名校出身（左丁山）

elbar

獅子王母校聖保羅男校入唔到香港十大名校，雖然佢略有所失，但立即對左丁山講：「世界唔同晒，依家香港大概係中國的紐約，金融之都，紐約人係叻，但必須面對全國人才競爭，紐約中學大學畢業生要與波士頓、三藩市、芝加哥等各大城市、州份名校學生競爭，未必一定贏。同樣道理，香港學生將來要在香港站穩陣腳，在事業學業上有所成就，並非女拔與聖瑪利之爭，喇吵與男拔之爭，中大與港大之爭，而係要面對北京上海南京杭州深圳名校之爭，學校與學生要有呢個視野先至得。」


隔咗冇幾耐，獅子王傳來一份中國十大名校名單：（1）北京人大附中，（2）湖北華中師大第一附中，（3）北京四中，（4）江蘇啟東中學，（5）杭州二中，（6）北京北大附中，（7）湖北黃崗中學，（8）上海外語大學附屬外語，（9）廣東華南師範大學附中，（10）湖北武漢外語學校。十大中國著名中學主要係大學附屬中學，考試成績好，人才輩出。獅子王加多一句：「十年後本港大學校長可能全部來自呢批中學！」


唔係呀，起碼到目前為止仲未係，但香港大學首開其端，已選咗一位內地學者張翔做新校長，既創先河，其他大學以後有空缺時，可能紛紛仿效。大學校長係唔係一定出身著名中學嘅呢，翻查資料，好似未必一定有關連，現任大學校長而左丁山又認識嘅有陳繁昌，來自慈幼中學，中六讀皇仁；段崇智，牛池灣聖約瑟，中六讀皇仁；唐偉章，基教書院；張仁良，鄧鏡波書院；鄭國漢，男拔萃；錢大康，聖保羅男女，如果唔計中六，六位本地人大學校長之中，只有兩位來自十大名校，另外公開大學校長黃玉山就係來自威靈頓中學。以大學校長出身嘅中學計，名校固然有先天優勢，但來自Band　1以下中學嘅亦有一定份額，所以左丁山大膽推論，香港人俗語贏在起跑線，不必過份迷信，人總要發奮，自己努力向上，不必為自己入唔到名校讀書而即刻投降，史雲斯都可以撼低利物浦嘅啫！又譬如講馬，大家口頭禪係新馬血統優良，祖父母，父母贏過一級大賽，葉森打吡等等，故此呢類馬身價特高。如果條數咁易計，阿聯酋麥通酋長賽馬集團大把錢，咪可以贏盡所有世界大賽？但事實並非如此。成日講起跑線冇乜用嘅啫！




左丁山

Dean2013

獅子王母校 係St Paul Boy. 蘋果日報記者有冇屎啲呀！

shadeslayer

Dean2013 發表於 18-1-30 21:50
獅子王母校 係St Paul Boy. 蘋果日報記者有冇屎啲呀！

聖保羅男校咪St Paul Boys 囉

星星的後裔

可能只反映名校生唔鍾意做"有面無錢"的工作。

hkpapa852

左丁山竟然亂信學校排名榜, 仲連續用呢D料去寫稿..... 莫非真係江朗才盡? 定係老貓燒鬚?

唔通...... 個排名榜係佢暗中搵人攪既呢? (HKPEP既背後金主乎?)

諗落都有可能, 見佢近年咁落力去為D新校站台.......