請教 家有亞氏保加症/自閉症譜系小朋友嘅家長

keelkying

想請問一下確診咗亞氏保加症(自閉症譜系)嘅小朋友，你哋係喺邊度做評估㗎？評估完成之後，請問社署有冇轉介到啲咩服務，例如E/I位，又或者係轉介去醫院做言語/物理治療？

我小朋友3歲，早兩日啱啱去完CAC見姑娘，姑娘話要等起碼15個月先有可能見到醫生做評估，佢都有建議如果想快嘅就可以揀出面嘅私人機構去做。做私人評估呢舊錢唔少，所以我想先了解下有呢個病嘅小朋友經社署轉介嘅話可以排到啲咩訓練或者服務。

姑娘都有講因為佢覺得我小朋友認知同言語方面冇太大問題，變咗未必可以排到好有用嘅服務，咁其實會唔會我喺出邊搵私人機構同佢上一啲控制情緒同行為嘅課堂會比較有用呢？

希望大家可以俾啲意見，謝謝。

bcbym

我仔3歲左右係政府診所做評估，原本係話要排大約1年，後來突然打電話嚟話有位，最後大約排咗4個月。醫生評估完係自閉症譜系，咁阿仔個case就直接轉去醫務社工，主要係問你想排E定I位，要唔要排兒童精神科， 我仔本身讀緊N班的學校有E位，所以我揀咗E。 兒童精神科，可以俾轉介信，拎信去醫院排。

E位排咗2年，係K2時候開始有，會有專門老師每日係學校跟進，兒童精神科排3年先會見到醫生……但係開咗file先算。

我仔講嘢比同齡仲好，好有邏輯，理解力高，但係不代表佢沒有自閉症。 入E 位前，依家一般都可以有到校服務，會按小朋友的個別情況，俾語言治療/職業治療（即係大小肌訓練）/社交訓練等。依家老師一樣會做語言訓練，佢係好多嘢講，仲要極度有道理，但因為佢地係社交語言上不足，語言訓練都可以幫佢地改善點同人溝通。 所以總估嚟講，只要評估到有係有特殊學習需要，就一定可以找到可訓練的項目，無可能“冇咩用”。  
對小朋友有特殊需要有懷疑，真係唔駛考慮太多，去做評估，6歲前做訓練係進步得最明顯，有能力就俾錢做，一樣可以refer返社署。