今日去同阿囡上特殊幼兒訓練,阿囡係咁扭計,做咗三個訓練就一堂,同老師傾開,話阿囡做咗心理評估,要讀s學校,咁老師就話,讀s位,會著重小朋友自理能力,但智能方面會跟唔上讀主流嘅小朋友,通常唔會讀一年就出來,要到小學。但小學唔好揀催谷嘅,唔係有排受。
其實我自己都有認真研究排位,e位,阿囡唔啱,要家長好俾心機做家居訓練,但我次次同阿囡上完堂,返屋企根本捉唔到佢做嘢,佢淨係鍾意成日出街。i and s位係啱阿囡,睇返阿囡情況,手板眼見功夫嘅嘢,佢可以做到,但我哋話要攞乜顏色,做乜完全做唔到。但佢聽力check咗冇嘢。係理解唔到我哋講嘅嘢,讀乜學校都好,我只想佢可以開心學到嘢,選主流學校,都要小朋友吸收先得,唔係曰日坐係度發白日夢都唔係辦法,我當然都想自己小朋友同其他正常小朋友一樣,但真係會浪費佢嘅黃金時間,如果錯過咗,真係後悔都有冇用。
好多人都覺得讀s,就會被label,但小朋友能力去邊,大家會睇得出。自己嘅小朋友幾苦都要受,自閉症嘅小朋友係遺傳同腦部受損有關,係冇辦法同正常小朋友比,如果讀s依然追唔返讀主流小學,我都認了,由佢係我肚度,我都淨係望佢健康,快樂。條路有萬萬千千,總有一條啱佢,期望低啲,人生會快樂啲。我會聽專家建議俾阿囡讀s,係等期間,讀住半日普通幼稚園,會接住上特殊幼兒課程,至於密集課程,太貴了,負擔唔到,唔知學津會唔會幫到?條路太長,希望係度可以同大家分享下,互勉之。