【Trouble 2 好難搞】我都無體罰，點解你打人？

BK_Milk

作者：艾安素記事本

小朋友踏入Trouble 2之後，父母要面對嘅教養問題，可以話係一浪接一浪，隨住成長不斷轉變，你會發現佢嘅自主性愈來愈強，即係意味住佢開始識駁嘴，識乜都講唔好先，又識同你討價還價，叫佢玩多3分鐘，就要求玩多10分鐘，而最後又唔認數要繼續玩，之不過偶然都會好聽話，真係收檔嘅，面對呢啲局面，確係好似搭緊過山車咁。

不論男女，除咗駁嘴之外，小朋友嘅反抗行為亦會增加，打人或者郁手郁腳嘅攻擊性舉動，其實都係由於求生本能而引發；喺呢個唔多盛行體罰嘅年代，好多父母都唔明白，點解我哋從來都唔打佢，但小朋友卻偏偏鍾意郁手郁腳，更加會傷害別人呢？

一開始接到老師反映，作為家長都會不知所措，但退後一步諗，其實喺一般情況下，小朋友係唔會無啦啦打人，通常佢哋都係遇到「不如意事」先會動手，例如：喺佢玩嘅時候叫佢沖涼，又或者佢想玩嘅玩具喺其他小朋友手上，總之喺佢眼中，呢個行為只係等於情感表達。

喺了解咗小朋友出發點後，下一步就要認真話佢知如何正確作出情感表達，例如：應該用嘴巴去表達自己，手仔嘅用途唔係要嚟打人，動粗行為唔單只會傷害別人，仲會令媽媽傷心等等，無論要同佢講幾多次，都一定要講，雖然佢未必可以即時更正自己嘅行為，有時手仔仲係快過個腦，但千祈唔好放棄，久而久之，佢一定會知道！

呢段日子確係唔容易，要故作嚴厲又會心痛，有時都未開始講，佢已經喊到七情上面，都想心軟一下；又或者已經比佢放咗成日電，佢仲同你博鬥，心確係好累，但成長就係咁，有苦自然有甜，當你同佢講：「I Love you！」，佢竟然識得回應你一句：「I Love you too！」，嗰下甜上心頭個感覺真係好神奇！

即到親子王國睇更多育兒／教育資訊。