用戶登入
用戶名稱:
密      碼:
搜索
教育王國 討論區 教育講場 推動STEM(左丁山)
發新帖
查看: 222|回覆: 0
go

推動STEM(左丁山)

Rank: 12Rank: 12Rank: 12


70872
發表於 18-5-15 13:57 |顯示全部帖子



廠家F係非一般廠佬,佢年輕時留學美國,在名校畢業,回港後由學習至創業,如矮仔上樓梯,穩打穩紮,成為富商。廠家F所屬嘅一個社團,因領導人有眼光、有魄力肯出錢,老早自置會址,買入藍籌股票,復有會所餐廳年年賺錢,於是資產豐厚,零負債,每年就有餘力多捐錢,辦善事或資助教育。


上月,廠家F搵左丁山:「喂,我地想捐錢推動STEM教育,為本港創新科技儲備人才。錢就冇問題嘞,但點樣運用筆捐款去達致最佳效果呢?我地做生意,總想一蚊資本,做幾蚊生意嘅噃,捐錢都想有啲乘數效用。」講得真好,但左丁山係科學盲,對如何推動STEM,點會講得深入吖,但是廠家F盛意拳拳,都想佢為香港教育做啲嘢,於是搵埋電腦J,商商量量,搵齊一啲校友與廠家F及監事長W坐埋吃晚飯,來一次腦震盪。物理系博士L係私募基金主理人,佢話筆錢要用來推動香港叻仔叻女讀STEM吖,還是鼓勵理科尖子報讀大學理工科,放棄商科呀?哦,兩者有分別,如要後者,捐多啲錢畀大學理工學院提供全費獎學金及保送往美國著名工學院交換一年,就會有睇頭,如做前者,就要有大規模宣傳。


電腦工程校友/名校校長L就指出現時已有幾項中學生創科比賽,有一啲成績,特色係參加比賽嘅學校多不是名校,學生多不是績優生,但共通點係對創新有一份執着,有一個十零歲學生嘅構思已獲得中國專利,開始量產。但呢類比賽少見有廣泛報導,如果有更多資源,可以做得更大,更有影響力。咦,呢樣有得諗,不如出錢贊助中學生科技創作大賽,獲大獎者可獲獎金外,還可獲得某大學有條件取錄(Conditional offer),廠家F話可以再研究考慮。MBA校友CEO總裁Y就講佢個機構有不少富創造力之start-up,幾有前途,甚具勵志作用,於是人類學校友編輯W打蛇隨棍上話,本港可能有不少科技創業動人故事,甚少報導,總裁Y如徵得當事人同事,可找記者深入訪問,將訊息散播出去!設計工程校友A指出,佢間中學係名校,大力推動STEM,現代化設備儀器齊全,學生學習得好開心,對STEM非常有興趣,可惜好多時去到中三,家長就不再鼓勵學生參與,考試要緊嘛!


於是講到尾,家長心態好緊要,不少家長只係緊張子女之DSE或IB成績,中三之後,補習功課排第一,考得幾個5**就要佢地讀醫科或環球商業,當主修STEM係大後備。如何扭轉呢種心態,還有待社會討論。廠家F話大家成立一個討論小組繼續討論!




左丁山