今年讀緊中一既請入

joanray

囝現中一，入到心儀既B1英中。小學成績要20-30名，數班強，中文弱。
小三至小六，為左個呈分，我同佢都辛苦到想死。我個埋筆記，幫佢溫習，佢就操advanced 題目。為既係爭盡每一分入B1。

已考完呈三，佢覺得已成定局。開始懶散。
到入左中學，情況更差。因為開始想唔幫佢太多，要佢自己習慣自動溫書，但返左三個月學，完全做唔到。

暫時成績中等，成日話中學唔會好似小學咁9x 分。但你都唔係明明識做既野都同我錯返黎。

結果，第一次考試我完全放手，希望佢跌獲甘，會學識自動自覺！
其實有冇呢個可能呢？

YolandaTam

中三學生家長可否搭訕呀？

joanray

YolandaTam 發表於 18-12-7 19:46
中三學生家長可否搭訕呀？

Sure welcome
比比意見！

YolandaTam

我諗中一同學放鬆咗係人之常情嚟：
1)高小辛苦咗幾年，咪好似我哋趕完年度大 project, 真係身心俱疲
2)如果讀書一向一帆風順，點會諗到驚濤駭浪就喺前面
3)中一上學期，除超谷校外，好多學校係蜜月期，同學見啲嘢熟口熟面，戒心自然下降
4)中學課外活動多姿多采，年輕人好玩，再識班朋友一齊，互相影響，打機，追星，全部令人放鬆，十分吸引
5)阿媽放手，如同放監，唔玩就係傻

Yanamami

其实道理十二分简单，純養左六年既野生动物，放生番去野外既求生技能基本上係零｡拉紧左六年既橡皮圈已經鬆哂｡The damage is done. 但都需要由而家开始忍痛改变，唔可以期望六年下來既坏习慣－个考試就可以改到｡大概学习态度同技巧先係而家首要任務，而唔係成績｡对你仔黎講－下子全放手亦可以想像结果会係点｡

YolandaTam

但我仍主張放手。
父母發功，非長遠計。成績由佢跌吧，小女自小五起自動波，中一都懶。
到中二，醒覺再咁落去個底差會揀唔到理科，成績回復中上。
所以唔駛担心，父母要做嘅係令小朋友知道讀書係佢嘅事，父母只係協助。多啲引導佢諗將來，佢一旦揾到自己理想，成個人會唔同晒的。

joanray

YolandaTam 發表於 18-12-7 20:09
但我仍主張放手。
父母發功，非長遠計。成績由佢跌吧，小女自小五起自動波，中一都懶。
到中二，醒覺再咁落 ...

但係要佢自己都發覺，呢個係最難既問題
中二已知道好好呀！我都唔知要等到幾時！

妹妹頭

回覆 joanray 的帖子

我女都係岩岩中一，小學一直都在級十內，呈分唔算辛苦，入左心儀自行一B1中學，但我並冇一下子放晒手，相反我會旁觀，佢有唔明會問我，UT我有教佢溫習(因為Geog，Sci，History依3科佢從未接觸過)，其他佢自己可應付到，我就冇插手。黎緊考試，我會又放多少少手，佢應該學到點去溫習，希望下學期我可以全放手就好。

YolandaTam

joanray 發表於 18-12-7 20:11
但係要佢自己都發覺，呢個係最難既問題
中二已知道好好呀！我都唔知要等到幾時！

咁好睇佢性格嘞，如果佢好要面，見自己退咗應該會知衰嘅。

持之以恆

我仔小五我已放手，因佢對學業有要求，所以會自主學習，今年中一，我更加完全冇插手，佢亦冇任何形式補習，成績大部分科目不錯，在大池中好適應。
所以要睇小朋友性格，不過上到中學，正常都要靠小朋友摸索，家長最多提點下學習態度。

Haz-mama

我女上左中一， 學業上我已經放手， 基本上， 我無乜野可以幫到佢。升左中學， 我女學會自己寫筆記， 自己搵方法温書， 宜家只補數學， 無其他補習， 一星期有兩日留校課外活動， 剛UT完， 成績不過不失

hihihi

我大女今年都係中一，學校不斷強調家長要放手俾佢哋學習對自己負責，但家長指引依然有需要。眼見呢個階段朋輩影響力好大(同一句說話我講佢唔聽， 但同學講就即刻跟住做)。現在只是form 1, 與其執着成績，不如多花心機教佢正面態度，相信差極有個譜。但最緊要同佢哋有偈傾先有得搞。

kirstyau

到。我全放手，一來太多科，我都唔會識，最多佢唔識要補幫佢搵下邊間好/人地介紹上門好。

暫時成績有中至上。佢自己會唔開心，但我睇得好開，同阿女講先剛開始適應中，慢慢來。

sfuhsg

小三四已開始半放手，我主張勉強無幸福，如果冇左我唔識讀書，就算入到神校都冇用。

今年中一全放手，會哦下佢要溫書，但唔會落手落腳同佢溫喇，成績中上，但佢都知自己懶，我只係叫佢為黎緊既exam定目標，唔想破壞大家關係。你咁樣，我睇字都覺得辛苦

kkhon

joanray 發表於 18-12-7 18:49
囝現中一，入到心儀既B1英中。小學成績要20-30名，數班強，中文弱。
小三至小六，為左個呈分，我同佢都辛苦 ...

認同樓上網友说及早放手！我重視態度比成绩多d。要比佢知道每个角色都有他的责任。经过差不多2年呈分搏鬥同考中学，我元气大傷+上仔的中学主张自主学习，我知道将来係要靠佢自己，吾可以再跟落去，所以我已退下火線，只從旁觀察從而提点。好快中一过去了，差不多小子有温書做齊功课，但不算勤力，玩下讀下。如我所料，雖然冇吾合格，但只能在中游位置。今年中二跟他商量選科意向，他誓神劈願话要考好不能再做中/下游，好等能揀到心仪的科目。早排测验及現考试中，我看到他比之前認真和温習時间多了。其实等他自己醒覺由心去做才是最好，我希望他不是齋噏能保持這態度。

TwinWong

joanray 發表於 18-12-7 18:49
囝現中一，入到心儀既B1英中。小學成績要20-30名，數班強，中文弱。
小三至小六，為左個呈分，我同佢都辛苦 ...

中學係要放手 無可能跟得贴
比期望大家 定下目標
可以先續一個UT 同exam
定好每科每次提升3-5分
佢见到自己續漸提升就有成功感
會好快回復過來

我細女小學數較強
中一上學期無補即唔合格
學期尾追到A 两學期拉分係C
我已好滿足 起碼係成功第一步

rainwater

男仔係咪一般比較hea?  定係我個特別衰。我唔跟貼，UT咗我都唔知，家長日老師提先如夢初醒，我唔覺得佢有認真溫過囉！佢每逢週末都真係好似大人返完工放假一樣，好他調，我估成績唔慌好。最慘佢成績差都唔覺得upset, 只有我先會。

持之以恆

rainwater 發表於 18-12-8 00:53
男仔係咪一般比較hea?  定係我個特別衰。我唔跟貼，UT咗我都唔知，家長日老師提先如夢初醒，我唔覺得佢有認 ...

男仔hea是有，但在我仔學校，勤力的同學也不少，可能不少在小學都是級頭的同學，勤力慣，我在群組見到有D同學做功課好認真的，我仔平日就求其，祗在測考時先會認真。我在家長群組見有D家長又問U T範圍，又問學校為何冇past paper....,真係各人做法不同。

mcl203

joanray 發表於 18-12-7 18:49
囝現中一，入到心儀既B1英中。小學成績要20-30名，數班強，中文弱。
小三至小六，為左個呈分，我同佢都辛苦 ...

我小朋友已係中中階段，B1英中好處係學習氣氛，初中階段可以放手少理，小朋友亦會因應時段調整，始終朋輩間去到適當時間大家都會調整態度，佢一定知道或感受到，除非D同學認真晒你仲企係原位既本身性格如此。又除非，你本身係靠用盡力谷出B1成績才可入英中，咁就要小心提下小朋友了～～～

CCCK1234

joanray 發表於 18-12-7 18:49
囝現中一，入到心儀既B1英中。小學成績要20-30名，數班強，中文弱。
小三至小六，為左個呈分，我同佢都辛苦 ...

我同樓主情況差唔多，小學一直都會幫小朋友溫書，到左中一，一開始就放手，平時小測，默書，成績都麻麻，有時直到冇溫，到左第一次測試，成績只係剛合格，不過佢係有心溫書，只係好多科佢未接觸過，所以唔識點溫，加上好多科係英文，又唔識解，而家平時有時間，我都會陪下佢溫，唔會全部幫佢，希望佢慢慢適應