所以薳然叫Evelyn, 我英文名T字，所以妹妹叫Trini.  一人跟一個　：）

我今晚ｅ妹妹ｄ相比您睇吓！

您來年會唔會幫家晞轉學校呀 ?   我多數都轉架啦, 聖心 & St. Clare's 收左薳然, 協恩就waitlist ( 薳然都算好叻架啦, 有得wait, 因為有2千幾3千人報名, 佢地只收60人).  依家問緊同事聖心好d 定St. Clare's好d.

薳然媽媽

Vanessa,

嘩, 您好勤力呀, 考試考成點呀 ?  

家晞扮老師教書好呀, 起碼正正經經, 薳然都唔知點解要扮攞鞋, 扮叫mic, 所以我地覺得佢畸畸地, 以前開學初期都扮祈禱都好呀, 但妹妹出世後就扮埋d奇怪野.

哎呀, 原來妹妹個名都好普通架, 今期媽媽寶寶登左有個小朋友又係叫梁梓穎, 正係連姓都一樣, 不過係男仔, 之前我地帶薳然去馬鞍山公園玩, 又聽到有個媽咪叫自己囡囡個名做梓穎呀, 我即刻望住我老公, 我老公話查實個名都好多人叫.  

您個名又一個穎字架, 咁就真係好橋啦, 因為幾年前有個同事 (同我一齊拍住做野), 叫做Vanessa, 佢個名又係有個穎字架, 我同佢好夾架, 佢係上海妹黎架, 好聰明, 但好純, 不過早幾年返番上海lu, 所以當初我一知您叫Vanessa, 我就覺得好有親切感.

之前同事見薳然bb時對眼型好長, 都話薳然對眼會好大,  但係妹妹好似無薳然對眼咁長架, 嫲嫲一見妹妹就話, 妹妹對眼無家姐咁大, 多謝您祝妹妹健健康康，快高長大﹗

家晞呢排有無唱拜年歌呀 ?  薳然成日響樹唱, 其中有幾句歌辭好似係 "新年新年新年, 手拉手去拜年, 恭祝爸爸媽媽身體好, 恭祝小朋友們做個好寶寶" , 真係啱聽.

接家晞放學時, 您有無留意玻璃窗d手功呀 ?  有家晞做既福字揮春呀, 快d帶家晞去睇吓啦, 記得影相留念喎, 上星期我湊薳然放學時見家晞個揮春, 又見到利和熹等等, 但搵極都搵唔到薳然o個個, 起初仲以為緊係佢做得唔靚, 無得貼堂, 但係我唔甘心, 繼續搵, 點知原來薳然o個幅貼正響我面前, 不過癡住響塊玻璃窗度, 留意唔到, 哈哈, 好開心, 跟住即刻幫薳然用手機同佢影左幅揮春相.

尋日薳然放學返屋企後, 發現老師比錯左個書包薳然呀, 薳然攞左陳凱薏個書包返屋企, 跟住薳然好唔開心, 我放工返屋企後, 不斷喊咁口問我佢個書包去左邊, 我就不斷同佢講老師比錯左囉, 聽日等老師幫您同陳凱薏exchange啦!  點住佢猛話陳凱薏攞左佢個書包, 又話要陳凱薏比返個書包佢, 我驚佢誤會跟住唔鐘意陳凱薏, 咪猛同佢解釋, 係老師將佢地個書包掉轉左, 唔關陳凱薏事, 又問佢陳凱薏個書包響邊個度, 佢又話響佢度, 咁我咪話係囉, 您都攞左陳凱薏個書包啦, 聽日等老師幫您地交換啦, 唉, 薳然長氣度c, 問我問左成個幾鐘, 我又答佢答左個幾鐘, 佢呢個幾鐘都仲係喊咁口架.  都唔知佢係咪咋嬌.