停課日－不吐不快

jujuliawong25

我太太本來對黃耀南呢間學校好有期望，不過紅雨一出，沖走我唔少信心．
話說星期二落大雨，我太太如常送細路返學，返到學校無耐就紅雨又停課，我太太打黎同我傾問我點好，我話咁大雨去得邊，咪繼續留係學校囉，學校仲唔夠安全咩？隔咗陣，十點幾我亞媽打黎話班主任打比佢同佢講話學校早放，十一點半去湊走細路放學，我話唔係下馬，咁大雨你去湊放學？老人家真係走咗去湊放學．放工返去見佢已經話頭暈身慶啦．

問返細路話比我兩公婆聽話好多同學仔都無返學，上上下堂就係副校長宣佈話提早放學，叫細路打電話返屋企睇下有無人湊，開頭仲話可以比細路自行放學返屋企！之後問返其他家長嘅細路無屋企人湊嘅點，原來係係活動室睇卡通片．

我本來都唔想打字，但我心中有幾個疑問．紅雨叫停課係遲咗，但送晒返去嘅，應該留係安全地方，點解唔係留到正常放學時間先一齊放學？一見黃雨就叫細路返屋企提早放學，突然又轉紅雨，細路回程嘅安全，家長出門嘅安全，學校有無諗過去湊放學嘅人嘅安全？早早送走晒啲細路返屋企為乜呢？實有人睇住？仲要比細路自行放學，淋住雨返屋企？留係度嘅細路，點解係睇卡通片嘅？細路係就係好開心，但點解唔係做啲學習活動嘅？電視都有播其他啲學校唔教書都做下學習活動，究竟邊個話睇卡通片嘅？

我真係好唔明！

jujuliawong25

回覆 siden 的帖子

咁講丫，分級睇ETV，中英數常煲劇咁煲，會唔會比睇卡通好啲呢？
睇卡通梗係唔會壞腦，只在於係咪教學活動嗟，叮噹都好有教育意義嘅

jujuliawong25

回覆 20000508 的帖子

課後嘅取消係合理嘅，天氣許可時當然早啲走無可厚非，真係有困難嘅，學校亦講明繼續開．如果有人主動湊走又唔當早退，咪由得佢走囉，家長負全責．但聽你咁講家長去到唔比走就有點兒那個．
但學校打黎叫人湊走，就同我去學校主動湊唔同晒啦～

jujuliawong25

仲有，聽阿媽講，有啲同學仔仲拎埋佢地盒訂飯走，留係度嘅就十二點未夠就開飯，平日起碼十二點半先開得飯．有啲走咗無拎嘅，第二日比返佢喎．

大家嘅細路會拎埋盒飯嗎？

jujuliawong25

收到電話，老人家行得郁都係仆到去嘅，可以點阻止？我打去學校又點？話唔比細路走？老人家都去到學校啦

其實我嘅意思好簡單，正如有啲朋友所講，比個訊息家長話學校係安全嘅，請準時三點半黎湊仔就得了，唔需要特登過黎．紅雨轉黃雨就叫人走，點知人算不如天算轉返紅雨，中間乜都可以發生，真係發生意外，唔通怪人咁嘅天氣都去湊孫？

如果學校比個訊息留係學校係安全嘅，只係我冒死去學校去湊仔，咁責任係我度，無乜野好講，但我睇到嘅係學校話可以早走喎你走唔走，走就黎唔走就坐係度等，咁嘅決定係咪顧及學生同家長嘅安危呢？兩件事黎嘅～

jujuliawong25

回覆 notcool 的帖子

有飯食，放學一樣有車走．其實呢樣野所有學校都會係咁，訂飯嘅車一早就出車，當日都係咁（當然紅雨咁做工人同送飯姨姨真係唔話得，亦有危險架），極其量都只會遲到，唔會唔黎，所以我個細路都有盒飯帶走．
正常嘅做法，學校實會打去比飯商同校車一路睇住情況傾點做，唔會話無就無嘅．我唔太擔心．所以我先會覺得佢點解叫學生走．

jujuliawong25

回覆 karen55407 的帖子

以往聽過話去麥記買包比佢地應急嘅

jujuliawong25

回覆 nintendo 的帖子

我都唔知喎，我幾個電話都登記晒．
老師問邊個係屋企，細路咪答亞嘛囉．你就好啦，我地兩個都要返工，遠水邊救到近火？

jujuliawong25

回覆 haihaimom 的帖子

黃耀南有度唔好，成日水浸，窩咗落去，大雨必浸

jujuliawong25

我個細路同我講話大雨時見過啲水係啲渠位湧上三樓．．．睇到佢地好開心