嚴重恐懼番學, 發惡夢, 異常情緒波動, 應該繼續嗎?

cat8141210

請問你小朋友讀哪一間幼稚園的N1?
小朋友親口同你講佢唔想返學的原因嗎?
佢可能只係唔想離開媽媽吧?
有冇同學校老師溝通是不是在幼稚園有什麼不愉快的事發生呢?

melonfans

ting-ma 發表於 12-9-21 13:34
我問過佢好多次, 有冇人話佢, 罵佢 , 蝦佢, ......佢都話冇,
佢只係答我怕媽媽走左去..

我個小朋友持續咗3個月都係咁, 你返學前話佢吾喊, 乖乖換校服就奬貼紙!

話媽媽等你放學, 大個女, 返學好叻架!  

再用月曆, 貼開心貼紙係空格, 話邊日吾喊就貼開心貼紙, 喊就貼喊喊貼紙!  等佢自己睇!

peckychiu

我諗比d時間佢啦~分離係難攪d...等佢慢慢習慣...老師話真係喊足一年都有~~但唔可以因為佢喊而唔洗佢返學嘛..
我個仔都喊..不過唔係大喊..飲泣..佢一食完lunch..就開始話驚驚..一路沖涼一路驚驚..出門口行去學校都話驚驚..無媽媽好驚驚~我都笑住同佢講...woo學校有咩玩架..唔好同佢一齊苦埋個面囉..開心d..唔比佢比覺得媽媽都好worry咁~
慢慢黎!!!

S.TANG

回復 ting-ma 的帖子

TING-MA
我個囝開頭都有你個囡呢個問題, 又係返學後晚晚發惡夢, 日日同我講唔返學學. 返到學校門口就開始喊. 但就冇你個囡咁嚴重.

我既解決方發係唔再親自帶佢返學, 改由姐姐帶 (OR你試吓搵其他人帶). 2日後姐姐就同我講, 佢返到學校冇喊啦. 但就仍然發惡夢同日日講唔返學學.

我都有問佢係唔係同學仔笑佢(因我個囝隻左眼眼珠有粒肉粒, 但要4-5YR先可以做手術切除), 唔同佢玩, 佢又話冇. 打過去問過老C, 佢哋都話佢係學校冇俾其他同學仔蝦, 只係我個仔比較自我, 但己經開始溶入同其他同學玩. 叫我放心, 過多排應該冇事.

今星期明顯好咗好多, 返嚟會同我講邊個同學仔今日做咗咩嘢(不過講嚟講去都係得2個同學仔), 學校教咗佢唱咩嘢歌仔. 會係屋企做返哂. 又會要我哋一齊同佢唱同跳舞. 佢呢2日都冇再講唔返學學啦. 99仲同我講, 佢係學校門口見到佢幫其他同學仔著鞋, 又拖往個同學仔一齊出嚟.  見佢而家有同學仔開始開心咗.

你都放心啦, 小朋友知道如果MAMI真係唔可以係度, 佢哋就會開始適應. 一有同學仔就會開心好多嫁啦. 俾多小小時間你囡囡啦.

cat8141210

ting-ma 發表於 12-9-21 14:11
謝分享, 不過我個囡仲未喜歡同小朋友(similar age)玩, 佢只喜歡同大過佢的小朋友玩. ...

我個女由一開始返學就冇喊過...
佢仲要係7月B,
家下先得果兩歲兩個月人仔咋,
最慘係佢連講野都未係好識講,
淨係識得ee鵝鵝,
照計佢返學見到同學仔個個都識講野佢係應該會驚,
但係我打電話搵老師問佢有冇喊有冇唔乖,
老師都答我佢好正常wo,
仲有同同學仔玩,
但係同學仔同佢講野佢唔識答人咁囉,

佢平時都係好痴我架,
但係一返學就冇扭冇喊,
因為我要返工既關係,
我係比個女坐校車的,
會唔會因為我唔係親自送佢返學所以佢冇好似你個小朋友咁喊法呢?

anyway,唔可以因為佢叫唔想返同驚就唔比佢返學,
佢點都要出黎面對呢個世界架,,,
好似見到有媽媽講,
"一陣去返學wo,好叻仔呀"
"不如媽媽去買貼紙比你呀?"
呢d都係好方法來的...

媽媽你唔好太介意個小朋友喊就驚左佢...
小朋友唔好就得太緊要呀...
唔係第時仲難搞...

mamaviolet

放心, 我個女舊年返pn都喊左兩個月. 仲係一起身就喊, 喊到入課室. 到下學期, 原本已經無喊, 有時無啦啦又喊番. 但係我覺得一定要比佢繼續返, 比佢適應, 如果你唔比佢返, 唔通K1喊又唔返.  你要相信你小朋友,比佢知道無論點都要返學, 唔好比佢知道有機會可以唔返學, 過一排會好好多.
P.S. 我個女今年返K1, 重要新學校, 原本我都以為又要喊番一個月, 但出奇地只係滴左幾滴眼淚....所以放心比佢返pn啦!

vyvy

我大仔當年返PN, 初時都係成日喊, 只係分離時喊, 無話吾返學; 大約一個月之後好D, 但過左一段時間, 佢吾肯返學, 事原佢籟尿(已介片)俾老師話, 老師之後話已SETTLED, 阿仔都話老師"好", 但就總是吾想返學, 阿仔當時都算可以用語言清楚表達, 如是者搵吾到原因, 後來, 有次去學校, 見到一位家長, 她說見到老師"不喜歡"我仔仔, 有D針對性. 雖然學校有OFFER K1位阿仔, 但我選擇搵過第二間, 不過, 都讀完一年才走, 因我都吾肯定當中發生的事, 也不想令阿仔以為"不喜歡"就可以不上學.

mingming1111

回復 ting-ma 的帖子

放心樓主, 好多小朋友就算K1都會喊足半年, 你試下送佢番學時同佢講, 媽媽陣間會來接你的, 唔係唔要你呀, 好多小朋友係因為覺得沒有安全感下而恐懼,  盡量準時d去接佢(即係排前些接), 慢慢來, 加油

twllc

樓主，我細仔2歲返n班頭2個多月都會喊，返學前著衫勁扭計(要兩個人捉住黎著)，頭幾日親自送佢返學喊得好淒涼，我都差d放棄。但工人帶去好好多，起碼唔會心軟，同埋喊少少就好快收聲。

所以之後就算我放假，都响佢返學前就離開屋企(等佢見唔到我)，我唔再親自送佢返學

我個仔係09年超細仔，其實可以遲一年先入讀，但我覺得既然遲早要面對，就唔好退縮。今年返另一間學校k1，本來稔住佢一定喊，但居然完全冇喊。所以只要過左呢個階段就ok。

樓主，加油!

藤媽

我仔返N1時喊左兩個月, 依家轉左第二間K1, 八月開學到依家都仲係喊緊...

依家識得表達仲慘, 日日同我講數佢唔想返學 (以前N1只要狠心就OK!)

之前上過兒童心理既course, 老師話小朋友既行為問題係源於佢地既心理質素, 要解決行為問題, 要先了解佢地呢個小小世界

依家一步一步咁處理囝囝既情緒問題, 開始有d成效, 慢慢解開左佢唔想返學既心結, 暫時一星期喊3-4日, 即係有1-2日係ok

我係網上搵到一篇文章有講解小朋友2、3歲時遇到既問題, 我pm俾你睇, 希望幫到你同囡囡順利過渡呢個時期!!

麥子仲肥

籐媽：

可以pm埋俾我嗎？

thx

Vijoyce

回復 ting-ma 的帖子

我囡囡係8月30日.. 番全日班.. 一路都擔心佢番PN既問題, PG導師話小朋友夠兩歲8個月先好比佢自己上堂, 因為仲係依戀期, 未獨立到.. 當然我呢個唔聽話既阿媽都報左N班比個女.. 由於PG導師咁講..所以一直都帶阿女出去玩.. (去公園, playground, playroom..) 平時帶佢出去搭LIFT, 見到保安員..司機.. 都SAY下HI.. 傾兩句..等佢見多D人..

可能我個女鍾意同小朋友玩, 同埋每日我地番公, 佢起左身..我地都會同佢講BYE BYE..佢習慣左到夜晚先見到我同爸爸.. 所以係頭一個星期喊(嫲嫲/工人帶番學).. 由番2個鐘à 4個鐘à 6個鐘都適應了, 比我預期好.. 至少係學校食早餐,午餐, 午睡.. 當然老師話佢久唔久會叫媽咪, 或唔想食學校D野OR扭瞓會大喊..但老師都覺得進步了…

惡夢都持續幾星期.. 老師話初初係咁.. 唔洗擔心..

我諗樓主係FTM.. 所以小朋友難D適應無左你係身邊.. 我地大人番新工都要時間適應, 更何況係小朋友??!

喊只係表達不安, 如果唔比佢番.. 你出年都係遇到呢個問題.. 小朋友始終要長大, 我地忍心D都要放手~ 比多D正能量佢.. 同佢講..大個女.. 要叻叻.. 媽咪知道你一定做得好好.. 加油~~~

大白豬

回復 藤媽 的帖子

可以ｐｍ我嗎？我囡囡都有類似問題．謝謝．

winnietingting

我囡囡讀緊pn班，在學校門口會喊到死，但入到學校就無事。大家加油！

藤媽

麥子仲肥 發表於 12-9-21 16:29
籐媽：

可以pm埋俾我嗎？

不如我post出黎俾大家睇 ^^

peckychiu

好

Elliven

我個仔仔同樓主個囡囡好似, 佢早兩星期病倒了, 沒有上課一個半星期, 唔知係未因為唔舒服, 所以特別扭計, 超級貼身, 連我地食飯去洗手間都唔得, 一步都要跟到實, 小小事唔合佢心意就大叫大喊, 瞓地踢腳, 晚上瞓覺差不多每一小時就醒, 醒左就狂踢床踢被, 好似發了瘋, 我地點氹佢只會更加激動, 惟有等佢發洩一輪, 再氹佢訓番, 上星期尾返學由9點叫喊到4點, 結果老師校長叫我地暫時俾仔仔返半日, 待他重新適應校園生活...

藤媽: 可否給我有關文章的資料, 謝謝!