本帖最後由 BK_Milk 於 19-9-17 10:25 編輯
作者：鯊魚太與寶
9月份除咗係小朋友開學嘅大日子，仲係唔少熱門幼稚園開始招生嘅時間；依家啲人成日都話贏在起跑線，「識生一定要生大B」呢個概念，每年令唔少細B家長為入學問題而苦惱，當中包括上年嘅鯊魚太！到底喺過程同現實中，細B甚至係超細B所面對嘅嘅情況，又係咪真係咁惡劣？
喺報讀學校年齡層方面，大致分為5類：早一年出生嘅超大B，月份由9月到12月不等，視乎報讀學校收生標準；年頭出生嘅大B，出生月份由1月到4月，隨後就有5至8月出生嘅中B，9月到10月嘅細B，同被稱為超細B嘅11到12月出生小朋友。
如果你講緊小朋友嘅認知能力，其實頭頭尾尾去數，足足差咗成年有多，真係話完全無分別都係呃你，之但係在於面試呢個短促又緊張嘅數小時入面，年齡又係咪真係愈大愈好？
更多文章：【幼稚園入學】K1面試必備！TOP 10教育玩具
更多文章：【幼稚園入學】2020至21學年 幼稚園入學申請流程懶人包
大B唔一定有著數
講到大B同超大B係咪一定有著數呢個問題，鯊魚太認為都只係一半一半，好似有人認為學校偏向鍾意收戒咗片嘅小朋友，噤大B同超大B戒咗片嘅機會率，應該點都比細B同超細B高，但又唔代表超細B嘅小朋友唔可以早過超大B成功戒片，所以某程度上呢個著數位都係視乎小朋友個人自理能力培訓。
重點係面試高峰期正正係大B同超大B踏入Trouble 2之時，雖然表達能力較高，但自主性、認知、情感表達能力亦相對更高，做細B嗰陣未識驚，更加唔知咩係怕羞，反而一年過後，可能會變得扭計，或者「選擇性」講嘢；如果小朋友唔係坐定定型，隨時仲難搞過細B嘅時候！
抓緊重讀時機
有人又話「細B」同「超細B」可能先係最著數，皆因第一年考唔到，仲有得再考過，又或者可以選擇重讀，總之就係人生滿希望；其實每個小朋友喺幼稚園階段都有一次重讀機會，只係作為家長嘅你想唔想？唔通讀得好好地，又要佢轉校讀多年咩？可以的話，相信人人都想小朋友可以一take過入到心儀學校。
至於有家長會因為升學問題，又或者小朋友學習步伐考慮重讀，個人認為選擇重讀唔係問題，重點嘅係時機，唔適宜太遲為小朋友安排重讀或轉校，特別係喺K3，小朋友已經建立個人圈子，望見朋友仔開開心心準備畢業升小，自己就好似落後於人咁，即使你話係為佢將來好，但呢一刻對其心理都會造成一定程度嘅影響。
中B才是慘慘豬？
總括大B同細B嘅優劣之處，有唔少家長認為中B先係最輸蝕嘅一群，唔夠大B認知能力高，但又唔似細B有得揀，只可以夾喺中間做夾心人！鯊魚太就認為呢個結論都係可圈可點，介乎喺中間位置，其實中B相對比較容易照顧同管理，唔似大B太有性格出現扭計情況，同時按著小朋友年齡發展，自理與表達能力亦比細B好；其實如果考到，又使乜好似細B噤又要再揀做大B呢？
所以其實每個年齡層都有佢嘅好處，最重要都係按照小朋友需要，去選擇適合嘅學校，與其成日掛喺嘴邊話為咗佢將來好，不如好好照顧佢呢刻感受，唔好過份將未來嘅壓力帶到現在，讓小朋友好好享受童年！
更多文章：【幼稚園入學】孩子入學前必買推介（含文具、童書、飯盒）
更多文章：【幼稚園入學】看幼稚園概覽前必讀！非牟利、私立、國際幼稚園學費比較
| 
發表於 19-9-17 10:24