懇請高人指點：孖胎分開抽，多個機會嗎？

cherishbaby

我對孖女，每人只有基本15分(兩人均有首名子女分), 本身唔係想入名校，只想多個機會抽中心儀首選小學。身邊朋友話孖胎分開抽可以多個機會，叫我將兩人全部排位相同(當然包括三條一，以備日後叩門), 如果好彩就兩個一齊入，一係就齊齊唔入，各散東西(當然要有依個最壞打算)｡ 如其中一個好彩入到首/較好志願(如：姐姐是幸運兒) ，就帶妹妹去叩門，因為家姐入咗，妹妹叩門成功機會較大。起碼好過兩個綑綁式大抽獎，一個唔好彩抽唔到，兩個一齊去叩門，要學校一齊收嘅機會好微。

或者，分開讀一年，下年妹妹再去考插班，因為姐姐讀緊，妹妹成功機會比小一叩門大啲。

以上諗法唔知有冇錯呢？ 懇請高人指點，萬分感激！

cherishbaby

非常感謝大家意見！其實我身邊不同朋友/同學仔家長都跟我講我孖胎"有著數"﹑多個機會，我一直唔明，點知最近去聽某區名校講座，跟該校主任傾，我話擔心如果兩個小朋友綑綁式一齊抽，結果抽得唔好，兩個一齊叩門，學校好難一齊收，個主任就話，如不幸要叩門，即使孖胎，都會獨立睇，未必一齊收。建議我可以考慮分開抽，即多個機會(每人獨立一個號碼、一個機會), 如果有一個入到，就帶另一個去叩門，佢話佢哋間學校多人爭未必一定收，但其他學校會有機會。

另外，亦可以分開兩個讀一年，第二年再考插班當中心儀/較理想嗰間小學，主任話到時因為有一個讀緊，考插班嗰個學校係"冇得唔收"(即一定要收)｡

我聽完先開始明，點解話孖胎有兩個機會。我都有再打電話問過教育局，孖胎可唔可以分開填(但選擇完全一樣) ，唔綑綁式(表格唔互填對方號碼), 起初職員唔明點解要咁做，佢亦認為冇特別好處，但我話咁會有多一個機會，佢就冇再出聲，只係提醒我，有機會叩門時要向學校解釋，點解唔一齊抽。。。。。。由於只係一間學校嘅主任咁講，唔知實際情况如何？所以希望有經驗人士指導一下。謝謝！

cherishbaby

謝謝大家意見！但如二人一齊抽，也有機會一齊抽得唔好，都係要一齊叩門。分開抽(但選校次序完全一樣) 亦有機會一齊中獎。。。。。。一切都係要睇二人運氣。。。做父母真難決定呀！

cherishbaby

回覆 nkf 的帖子

(1) 該主任意思係，佢知道有某啲學校係會因為您有一個收咗，而收埋另一個。但佢嗰間係名校，多人爭，就唔會寫包單。
(2) 決定得分開抽，父母一定要承擔最壞後果，就係兩個分開讀，辛苦嘅後果必然要自負。朋友話當然如果大家抽到嘅分別都係較後志願嘅學校，大家一齊去返首志願(相同三條一嘅小學) 叩門又唔成功，就唯有去其中一個抽得較理想嘅學校為另一個叩門，起碼都有得揀，加上如果嗰間係一般嘅非熱門學校，未必會睇三條一，見到有一個收咗，好大機會會肯收另一個叩門，係轉折啲，但都有機會可以同校讀。

cherishbaby

回覆 nkf 的帖子

補充一點，當日名校主任，話插班"一定要收", 我都好懷疑，但佢真係笑得好隱晦咁再次答我"我哋係冇得唔收！", 我諗插班當然一定要考試，但可能某程度上係要優先考慮，甚至必收。
後來，我亦去過另一間差不多Level 的小學聽講座，直接問校長，如有一個入咗，校長話另一個叩門就睇情况啦，至於第二年插班都係要考㗎，但佢就冇正面回答是否有較大機會被取錄。

cherishbaby

非常感激各方意見和分析。由於我兩個小朋友性格好唔同，一個文静、一個活躍，綑綁式選校對佢哋亦未必係好事，加上如抽首志願失敗，相信想揾其他學校肯收晒兩個叩門機會唔大(因為面試都要講天時﹑地利、人和) ，所以我先有此憂慮。

cherishbaby

回覆 Babyarsene 的帖子

首先多謝您嘅寶貴意見與祝福。冇錯，我兩個小朋友性格好唔同，真係有朋友建議我應該因應佢哋性格分開選校、分開抽，我亦明白分開讀，父母會好辛苦，所以我一直希望揾間中融、唔好太谷，盡量能乎合二人需求嘅學校比佢哋一齊讀，其實我想首選嘅只不過係區內二線學校，聽聞動静皆宜，加上壓力唔算大，所以深得一批唔想太辛苦嘅區內父母垂青，所以即使係二線學校，亦唔一定中獎(因為去年都識人抽唔到) 。正因如此，亦可能我過份悲觀，加上又不懂各項選校數據分析，不懂命中率推算，所以才作以上"最壞打算", 並希望各位同路人/有經驗人事給予意見。
經大家意見分析，我會同老公好好考慮一下(仲有十幾日嘛),  總之依家盡量走訪、參觀區內所有心儀/非心儀學校，將來即使抽唔中，又叩唔到門，都唔駛對間要入讀嘅學校一無所知。

cherishbaby

回覆 siuming23 的帖子

哈哈！我都想知，不過可能每間學校情况唔同，我問其他學校又無人咁"肯定式"答我，所以我諗都係因校而異，加上插班﹑叩門都要講天時、地利﹑人和，撞正小二學校冇插班位，就算有兄弟姐妹讀緊都冇用。