開始灰....我覺得我好似有點不自量力 !

1998Ruby1998

唔好咁容易灰心。你仔仔依家最需要係一個指路明燈同埋少少扶持／鼓勵。如果果陣我父母肯對我有少少信心同埋鼓勵，果三年嘅折磨其實應該冇咁痛苦。

不如搵個夜晚大家一齊坐低，落張紙出黎，寫低留港同出國嘅利與弊（先撇開所有個人情緒），然後三個人都各自準備一份 proposal 同埋一份心底話嘅信，如果留低香港會點計劃，去外國又點計劃，需要用幾多錢，幾多時間等等。如果要出國，邊 d 地方可以節省。呢個時候可以坦然畀仔仔知道父母份人工幾多、存款幾多，屋企各樣開支雜項要用幾多錢，一齊衡量。我阿爸都係畀我睇，要我清楚家庭狀況，咩計劃會比較對父母同自己都公平同開心。封信就可以表達自己嘅難言之隱，有時候講唔出口／未來得切講已經畀對方窒，可以講述心中感受同疑慮。點解咁多人會選擇寫信畀父母，因為面對面，有太多因素影響傾談內容，未講可能父母已經唔想聽。

呢個方法我同父母、同學都用於唔同地方，始終寫出黎，個個都明白對方觀點並可以質詢／欣賞。用口講，好容易越講越滲入個人情緒，會暴躁、頹廢，甚至發生爭執；用手寫，畀自己同其他人多 d 時間去衡量同思考，冇咁容易嗌交。