- 在線時間
- 552 小時
- 最後登錄
- 19-11-25
- 國民生產力
- 419
- 附加生產力
- 64
- 貢獻生產力
- 0
- 註冊時間
- 06-6-10
- 閱讀權限
- 10
- 帖子
- 572
- 主題
- 28
- 精華
- 0
- 積分
- 1055
- UID
- 86967
|
原帖由 ngcheukhin 於 10-3-25 21:06 發表
我完工同意APPLE架講法,小朋友最緊要開開心心同健康,因為健康係我地唔可以強求度架,有好多人以為好多野係理所當然,其實唔係架,就算係想佢正正常常咁平平凡凡都唔係咁易.我自己有一個仔仔一歲多D,佢都係發展遲緩,我 ...
加油呀!我都好明您,嗰時我仔响未評估証實為自閉傾向之前,我仔因為負面行為同情緒,再加上佢完全唔識講野亦唔明白人地講咩,前後响短短半年內俾一間主流幼稚園同一間國際學校幼稚園踢出校,嗰刻我直頭崩潰,响老師面前強裝無野係咁忍住唔俾自己喊或動容...一出校門D眼淚已經狂標,又怕自己咁既喊樣番屋企會令老人家唔開心(唔想俾佢地咁快知個孫又無書讀),結果我係响屋企樓下公園係咁狂摑自己塊面要自己即刻收眼淚唔俾自己喊,停哂收哂眼淚我至敢番屋企...所以都好個刻既痛苦...反而到我仔評估咗係自閉傾向,三歲只有唔夠一歲既言語程度時,我係鬆咗一口氣,至少唔再成日覺得係自己無用教唔到個仔講野或教到個仔咁燥走去打人.之後都用咗好多時間去調較番自己個諗法同情緒.嗰時每次有親戚問我仔讀書讀成點,我真係仲慘過去死,唔知點答佢,次次都係靠我老公幫我擋,幫我作個大話答人話個仔番學番得好好,又有同學仔同佢玩(呢下我差D忍唔住喊出黎,我仔就係因為打人同唔識講野而一個小朋友都唔肯同佢玩,全班同學一齊排擠我仔一個)...
之後俾個仔去私家治療師度做訓練,見個仔真係明顯進步咗,我又成日好主動咁同治療師同醫生傾偈,請教佢地教我仔既意見,結果自己都識咗好多skill,自己又開始教到個仔,嗰下我至開始積極番.
查實小朋友有特殊問題已經係鐵一般既事實,我地就算幾唔開心都無得改變,我地浪費時間去自己諗埋一邊去唔開心,係幫唔到囝囝,亦會浪費咗囝囝有機會改變既黃金時期(六歲之前係黃金期),所以我嗰刻都開始同自己講,唔可以俾自己去浪費咗亞仔D時間,我拎亞仔呢D寶貴時間去諗埋一邊,倒不如留番呢D時間俾哂個仔,去好好幫佢地教好佢,同佢做多D訓練,咁至係愛佢幫到佢!
亦會同自己同埋個仔講(成日講),媽咪同佢永遠都係好朋友好拍擋黎,媽咪永遠都會响佢身邊拖實佢,佢跌倒時我會捉實佢扶持佢,我地係合作伙伴,所以我地就要一齊合作,一齊去衝破呢D障礙.唔好俾呢D病同缺點打敗我地.我地要戰勝佢.呢樣係好重要,唔好以為囝囝有呢D病會唔明,查實佢地一D都唔笨,佢地係好聽得明亞媽亞爸講乜,亦好感受到父母係愛佢關心佢,而且呢D正正係佢地最需要亦最想要囉.
嗰時我仔三歲半,仲未識講野,亦未明白人地講咩,有次我帶佢去公園玩,有個小朋友嫌我仔阻住佢,走埋黎响我仔耳邊尖叫大叫鬧我仔:"死開啦!低能仔!",跟住我仔嚇到想走時,個細路仲走黎係咁踢我仔個背(佢地响滑梯上面),結果我衝上前抱走我仔(我抱走時個細路都仲係咁踢,仲踢埋我),我同個小朋友講,佢唔可以咁做,之後我仔係嚇到唔敢喊,我抱我仔離開公園時,我邊行邊同個仔講:"媽咪幾時都保護你,你唔駛驚..."就係嗰次,我係第一次俾我仔好深情咁攬住我,仲好主動咁錫咗我臉一下...嗰刻我真係差D响街度喊出黎,無人會明白到,個仔平時無反應無eye contact,講乜都無反應唔理你時,當你仲以為個仔同木頭公仔無情感唔明你講乜時,反而佢呢一下咁主動既反應,係令我好乍驚又喜.所以嗰刻我至知我仔唔係木頭公仔,佢係同我心靈相通,佢係明白媽咪係好愛佢係錫佢架.
我仔依家雖則真係好多問題(自閉傾向、過度活躍專注力缺乏症、學習障礙、動作協調障礙、言語發展遲緩),但呢咁多年黎係睇到佢有一路進步的.雖則有好多眼淚(我仔個名有個霖字,久雨...),但亦有好多喜樂既時候.至少呢個人仔會好重視我呢個媽咪,好鍚我呢個媽咪,佢會唔想我死,唔想我唔理佢,好想我笑多D,好怕我唔開心亦好在意我感受(呢樣係學校咁多位老師既感覺黎)...我人生中平平凡凡又唔係咩有用之材,但竟然有個人咁重視我咁在意我既存在,呢樣係一種幸福,亦係神既恩賜黎!所以到依家,雖則我每日都幾乎接到大大小小既投訴(我仔D行為),但我都會認為,個仔永遠都係神所賜俾我地一家最好既禮物黎...如果佢唔係黎我度做我個親生仔,我既人生亦苦悶乏味亦無意義,就係正如我曾經聽過一位有特殊小朋友既媽咪所講,神就係知我地呢班父母係有能力亦好適合去愛去照顧呢班咁特別既小天使,所以至安排小天使黎我地屋企,做我地既仔女,因為我地,小天使至能感受到愛.我第一次聽呢個註解時,我真係忍唔住喊出黎.但我願意相信亦願意接受.個仔永遠都係我地最可愛最純真既小天使黎.我地應該愛佢.
所以都加油啦!當你覺得正能量唔夠時,可以上黎呻一呻,抖一抖,我地咁多位媽咪會願意做聽者,大家都需要扶持同互勉.所以您同太太都要加油呀! |
|