2006年入讀主流小學的障礙兒童家長請進來傾下

BNC

kmwun, 多謝你o既意見同分享, 其實我都毫無頭緒, 自己都唔知需要 D 咩野叫做可以幫到小朋友; o係學習上, 你會點樣幫助同引導你o既小朋友呢?  有無特別o既輔助工具或者器材, 請賜教.

kmwun

BNC

我覺得你先搵出自己又有d咩期望，小朋友有d咩強項、弱項。我去年9月仔仔剛升小一，有一次做功課，仔仔發脾氣，攪到我又發脾氣，，卒之係兩個攬住喊 之後我稔清楚，讀書唔應該係咁嘅，所以決定無功課交就算，千祈唔好傷感情。我會期望小朋友開心返學，合格就ok。另外我地嘅小朋友一般睇嘅接收能力較強，聽指示就較差，有時小朋友上堂唔專心，我建議過老師貼張寫低簡單嘅提示嘅提示卡喺小朋友枱面，有需要就指吓張卡，老師唔使開聲阻礙上堂。不過要考慮小朋友會唔會唔鍾意同學仔見到張卡。我仔仔鍾意用電腦，所以買咗d光碟補充佢玩。起初仔仔喺課室都有攪嘢，老師好好心機介紹一次俾佢知，滿足咗好奇心又講清楚有咩唔可以攪，情況已經好好多。我會明仔仔手肌弱空間感差，寫字會比較差，唯有慢慢嚟，有時用d易記d嘅方法提仔仔，例如公園會有泥土，所以個園字入面有個土字。個別小朋友情況好唔同，你又覺得你小朋友有d咩唔理想呢？

BNC 寫道:
kmwun, 多謝你o既意見同分享, 其實我都毫無頭緒, 自己都唔知需要 D 咩野叫做可以幫到小朋友; o係學習上, 你會點樣幫助同引導你o既小朋友呢?  有無特別o既輔助工具或者器材, 請賜教.

kmwun

ricky&sara

我嘅經驗係學校電話有人接，不過好難搵到老師。有時到老師覆電話，又輪到我唔得閒。而家我同輔導老師多數用email溝通，班主任都好好，有講低佢某日有空堂時間會比較方便聯絡。

ricky&sara 寫道:
kmwun
早期都有三個小朋友入咗,但有兩個無填特殊需要。學校時時打唔通 16／7希望你朋友有時間去tea buffet   

BNC

多謝kmwun o既回覆, 我都試過仔仔做功課時發脾氣, 跟住我又發脾氣係咁鬧佢, 其實每次自己發完脾氣之後都好內疚同後悔, 點解要咁惡呢?  但果一刻真係好忟憎.  而家自己都要慢慢學習控制情緒, 有時諗, 佢地細細個時我係好有心機同耐性去教佢地, 點解而家變成咁? 或者佢地有自己o既思想, 已經唔再係叫佢做咩就做咩啦!

我諗我最唔滿意係佢對學習完全無興趣, 一埋到書枱已經無晒精神, 好似要受酷刑咁; 最鐘意就係玩電腦或者電視遊戲, 試過買一 d 學習遊戲軟件, 但係佢只會當玩遊戲, 答案全部唔啱, 只靠撞彩過關, 後黎都無比佢玩.

琴日朝早我去咗一間學校交插班生報名表, 因為我o係另一個 topic 度睇到 bk 媽咪介紹全將軍澳只有呢一間有融合教育, 諗住可以幫到小朋友; 點知琴晚去補習社接仔仔時, 問補習 miss 意見, 佢話果間學校好深架, 唔啱我仔仔讀, 叫我唔好去, 跟住返到屋企見到另一 topic 又講緊呢間學校, 有媽咪話學校中文用普通話教, 英文就有外藉老師一齊上堂; 即刻令我打咗退堂鼓, 心大心細, 一心諗住去一間有特別支援o既學校, 但原來佢又係讀得唔輕鬆, 真係唔知點算; 你認為係咪一間有融合教育o既學校會比一間無融合教育但有支援o既學校好呢?

其實自已都係想仔仔讀得輕鬆, 唔好覺返學同做功課係一件苦事, 我都只係要求合格便 ok, 但係好似間間學校都係一樣, 唔"谷"果d呢, 又收生不足面臨殺校, 究竟o係學校多功課, 程度深而吸引家長呀, 定係因為學校要吸引家長報讀而比多功課多壓力呢?

原本想轉校都係因為補習社 miss 提議去一間較淺o既學校, 等佢有返 d 讀書興趣, 自己都想佢可以o係原校重讀就最好, 不過機會不大; 如果勉強比佢升級, 就係怕佢根本唔明老師講咩, 咁一路上去就會開始無心機, 對學習完全失去興趣.

kmwun

BNC

學期初學校輔導老師聽到我同仔仔做功課嗰種慘烈法都有建議我揾補習幫手，我比較好彩暫時仔仔只係寫中文比較有問題。我稔人不礙乎要威逼利誘，我都係捉住仔仔痛腳，唔聽話就無電腦玩、無機打。另外學校有個老師都好有計，生字寫得好下次可以寫少d。試吓可能的話將功課斬件，分一段段短時間做。因為仔仔好鍾意地鐵，早前買咗個地鐵路線掛布，乖就有個thank you印，儲夠thank you印就可以換地鐵站章。唔乖就有sorry印，會抵銷thank you印，目的係要小朋友睇到有後果，唔係無thank you印咁簡單。另外我自己嘅經驗係越唔夠時間先越識分配時間，可以試吓安排d小朋友有興趣嘅課外活動，唔快d做好功課就無得玩。功課真係太多的話試吓同老師傾吓調節數量，例如人抄五次生字，就減到三次。造句可唔可以大人幫小朋友寫，好過大人幫佢作，等佢抄。

我覺得融合都係一個名詞，要睇本質，揀有愛心、接納同有能力嘅學校，當然有經驗的話大家都會輕鬆d，但亦要小心近年有無人事變動會有影響。而家嘅教育制度真係好病態，功課多同深又代表咩呢，學校同家長有無稔清楚咩先至適合小朋友呢，食得太飽都會滯啦！我覺得今日學唔識咪聽日學囉，再講學唔識唔使死，但無咗學習嘅興趣就真係大件事。我覺得揀淺d嘅學校會對小朋友好d，與其擔心日後不如先處理好目前嘅問題。

kmwun

ricky&sara

今朝輔導老師打過電話俾我同我傾咗一陣，佢遲d會覆你。我提咗老師舊年新生簡介會可能太多人又用咪，仔仔嚇到pa咗喺地下，我建議你如果擔心小朋友無耐性會有問題，最好多一個大人一齊去，去到禮堂坐喺側邊，如果真係有需要就帶小朋友出去。如果開始前先同禮堂d老師打個招呼可能更好。

ricky&sara 寫道:
kmwun
我今日打通咗啦 我同輔導老師講想約見佢傾吓仔仔啲問題,佢話佢都係新入職,所以唔知上年係點做,佢要問問校長之後再聯絡我,佢問咗仔仔個名 (我有話識你呀) 而嫁要等佢電話啦

生生爸爸

香港痙攣協會石圍角家長資源中心於7月31日至8月4日舉行小一適應班, 時間上午9時至下午2時, 上課地點: 沙田某小學 內容會模擬小一上課程序及有關規矩, 有中, 英及數主科上, 由現職小學作模擬做班主任, 有需要可 tel: 24924200!

生生爸爸