求培道小學用家意見

Starry-starry

我係現任初小用家～ 希望少少意見幫到你。

1）無錯，其實有textbook, 好難完全跳出既定框架。 所以主要都係跟住書嚟教，然後做作業既模式。就算課堂中間有啲活動，最後其實都係要測考默。如果你期望係project based探究式學習之類，真係要考慮下國際學校。

2）學校唔算多功課，抄寫功課都好少，但其實都有要求。每隔一陣就會有啲唔計分既課堂評估，題目唔算難，但事先唔會話俾家長聽，考完派卷返嚟簽名先知，會俾你睇到小朋友既學習進度。
我自己覺得中文要求比較高，真係用左最多心力既一科。雖然平時啲小默書唔計分，剩係默詞語，但舊年小一計考試分既中默課文，係要背默的。中文考試都一定會考上堂教左既2篇古典詩詞，要識背同識解，仲有教過既課文同做過既練習，範圍都幾闊。連課外閱讀理解篇文都長長地。不過幸好考試範圍好清晰，同埋啲題目都會起課堂教過。
數學相對之下易應付啲，但都覺得個課程都有少少急。（不過全港都係用咁既課本，都冇辦法喇。）考試題目…我覺得合理再偏難少少，未算係最刁鑽既級別。
IT的確走得幾前，小一都會有少少coding既野學下。呢科我唔識教，佢自己上堂跟老師學，考試都考得好好。我反而好欣賞視藝既教學，老師設計課程好用心，而且全部作品起課堂完成，連我嗰位畫畫毫無興趣既小朋友，都學到好多野，好感恩。

3）對，今年小一生比較幸福，全年都唔需要考試，但運作既詳情唔清楚。近幾年沒有下午既課堂，其實冇可能唔駛帶功課返屋企做。如果能夠恢復下午既課堂，學校有功課堂既話，以佢地既功課份量，初小小朋友又肯專心做既話，應該真係唔駛帶返嚟做。

4）英文教學係你講既呢種傳統教法。一星期得一次NET teacher lesson 。

5）我既小朋友冇外補，去年考試都考得可以。上學期完全上實體課，知識既野掌握得幾好，媽媽主要幫佢練識平日默書啲字，同埋考試前俾佢做下練習，理解到題目就可以。但下學期有一半時間停課起屋企上zoom, 雖然學校已經完全跟返學時間表嚟上，但可能對住電腦好難專心，明顯知識上立即好多甩漏，我就要教埋知識層面既野。下半學期返到實體課，情況立即改善好多。所以我認為返到實體課，留心上堂就學得好好。不過認真講，初小學生要應付考試既話，媽媽好難完全甩身唔教佢。

Starry-starry

回覆 Sameemum 的帖子

1）舊年小一兩測兩考，每次都要考兩首，即係舊年總共教左8首。我比較記得既有《靜夜思》《清明》《登樂游原》《憫農》…

2）頭個幾月教左幾多課我真係冇咩印象…. 我剩係記得每次考試測驗詳考既課文，大約係4課書。

3）除左作業，學校會有自製既工作紙，同埋有啲網上練習要做。不過都係側重理解知識既能力，好少寫好多字，所以都好快做完。

4）舊年中英有作文，呢份卷要考試。中文作文工作紙係要看圖寫四素句+形容詞。英文作文工作紙就係有圖有問題嚟引導作答咁。

5）佢地小一冇常識科，中英數每日每科最多2個項目，即係每日3-6項不等，印象中通常都係4-5項。不過抄寫真係好少，中文全年一課書都冇抄過，剩係寫詞語，英文都係寫詞語，小朋友專心做既話，冇抄寫既日子，好多時大約半小時都能夠完成，有抄寫功課嗰日預一小時內。

不過要注意，今年學校轉左三考，唔再係以往兩測兩考，而且今年小一轉左完全唔需要考試模式，呢類關於課程進度既硬資料，未必再岩今年既小一生用。

Starry-starry

多口問一句，小朋友係唔鐘意傳統坐定定學習模式，定係怕左學校既一大堆功課？如果只係怕功課可以考慮培道，如果唔想坐定定就可能要再搵更加活潑啲既學校。

我當年心儀培道，係因為知道自己小朋友性格好內向，會坐定定配合老師，去新派直資做好多project既學習模式未必適合，但又唔想去傳統小學日日做一大堆功課磨滅學習興趣，培道係比較平衡得到。

Starry-starry

回覆 apricot2018 的帖子

如果冇「太輕鬆」既期望，又重視關愛既話，真係可以考慮一下培道。我覺得學校對小朋友真係好好，好正向教育。好似我個小朋友好想試下做班中管秩序既學生，要寫信俾班主任申請。後來寫完即使老師冇選中佢，都偶然會俾佢做幾日。小朋友返嚟同我講嗰陣覺得好開心。我覺得呢類簡單既action，其實對鼓勵小朋友好有幫助。你知道內向既小朋友，就算成績好，通常起普通學校都俾人當隱形，所以見到班主任肯咁樣俾啲機會佢，嘗試一下跳出怕醜框框，我心中都好感動。

同埋好同意另一位家長所講，小朋友係好莫名奇妙地喜歡學校同埋校長，超有歸屬感。同埋會好自動自覺去做功課同願意溫習。舊年有同學仔完左學年轉校，我見佢都考得可以，多口問佢一句想唔想轉校，點知佢好認真好強調咁同我講：「我一定要留返起培道架，我唔會轉校架！」所以都打消念頭。其實只要佢自己願意學習，唔好失去信心同興趣，將來先能靠佢自己去克服困難，呢樣野比死谷佢知識更加寶貴。

Starry-starry

回覆 apricot2018 的帖子

我當年除左考培道之外，都有去考禮賢，兩間起我心目中都係關愛行先，不相伯仲。你都可以去研究下禮賢適唔適合你既小朋友😊😊

Starry-starry

回覆 Sameemum 的帖子

如果讀左兩個月，小朋友已經要咁樣「自我鼓勵」，功課又做到咁夜影響健康，睇嚟呢間學校真係唔太適合。

唉，校長舊年開學前家長會，已經話升小既環境轉變好大，唔好一開始就嚇親佢地，仲千叮萬囑我地做家長千祈唔好因為一時既成績話啲小朋友，俾啲空間佢地慢慢學習同適應，聽到你女女返學由期待變喊哂口真係有啲心痛。

我舊年睇學校老師zoom 教書既時候，都幾多機會俾小朋友答問題，佢地都幾多玩法，唔係剩係舉手答問題咁。例如老師指定左一個小朋友答完後，下一題就俾嗰位小朋友選一位同學答；有時又會特登搵全堂未出過聲既小朋友答；有時會亂叫學號；都有啲似遊戲。可能覺得佢地仲細，需要俾多啲互動逼佢地留心啲聽書~~

都認同上面幾位家長所講，培道既英文課程比較基本，語境冇其他學校咁多。我以前讀既私幼係net teacher班主任，幼稚園4年英文個底打得好好，一過到嚟真係覺得淺，有食老本既感覺。我一直都有考慮要唔要外補深啲…..同埋入培道唔好諗住中學入超級神校，如果單用數字嚟計業績，培道其實唔算亮眼。衡量教育成效唔應該咁單純只用數字嚟量化（我自己覺得），不過大趨勢如此冇辦法。

冇一間學校係完美的，有90% match到心中所求已經好好。我自己選校係比較著重關愛既環境，同埋希望學校多啲課外活動。學術覺得唔足夠可以再另外教佢，但學校氣氛係冇可能靠屋企補足到。

希望你搵到岩小朋友既學校，如果非走不可，要漁翁撒網式報多幾間關愛/活動式教學既學校。祝一切順利～～

Starry-starry

我岩岩login先睇到你個問題～～

1）默書範圍真係好清晰，佢派嗰張默書範圍紙，跟住讀識哂就一定得，就算課外加分題都係事先俾埋題目，你起屋企跟住嚟教小朋友就可以。上年小一中文考默通常係2課詞語 +1段背默。詞語你睇返中文書下面既詞語表就知道有幾多。今年小二中文考默係2課詞語 + 1段課文讀默 + 1段課文背默。

2）之前去閱常識卷，我自己覺得有啲深，出既題目考得好仔細。不過我個小朋友一向最鐘意呢科，日日拎本書出嚟同屋企人玩問答比賽，所以佢閱讀呢啲字既能力就冇問題。

其實間間小學都會有啲要求，我冇特別同其他學校比較課程，唔敢講培道整體偏深定偏淺。但小朋友潛力好大，最緊要佢個心係喜歡學習，慢慢都會應付到學校要求，所以唔駛太過擔心佢應付唔嚟。好似常識嗰啲，真係佢發自內心喜歡學，結果就不知不覺咁學識哂啲字，靠逼真係逼唔來。

同埋岩岩返左全日制，選擇左導修課既日子，只要小朋友專心做，真係完全做得哂功課返屋企，呢樣真係好感恩。