本帖最後由 khmama 於 12-4-21 23:49 編輯
眨下眼又快到大抽獎既時間, 與其買六合彩咁俾6個冧把家長, 倒不如討論填表既策略先係上策.
甲部填表唔限地區但好少位, 只需選3間唔差過乙部第一志願既學校就可以啦. 因為甲部中咗獎就冇得抽乙部, 有o的家長唔識填, 以為要填得好似乙部咁穩陣, 填咗間差既結果錯失乙部抽獎機會. 如果真係填唔到3間, 可以留空, 唔使勉強填. 有o的考生一定抽到入直屬/聯繫中學既, 因為band1生少過直屬/聯繫位, 咁甲部就一定只可以第一志願填直屬/聯繫中學, 其餘兩個志願唔好填. 至於區內band2生, 有機會係全港既band1生, 尤其係強區會有呢個情況, 咁就要利用甲部搏入band1尾學校. 至於乙部填表其實分為3個部份: 選校, 執雞同包底.
選校既意思係指選擇頭3志願. 家長必須要清楚遊戲規則係講運氣, 除此之外, 亦取決於區內各band學校既數目, 所選學校有冇直屬/聯繫小學, 學校學額數目,男女分配等等. 雖然抽獎唔分band頭,中定係尾, 但係程度唔適合既中學, 搏到都未必係好事, 要小心去選擇. 當然校風亦係其中一個重要既考慮因素.
各區都有熱門既中學, 如果有直屬/聯繫小學既, 競爭會較大, 因為小學既band1生多過直屬/聯繫位的話, 就會同區內既band1生爭非保留既位. 如果選擇男校或女校, 亦少咗人同你去爭. 第一志願可以選一間最心儀又合適既學校, 既然係靠運氣, 就唔需要太多顧慮驚個number唔靚. 第二志願要比第一志願較次既本區學校或他區學校, 但千祈唔好選o的好熱門既學校, 因為部份學校抽完第一志願已經冇位比第二志願抽. 第三志願又要再次之. 大原則係3個志願抽到邊一個你都唔會去叩門, 如果抽到第三志願間band1尾你會唔鍾意走去叩門既, 倒不如搏一間他區你會滿意既學校. 當然你唔介意騎牛搵馬又作別論.
選完頭3志願就到執雞既時候, 好多時家長都冇做呢個步驟. 首先band1家長切記唔好咁快填band2學校, 因為band1生派完先到band2生, 就算你將間band2學校放第三十, 都一定早過band2生第一志願入. 而一間學校收得band2生, 又點會有band1生入唔到反而band2生入到? 呢樣係唔合羅輯既. 所以band1生最差只會派去第一間所填既band2學校, 放前o的只係提早玩完抽獎, 冇特別既好處. 既然係咁, 何不填埋其餘既band1學校先, 睇下有冇得執雞? 好多家長常常覺得頭3志願抽唔到, 後面o的學校抽到都唔慌好, 呢個係一種誤解, 唔好介意抽到第幾志願, 如果第8志願抽到他區band1中上既學校, 唔見得會差過本區第3志願既band1尾學校. 而且呢個步驟對於運氣欠佳而碌到第3志願之後既家長無疑係一種垂死爭扎, 好過坐以待斃等叩門. 分分鐘有意外收獲. 如果連執雞都執唔到, 起碼你已經努力過, 知道確係冇晒band1位, 只係輸運氣唔係輸策略, 都甘心o的.
最後係包底, 上面講到band1生只會派去第一間所填既band2, 只要最尾用幾間band2學校包底就可以啦. Band1生千祈唔好填band3學校. 而三十個志願最好填晒, 唔好填幾個就算, 如果派唔到就會等band1, 2, 3考生都派完, 先會求祈睇下邊間仲有位派比你, 一定係band3尾. 至於band2生, 其實填完band2學校可以先填下他區band1有冇位先填band3頭學校, band3中至尾既學校大可以唔使填落去, 呢o的學校派到都係去叩門, 不如向上搏, 好過向下搏. Band3生亦係一樣, o的勁差既學校你去叩門都即收, band3尾既學校不填也罷, 向上搏下band2好過.
| 
發表於 12-4-14 23:41
