我係小學老師，誠意為你解答教導小朋友o既問題

barry_mama

自從琴日登o左一篇文章後，我感到原來好多家長都極關心小朋友o既身心發展，所以特意開呢個話題，希望大家將自己o既疑難，講出o黎同大家分享一下。如果大家對自己仔女o既學校有咩不滿，我都想藉此建立一個渠道比大家發洩一下。

杰杰媽媽

老師,

我想問下,我個仔成日都因為好少事而發脾氣(大部係發自己脾氣),有dd野做唔到就黑面,由早到晚冇乜幾多mins係唔黑面ga.我成日叫佢試下啦,但佢答我:試左都係唔得ga啦(可能太多野佢都成日做唔到/記唔到).佢又唔鍾意其他小朋友攪佢,總之一有少少唔順心既事佢就黑面,個樣好得人驚,好似想殺人咁,好似全世界欠左佢咁.另,佢做唔到d野,就覺得自己好冇用.(佢講過一句:要個腦黎做咩,我都諗唔到既)

我已經冇壓力俾佢,我要求已經好低,就係佢唔好成日發脾氣,我就已經好開心啦,成績已經唔重要啦.唉...........我真係咩方法都試過啦,真係好想有人教下我可以點做,佢先可以變返一個開開心心既小朋友.
(唔知佢社交係咪有問題呢,佢同親其他小朋友玩就好易黑面,一句講晒-----------唔輸得)

IRON

hi 老師,

我都有問題......

1) 如幼稚園讀活動教學(中文為主), 小一開始數學科即用全英文會否好難適應?? 如小一二用返中文, 小三先轉英文會否好d??

2) 小一中文科可選用普通話教授, 但仔仔本身講野唔係咁好, 仲執緊佢d發音, 咁係咪唔好簡普通話教授呢??

先謝哦. ^_*

polo

barry_mama,

想問o下你關於小一自行收生o既問題,我知道1st round係計分派位,而學校係收報名表時係即時核實所有文件及確認你小朋友的分數,問題就係佢地收o左表後其實仲可唔可以係唔通知家長o既情形下唔承認或者除消你o既分數o既呢.......例如宗教個5分咁囉?

barry_mama

我覺得你o既仔係一個自尊心幾強，同對自己要求幾高o既小朋友。佢對自己有一定要求，達唔到o既話，自己處理唔到挫折感，所以會用發脾氣o黎表達。
我們過去都以為，同小朋友講：「試試看嘛!很容易呀!」，就可以鼓勵到佢o地，其實我o地係幫倒忙。
你試諗諗，他成功做了一件「容易」o既事，並唔會覺得自己有好大o既成就。相反，如果佢失敗左，就表示佢連一伴簡單o既事都做唔到!
我o地可以反過o黎講：「呢個唔係太易。」或者係「可能有點難。」佢就會接收到另一個訊息—如果佢成功左，佢可以因為做好一件困難o既事而感到驕傲；若果失敗左，起碼都可以因為件事才身就係困難而感到安心一點。
其實佢仲係小朋友，對佢o黎講，可能好多o野唔係我o地心諗咁易，所以亦要避免講：「呢件事『對你o黎講』一定好困難!」你o既小朋友可能會諗：「點解對我就難?點解唔係大家都覺得困難?唔通我能力差過人?」
因此，首先你要尊重小朋友o既努力，當佢做唔到o既時候，都唔好急着提供答案，可提供資訊引導佢。
最重要係一開始同佢一齊set目標(記住不宜定太高)，等佢容易達到，但又唔好太低，如果唔係小朋友都會知道你係就住佢o既。
總之：正面o既鼓勵會有正面o既行為，多點找出兒子可貴之處來盛讚吧^.^

barry_mama

IRON：
如果幼稚園係用中文，上到小學用英文，對小朋友o黎講點都要時間適應。其實就算老師用英文教學，唔多唔少都就住小朋友o既水平o黎教，起初o既時候會加點中文，慢慢轉晒為英文，等小朋友容易接受點!
愈細個適應力愈強，如果佢係要面對全英教學，我會鼓勵愈早愈好。
等到三年級先至轉，佢仲難適應。
始終廣東話先至係我o地o既母語，我覺得用普通話教中文呢個制度好壞參半，好o既係小朋友聽說普通話o既能力會加強，另外，寫作能力都會提昇(因不用將口語轉書面語)，但我覺得如果小朋友本身係唔識o個個字，而老師用普通話教左佢，咁佢咪淨係識用普通話講呢個字?
你諗o下，小朋友會唔會講講o下o野突然有個字轉用普通話?既然佢唔識中文讀音，咁佢咪唔會用lor~
我睇過一個研究，話兩班小朋友學中文，一班用普通話，一班用廣東話，出到o黎其實成績差唔多，所以唔好諗住用普通話成績一定會好好多!
如果個小朋友本身普通話唔叻，咁就弊喇，佢會連聽都聽唔明呀!
所以，我唔建議你個仔仔用普通話住。

barry_mama

polo：
關於收生o既問題，我唔係太清楚，因為都係office負責，不過我可以幫你問問o既

meimeilam

barry_mama :

囝囝現讀小四, 請問英國文化協會嘅小學課程有幫助嗎?

    

barry_mama

meimeilam：
請問你仔仔係咪讀緊英文小學?
英文科成績如何?
想強化英文科d咩呢?

meimeilam

我個仔仔係優才書院讀書, text book 係中國藉老師教, 而 phonics, reading, writing 就係外籍老師教, 一星期有三堂, 成績方面都唔錯, 但我覺得佢 speaking & writing 比較差 D, 因為佢冇乜信心去講, 請指教。

IRON

hi barry_mama ,

唔該晒......不過我地間小學(下年會讀)係小三開始先用全英教數, 聽妳咁講不如小一自己開始教??

另中文我地都係諗住簡廣東話教授.

Tks a lot.

polo

你幫我問o下,好呀,唔該晒你先!

barry_mama

好多小朋友都有呢個問題，其實歸根究底都係因為佢用得少。我諗你可以陪你個仔仔用英文寫o下日記咁，開頭你可以設計一d簡單d o既模式，例如你寫定一堆形容心情o既字，然後比佢圈低邊d可以形容o下佢今日o既心情，然後作o下句子；又或者係用六何法：何時、何地、何人、甚麼起因、經過、結果。開頭用短答形式，慢慢將佢串埋一句，最後變成段落，睇佢程度啦!
然後你可以設計每日一個時段淨係用英文同佢溝通，可以係輪流講故事，普通傾計，討論新聞等，多樣化，設計靈活，而你亦可以參與其中呢!
希望以上意見幫到你啦!

barry_mama

IRON：
如果你有咁o既時間，當然提早一點教佢好啦!
因為有一些特別o既terms應該係小一、小二學左喇，
到左小三突然間要學返晒就會比較辛苦喇!

jjj_3

我小朋友做任何事都慢吞吞,上堂經常不夠時間抄寫手冊,做功課也慢,請問有什麼方法改善?

yhlmami

小朋友經常講大話,每天問他關於學校的情況,他都自編一套大人喜歡聽的講給你聽,當你要打電話給老師時,他又說是他作出來的,真是被他激死.有何辦法可以解救?

meimeilam

meimeilam 寫道:
我個仔仔係優才書院讀書, text book 係中國藉老師教, 而 phonics, reading, writing 就係外籍老師教, 一星期有三堂, 成績方面都唔錯, 但我覺得佢 speaking & writing 比較差 D, 因為佢冇乜信心去講, 請指教。

請問讀英國文化協會小學課程有用嗎 煩請指教      

artoo

我個女剛升上小一,學校除了中文課之外,全是以英文教學,每日抄番來的手冊都唔知佢寫咩,佢只係識抄而唔明,結果要打電話俾同學仔對齊先知要做咩. 功課就做一張唔做一張,有時佢自己都唔記得要做咩. 而家先剛開學無耐,以後都唔知點算

babylaam

請問幫小一學生報讀"圖像記憶法"會否太早,
另外學校有 phonics 和 劍橋英語 ,應先報那樣,many thx!

Daisy媽咪

小女自小就讀英文幼稚園, 但小學升上一所中文小學, 發現她的中文水準差而所有成績都拖垮了, 有甚麼方法可盡快提高她的中文能力以達學校要求呢 ?