中大中文系（左丁山）

elbar

9月21日星期五早上，睇到星島日報頭版廣告，就係「遵理學校」（上市公司之補習學校）騷「名師」哥利，一共九位，全部係中文系畢業生，七位有碩士學位，左丁山最鍾意知道，人哋來自邊間大學畢業，一望，吓，九位之中，八位中大校友，一位港大，當堂產生一個疑問，點解咁多中文補習「名師」係中大師弟師妹，其中有乜含義？


於是將廣告傳開去畀一啲資深校友睇，收到三種回應，（一）補習學校廣告有針對性，為九位先生賣廣告，肯定面向畢明教落嘅specific audience或者target customer，咪就係考DSE嘅中學生，而又怕咗中文科，驚死中文唔掂，要搵補習嘅囉。（二）以前好多人唔恨讀中文系，依家唔同嘞，中文系碩士做補習嘅話，可年入千萬元，轉吓眼就可以上車買一千呎，而入中學教書嘅只能買到納米樓，中文系先至係神科呀，唔係環球商業。（三）中大中文系特別叻，特別醒，故此補習學校專向中文大學中文系學生、碩士招手，招攬佢哋入補習學校搵真銀，為上市公司爭取更大收益。小G之弟弟就係中大中文系學士碩士，又有港大碩士學位，兼得兩間大學之長，現任超級名校之中文科主任。左丁山問小G：「叫細佬轉行啦，以佢嘅學生嘅DSE中文考試成績，成日考到5**，一行出嚟，已經有簽字費加年薪千萬，益晒全家，為得個捱字嘅記者家姐買豪宅！」小G為之哭笑不得，話弟弟最唔鍾意人哋勸佢去做中文補習先生，有失身份喎，佢嘅學生之中，有文科狀元入中文大學讀中文系，唔知畢業之後會唔會畀補習學校獵頭呢？


廣告最反映到嘅其實就係香港學生怕中文科，與左丁山讀書時代最怕英文科一樣，所以補習學校以中文補習為賣點。唔怪得肥仔K女兒，只不過四歲，肥仔K已親自晚晚為佢講成語故事。K太又不時教佢背唐詩（遊子身上衣之類），與左丁山七歲讀馬經（老竇教）之情況，完全不一樣。教中文，肥仔K嫌台灣出版嘅，香港出版嘅兒童書十分沉悶，插圖少，文字多，引不起女兒興趣，諗住下次去東京就買一套日文漢字課本回來畀女兒睇，因為日文兒童課本有好多插圖，兒童十分鍾意，日文漢字書點讀呀？肥仔K話：「我講解文字，順便教埋女兒日文，佢為咗睇插圖一定有興趣學。」呢種方法不知有無成效，不過中文既然成為殺人科目，怕輸在起跑線，一於各師各法啦，否則到咗中學就要送錢畀中文補習學校！




左丁山