教育一窩蜂（左丁山）

elbar

呢個星期吃午飯，碰到幾位朋友都係講孫仔孫女，女兒阿仔嘅升學問題，由讀幼稚園至升大學都有，香港人茶餘飯後嘅話題，肯定係教育無疑。程介明教授曾在佢嘅專欄引述一位芬蘭教育專家講：「每次出外訪問，我都聽到家長抱怨本土教育如何不濟，教育失敗，只有芬蘭例外！」香港當然唔係芬蘭，我地香港人鬧本地教育制度更加犀利啦。


人人鬧本地教育，DSE唔好，中小學功課多，中文係死亡科目，學生受壓力太大，總之樣樣唔啱。點樣好呢？送子女去英國讀寄宿學校啦，如果身家大把，交學費雜費唔駛考慮嘅話！哈，世界好奇，工程師Y嘅仔讀緊英基小學，個仔唔知點解咁叻，考到入哈羅，唔係屯門嗰間噃，而係英國嗰間，左丁山戥佢高興，猛咁祝賀佢，但佢又老實得緊要：「計過條數，每年阿仔要起碼五六十萬元，唔係一個小數目。」哦，專業人士唔係大富豪，呢條數真係要計清楚。但住在深水灣嘅一位富豪級老友，好想個女兒入英國哈羅，偏偏只能買debenture，入到屯門哈羅，有啲唔忿氣。


入到英國哈羅有乜好，咪係有八九成機會入到牛劍囉，牛劍名氣大，讀乜系出到嚟，都容易搵到工，之後一世人可以話自己係牛劍校友，零舍威過人。年輕英俊大律師R就同左丁山呻：「我當年有機會入牛津讀閒科，但自己係要讀法律，於是入咗另外一間大學，依家成為大律師嘞，見過十幾年世面，先知道自己幾笨，在社會做事，掛住個名校招牌係零舍掂啲嘅！」


普通人無謂諗哈羅牛劍嘞，營銷Y就好恨個仔入到軒尼詩道官立，讀官立小學做乜鬼？營銷Y話：「港島東人人都知，入咗軒尼詩道官立小學讀書成績好嘅話，有好大機會入皇仁，皇仁學生有九成機會入港大中大，你話幾妥呢？」


呢條數左丁山又唔識計噃，只知道沙田嘅Shatin College係IB狀元製造廠，考IB成績驕人，入英美名牌大學算容易。但大狀R做過調查研究，佢話英基學校學生英文好掂，但多數對中文無興趣，本地人唔識中文或者中文弱，今時今日搵工冇競爭性。哎，咁就要中英並重，入讀香港式直資學校啦！大狀R媽咪識得一間直資名校校長，姑且一問，校長對佢講：「我哋係幾十年老友，你千祈唔好好似我哋嘅校董會成員咁，猛咁畀壓力我，叫你個孫仔參加入學試啦，二三千人考百零個位啫。R媽聽完，唔敢再打電話畀校長，點知營銷Y又有嘢講：「唔怕，咪去考囉，鄰居個女就係考到呢間直資名校呀，佢開心到死，但又要準備一筆錢畀個女讀校外雞精班嘞，否則一定追唔上！」左丁山聽到都暈暈哋，沙田陳太來問孫女讀小學意見，即刻叫佢：「參加分區校網派位算嘞，命運由電腦決定。」




左丁山

Jane1983

牛劍讀閑科，好過去無咁名的大學，讀自己心儀的法律? 真唔真?

elbar

Jane1983 發表於 18-3-31 12:06
牛劍讀閑科，好過去無咁名的大學，讀自己心儀的法律? 真唔真?

佢現在可能來想通咗；如當時先入牛津，然後再上 哈，魯，史 讀 JD，可以做英美名校校友，又可以做大律師

Jane1983

elbar 發表於 18-3-31 12:30
本帖最後由 elbar 於 18-3-31 12:31 編輯

佢現在可能來想通咗；如當時先入牛津，然後再上 哈，魯，史  ...

不如佢讀到4張，唔使執業直接退休算啦  

elbar

Jane1983 發表於 18-3-31 13:47
不如佢讀到4張，唔使執業直接退休算啦

現時無綫女藝人朱千雪都係城大讀緊 JD  

Jane1983

elbar 發表於 18-3-31 14:05
現時無綫女藝人朱千雪都係城大讀緊 JD

城大和牛劍又扯得遠d  

elbar

Jane1983 發表於 18-3-31 15:40
城大和牛劍又扯得遠d

佢都冇讀過牛劍；劍橋法學士係麥明詩

Jane1983

elbar 發表於 18-3-31 15:56
本帖最後由 elbar 於 18-3-31 15:57 編輯

佢都冇讀過牛劍；劍橋法學士係麥明詩

其他科如文科和商科，可能真係揀間名響d的大學。但如醫科、法律，係有呢個執業資格定係無，應該好唔同考慮lor。

elbar

Jane1983 發表於 18-3-31 16:06
其他科如文科和商科，可能真係揀間名響d的大學。但如醫科、法律，係有呢個執業資格定係無，應該好唔同考慮 ...

現時留係香港上大學個啲公開試精英首選醫科，次選牙醫  

Cheeselover

讀書，為興趣耳，想發達，信命啦。

hkpapa852

elbar 發表於 18-3-31 11:30
呢個星期吃午飯，碰到幾位朋友都係講孫仔孫女，女兒阿仔嘅升學問題，由讀幼稚園至升大學都有，香港人茶餘 ...

左生做乜唔叫人去入佢站台個間新校?