Cambridge Young Learners English Tests

amazingkitkat

讀者 F來郵話香港英國文化協會與英基（ ESF）其實有合辦埋劍橋 Young Learners English Exam（劍橋幼兒英文試），考試費六百元，冇千千聲咁貴，考生唔駛上深圳考試咁嘥錢，幼稚園逼學生去深圳考，為咗錢咋啩？多謝讀者 F提供資料。

source from appledaily
睇本欄搵銀？
2011年02月22日

收到幾份讀者電郵，難以一一以電郵回覆，就此簡單回答幾句，請讀者諒解。（一）最近提過兼通中醫理論嘅醫生 C（私家西醫），有兩三位讀者要求介紹姓名及地址。為避免任何誤會，左丁山講過就算，不會介紹醫生，以免他日無端端負上嘅某些責任，累人累己。請呢幾位讀者原諒。（二）一位理工大學社區學院讀副學士嘅學生，想到美國升學，按道理理工大學社區學院會有升學輔導，請你返學校查詢。如果冇，自己上網搵學校，自行申請都得，不過現在已係二月，要夏天到美國入學，已經太遲，如申請明年冬季入學（即二○一二年一月），應該仲有時間，理大副學士唔知有冇同其他海外掛鈎，如果冇，或者可以考慮各州立大學，多到不得了，鍾意邊間就申請囉。好多年前（現已停辦）浸會大學先修班曾與美國 Western Michigan University掛鈎，讀完兩年就過 WMU讀三年班，呢間 WMU嘅心理學系幾有名氣 o架。
（三）讀者 F來郵話香港英國文化協會與英基（ ESF）其實有合辦埋劍橋 Young Learners English Exam（劍橋幼兒英文試），考試費六百元，冇千千聲咁貴，考生唔駛上深圳考試咁嘥錢，幼稚園逼學生去深圳考，為咗錢咋啩？多謝讀者 F提供資料。
（四）有關學童巴士一事，讀者 C再度來郵，澄清佢賣牌唔係賣學童巴士牌，而係賣咗十個 A字公共巴士牌及兩個無價 D牌再加大巴、細巴等等。學童巴（十二座、十六座）係 D字牌，牌照並無金錢價值。
讀者 C提醒左丁山，佢睇咗「 GG細語」好耐好耐，九八年從本欄某篇文章觸發靈感，發掘咗一個巴士接送商機，搵到錢供養女兒到美國讀書，曾經來函致謝！呢啲事，左丁山真係唔記得晒咯。讀者因睇本欄而搵到銀，係你地夠醒目夠勤力啫，與左丁山冇關係，唔駛多謝。相反地，本欄有嘢唔啱睇，亦唔好過份激動，來函將左丁山罵到狗血淋頭。
讀者 V傳來一段新版「何家猜」，應係網上傳閱版本，幾好笑，亦夠諷刺性，不便轉載嘞，爭產之事層出不窮，連一向供應鏞記溏心皮蛋嘅上環順興行，亦發生兄弟不和而鬧上法庭嘅新聞，「何家猜」呢啲事件好可能係社會縮影。

（左丁山）