本帖最後由 cutiemily 於 26-3-3 11:10 編輯
其實由頭開始，我哋一直都好欣賞ESF嘅教育理念，小朋友喺Hillside讀K1返學返得好開心，嗰度地方寬敞、環境舒適，見到佢每日都咁期待返學，我哋作為家長都覺得好放心。我哋原本好希望佢可以繼續喺度讀K2，然後順利升返我哋心儀嘅鰂魚涌小學。
上年尾K1開學無耐,學校安排如果要入鰂魚涌小學，就需要喺K2轉去新開嘅鰂魚涌幼稚園。坦白講，當初聽到嘅時候，因為我哋好鍾意Hillside，所以難免有啲唔捨得。但係我哋明白學校可能係為咗整體嘅資源整合同升學安排，希望俾小朋友一個更連貫嘅學習路徑。其他港島區嘅小學好似山頂、紀連拿、堅尼地，對我哋嚟講各有考量，特別係堅尼地比較遠，而山頂同紀連拿雖然都係好學校，但相對規模較細、亦冇午飯供應，對於我哋在職家長嚟講安排上會多少有啲挑戰。所以權衡過後，我哋都好感恩有機會可以入到鰂魚涌幼稚園，還給了我們上午校的正取,當是為將來升讀鰂魚涌小學做好準備。
講起呢間新校QBK，其實之前我小朋友PN時都係VEO，知道上康維記PN做得非常出色，上康維記當年只開一班,共約25個小朋友，另一邊做playgroup得十零個，雖然無戶外操場,但成個環境都好鬆動，個校長仲記得每一個小朋友嘅名，令用家們都感受到嗰份用心, 加上每位小朋友都要求穿室內鞋, 疫情下衛生都搞得好理想。後來維多利亞上康分校結束營運，英基上年即接手同一個校舍做鰂魚涌幼稚園，我哋當時都好期待，覺得可以延續呢個校舍嘅優良環境。
但據我了解，而家上午校已經有K1兩班、K2兩班，每班約25人，即係上午已經有約100位小朋友；下午校嘅班數同上午一樣，全日加埋有接近200位小朋友喺同一個校舍入面上堂。坦白講，單係一個時段要容納100個小朋友，我已經覺得個空間有啲緊湊。最近我哋仲聽聞ESF可能會考慮QBK加開學前班(?!)，雖然未正式落實，但我作為家長，聽到呢個消息嘅時候，內心確實幾擔心——如果本身100人嘅環境已經咁熱鬧，再加多一班學前班，無論係人流、空氣流通、定係洗手間嘅使用，會唔會超出咗呢個校舍原本嘅承載能力呢？
我完全明白學校嘅發展需要，亦都相信學校喺教育方面嘅專業判斷。只係因為我哋之前用過呢個校舍，知道佢嘅空間大小，所以會更加關心幾個實際問題：例如課室嘅通風同空調係咪足夠應付多咗嘅小朋友、洗手間嘅設施會唔會太繁忙、尤其係室內活動空間有限嘅情況下，如果遇上流感季節，會唔會容易出現交叉感染嘅情況。當然，我相信學校一定會做好相關嘅衛生同管理措施，呢點我係有信心嘅，但作為家長，難免會希望學校可以多啲考慮呢啲細節，俾小朋友一個更舒適嘅學習環境。
整體嚟講，我哋好感恩小朋友可以成為ESF一條龍IB大家庭嘅一分子，亦好期待佢可以喺鰂魚涌幼稚園K2開心學習，之後順利升上心儀既鰂魚涌小學。作為家長，我哋只係希望小朋友可以喺一個舒適嘅環境下成長，我相信呢個亦都係學校同我哋一致嘅目標，一齊為小朋友創造一個愉快嘅學習環境。 | 
發表於 
