迎合潮流EMBA（左丁山）

elbar

在小汀婚宴上，不少財經證券分析師出席，把他（她）們聚集起來，便是本港各電視台、電台、報章的每日主力「財經演員」，可惜當晚只顧飲酒，無緣向各位阿哥阿姐請教如何應對目前科技股當道，傳統藍籌股靠邊站的局勢，左丁山直覺上認為2000年科網股爆破的氣味，現在開始逐漸重現眼前，有啲驚驚哋。


已退居幕後管理基金嘅分析C走嚟打招呼，講起生意好唔好，分析C話：「現在靠晒內地客與內地金融公司，好彩2002年時報讀科大嘅IEMBA課程，但03年碰上沙士，課程要立即高度濃縮，俾我地快啲畢業，讀呢個degree嘅最大好處係因此而認識不少內地同班同學、內地機構，依家我幾靠呢啲關係打開局面。」


咪係囉，讀EMBA之類，你估做學術研究咩，最緊要學懂一啲基本管理，管錢、管人與及市場推廣概念，然後與成班同學打好關係啫，如果唔係，全世界咁多人爭住入哈佛、史丹福讀MBA做乜？1997年，一位年輕哈佛MBA係一間投資公司首腦，公司設在力寶中心，佢要請左丁山做出版部總裁，負責創立、收購刊物，進軍中國，左丁山問佢公司資金從何而來？佢話：「我哈佛MBA同學有一位係美國出版界大亨個孫，另一位女同學現在係微軟高層，佢地大力支持我在香港設立投資公司向大有前途嘅中國投資！」呢位有家庭背景，父親做過周恩來幕僚嘅哈佛MBA講得幾輕鬆呀，可恨左丁山當年係在曼谷讀碩士，冇乜猛人之後係同學。不過左丁山對佢後台搞唔清楚（父親曾為周恩來做事喎），唔敢加入佢嘅集團囉。


現在時興講一帶一路，香港人對一路就熟悉，對一帶就肯定多數矇查查。科技大學幾識睇時勢，識搵銀，宣佈與莫斯科斯科爾科沃管理學院（Skolkovo Institute of Science and Technology）開辦新EMBA課程，主打一帶，開辦「歐亞高層管理人員工商管理碩士」，學費每年101萬港元，2018年11月開學，招收40-50名學生，要有6-10年工作經驗，專門研讀中國、俄羅斯企業個案，了解以色列、矽谷、哈薩克斯坦、俄羅斯的創業模式，學生要到各地遊學考察，等學生認識一帶地區嘅文化歷史。咁睇法，明顯為進軍一帶嘅中資企業或跨國公司培訓熟悉一帶嘅管理人才啦，教埋俄文仲好，想話識多啲中亞細亞關係就最啱，不過學費貴一啲噃，讀17個月要101萬，非開公數不可，一於搵公司贊助學費啦！




左丁山