打機已經變成人生一切

gunsix

有冇家長面對相同問題? 由中一開學至今, 唔係網課就係返半日, 課外時間全部被打機佔據, 逐漸功課冇心機做/唔想做, 或者只用嚟交換耐啲打機時間, 返學只為應酬我地, 打機先係目標

試過 block desktop network, 佢打手機 game, block wifi, 佢用 mobile data 打, 打去電訊公司, 佢地話冇得 suspend mobile data, 仲 sell 我多幾 G 數據 plan

其實我唔係要完全禁止打機, 只想適可而止, 而且佢一邊打一邊同網友傾計, 竟然練到普通話/國語, 加上成班同學都打機, 唔打機會冇晒話題...

同佢傾過/分柝過, 打機只係娛樂, 花太多時間精力冇意思亦幫唔到自己, 佢話打機好開心, 好開心就夠, 呢個可能係重點, 佢成積麻麻地, 體育又唔善長 (加上球場長期唔開), 根本冇野提供到成就感, 唯有打機...

唔知點算

Yanamami

https://www.edu-kingdom.com/foru ... ead&tid=2905186

有版你睇……

gracelam

gunsix 發表於 21-5-10 14:11
有冇家長面對相同問題? 由中一開學至今, 唔係網課就係返半日, 課外時間全部被打機佔據, 逐漸功課冇心機做/ ...

中幾？

收手機，出部傻仔手機(只可打出打入)，學校whatsapp group改你個電話号碼 ，屋企cut wifi。

如果學習態度一日唔變，都唔會恢復原狀。

初中仲有得救!     

ren

可否協議set個時限，當係為眼睛健康着想
或者同佢講今日限制佢打機，就係想佢將來可以有多些時間打機，我成日叫我仔睇下老豆今日之可以日打夜打就係因為讀書時打得少，讀到書，搵到份舒服工有閒錢買機買game. (我成日擺個憂心樣講，死啦死啦，宜家日打夜打，20歲後就要打份辛苦工冇錢冇力再打了。。。）

bobbob

gunsix 發表於 21-5-10 14:11
有冇家長面對相同問題? 由中一開學至今, 唔係網課就係返半日, 課外時間全部被打機佔據, 逐漸功課冇心機做/ ...

多口問句，你以前有無沉迷咩玩意荒廢學業？

Jane1983

你最了解你仔，用佢最能夠領會的方法教曉佢 —— 未來5年，係好寶貴的5年。你用來打機好開心，之後呢？中六升唔到大學，出來打工，搵到咩工？前景係點，收入係點？5年的好開心，分分鐘係透支以後50年的。

有人會在盛夏，帶少年人去地盤附近，比佢地感受吓，搵錢幾辛苦。唔好以為唔讀書，以後幾十年都係屋企繼續無微不至咁照料。

Azzurro

老人家：年輕人不關心的話，騙子們會幫你關心老人家

老公/ 老婆：另外一半不關心的話，其他女人/ 男人會幫你關心

在學年輕人：父母不關心的話，遊戲機/ 網絡/ 酒精/ 黑社會會幫你關心

年輕人在家無所事事，沒有其他愛好的話，確實也只能被遊戲機/ 網絡關心
說宏大的目標，遙遠的未來是沒用的吧

讓年輕人多參加各種興趣班，興趣是培養出來的，需要引導的
學籃球也不是有個籃球就可以，學費是省不了的
學畫畫也不是買紙買筆就可以，學費是省不了的

gunsix

Yanamami 發表於 21-5-10 14:25
https://www.edu-kingdom.com/forum.php?mod=viewthread&tid=2905186

有版你睇……

160 幾版? thanks, 慢慢睇

gunsix

bobbob 發表於 21-5-11 10:15
多口問句，你以前有無沉迷咩玩意荒廢學業？

以前呢... 蒙面超人玩具, pokemon 卡, 爆旋陀螺, 四驅車,  pokemon go 手機 game 等, 當時都好迷, 不過未至於唔想做功課囉

gunsix

Thanks all

媽咪要求完成功課前收手機, desktop internet 要全 block, 佢求其交差, 媽咪點會睇唔出, 於是要佢重做/改正, 佢就發老脾, 鬧媽咪反口冇信用

我又試過同佢協議, 嚮佢學校假期攞咗佢部手機返工, 但留低我自己部手機嚮屋企 (佢開唔到) 以示公平, 佢反應平靜, 不過照樣唔溫書, 一係瞓覺, 一係打 desktop game (single mode, 冇 online)

我地由佢小五開始已經成日同佢講中學階段係人生最重要, 不過佢對將來 (無論長期短期) 好似冇要求咁, 眼前開心就得喇, 其他話之

嚮 youtube 搵到以前港台定無線講隱蔽青年啲節目畀佢睇, 同佢講你再打落去只會咁, 佢話唔想, 但轉頭又打機!

嚇又嚇過, 鬧又鬧過, 氹又氹過, 都冇咩用

感覺到佢根本連返學為乜都唔知 (或者冇興趣知)

唉...

bobbob

gunsix 發表於 21-5-11 12:34
以前呢... 蒙面超人玩具, pokemon 卡, 爆旋陀螺, 四驅車,  pokemon go 手機 game 等, 當時都好迷, 不過未至 ...

咁你點令自己冇咁沉迷？

gunsix

bobbob 發表於 21-5-11 12:50
咁你點令自己冇咁沉迷？

Sorry, 我睇錯咗, 以為你問阿仔以前沉迷咩...

我以前打街機多

戒打機係因為自覺唔可以繼續落去, 於是主動群一班鍾意打波嘅同學 (佢地亦讀書), 自自然然就打波唔打機了

我亦同阿仔分享過經驗, 佢只係"哦"

Jane1983

回覆 gunsix 的帖子

留 desktop game，無一刀切唔准玩都係好事，畢竟而家d小朋友唔知佢點反應。無online的遊戲，係好過online好多。online game和同學一齊玩，好似賭仔的朋友晚晚三缺一拉你開枱，咁你點戒賭啦。
講道理，你要反覆用唔同角度去同佢講。唔係嘮叨、唔係鬧，係大家溝通，慢慢佢會明白。

另外，既然你以前都行過呢條路，咁你幫佢報籃球班，星期六日同佢一齊打藍球，幫佢搵打機之外的樂趣。由於佢起步較遲，打得唔好唔會鍾意，你開頭一定要陪佢練習，起碼上堂唔會差過人地好多先。

bobbob

gunsix 發表於 21-5-11 12:58
Sorry, 我睇錯咗, 以為你問阿仔以前沉迷咩...

我以前打街機多

所以要戒係要靠自我推動，一日佢搵唔到理由戒一日都唔會戒，你只可在旁輔導

gunsix

Jane1983 發表於 21-5-11 13:11
回覆 gunsix 的帖子

留 desktop game，無一刀切唔准玩都係好事，畢竟而家d小朋友唔知佢點反應。無online的 ...

係呀, 我明白道理講一次唔夠, 根本佢有冇聽都成問題, 所以成日重覆又重覆...

體育媽咪最近同佢報咗跆拳道班, 上咗兩堂, 暫時只可話未抗拒, 不過一星期只有個半鐘, 擔心成效

我都好想同阿仔打籃球, 不過佢怕熱 (冷氣兒童), 而且最大問題係籃球場成日人山人海, 要朝六七點先冇人, 莫講佢起唔到身, 我都頂唔順

Jane1983

gunsix 發表於 21-5-11 13:24
係呀, 我明白道理講一次唔夠, 根本佢有冇聽都成問題, 所以成日重覆又重覆...

體育媽咪最近同佢報咗跆拳道 ...

體育活動一定要玩得ok好，起碼唔會被人話差，先會有樂趣繼續玩，亦要咁先聚到朋友。靠一星期一兩次的班，肯定唔夠，你想幫佢就要搵時間。

跆拳道唔係唔好，但初學比較難自己練，亦難聚到朋友。

Yanamami

gunsix 發表於 21-5-11 12:31
160 幾版? thanks, 慢慢睇

160幾版，家長各出奇謀，為時六年，真係出盡八寶都搞唔掂，越大就越無可能搞。而家唯有家長盡量唔好俾佢係屋企，多尐外出分散注意力同時間，順便放電。屋企人多尐準備節目，行山踩單車去沙難。個帖入邊家長俾左好多idea啦。逐個試啦。

cafeva

比我會完全禁止打機! 好似幫佢戒毒咁幫.
其實點解會開始打機?

ckmammy

gunsix 發表於 21-5-10 14:11
有冇家長面對相同問題? 由中一開學至今, 唔係網課就係返半日, 課外時間全部被打機佔據, 逐漸功課冇心機做/ ...

由而家開始製定每日打機時間， 例如最多個半鐘。 成績唔好扣時間，成績好可以加多少少時間。 雖然我知好多家長唔贊成用增加打機時間作為獎勵，但既然小朋友最鍾意係打機，呢個亦都係一個可試既方法。 起碼我個仔用呢個方法成績不單冇差，仲好過以前 。

而家疫情好轉， 小朋友最鍾意乜嘢運動，叫佢選一樣作為定期做嘅運動。 如果真係唔鍾意運動， 可以學下编程，音樂， 畀佢試下唔同嘅嘢。 相信總有一樣佢會有興趣。 我個仔中一， 同樣打機都係佢最鍾意嘅活動。 但我同佢講每日只可以打限定時間， 而且成績一定要保持級頭。佢有學琴， 也選咗一樣佢鍾意做嘅運動 ，亦都畀佢學緊編程，嚟緊仲參加比賽。 總之喺課餘嘅時間畀多啲其他嘢佢做。 當佢多咗其他嘢做 就自然唔會成日得閒打機。

仲有，得閒同佢講下將來想住大屋定劏房，想食高級壽司定 去麥記整包畀人食。 想喺冷氣房做老細點人做嘢定係喺出邊日曬雨淋做地盤...... 要享受就要讀書。