本帖最後由 Eat_Sleep_Play 於 17-7-26 23:37 編輯
DD仔 發表於 17-7-26 09:45 
1) 你是引用Eat Sleep Play的留言而作出回应，即是你并非单纯发表对“有實力的小朋友在升中的出路”的看法 ...
不要勞氣，相嗌唔好口，大家都係對 APS vs GH或
私小 vs GH發表意見，讓其他jm會有更了解的睇法，不如我又講下我自己的經歷........
6年前我囡都考過GH，不過GH唔收，無緣在此 XXX vs GH 
不過僥倖地APS同XXX都有offer，最終我哋選擇去了XXX，因為我不想阿囡在APS做蘿底橙
XXX小一有150人，分4班，每年都有人走，到我哋畢業時已經剩返125人，計埋5個插班生，即係6年來走咗30個同學，以我知道的，小二走最多，好多去有直屬的學校。最多走去喇沙、亦有天神、聖家之類，通常小二走嘅都係跳船能力高，有本事走嘅，而讀唔掂嘅會睇多一兩年先，最終有D轉讀國際學校，上年小五升小六亦有女同學轉去DGS.....
你話在私小易唔易讀？我可以話一D都唔易，D人成日都話教淺考深，其實我覺得唔係教淺考深，而係考卷有一半題目都係課外嘢，即係話就算你將考試範圍調轉識背，亦唔代表考試可以攞高分，極其量約1/3至一半左右。以中文為例，考嘅課外嘢會係標點符號、修辭手法、排句成段、以詞代意、問文章主旨、幾篇閲讀理解，三年班開始考埋文言文，又要考課外讀本西遊記、三國演義之類......範圍廣泛，有10頁紙，主科考試考70分鐘。所以，就算讀識哂考試範圍都好，如果其他課外嘢唔識，考試都有機會唔合格。我哋每年計兩科主科低過60分要留班，但留班多唔多？唔多，咁多年嚟得一個同學小一要留班，其他如果真係讀唔掂，會自己搵方法轉走。
到了五年級呈分試，個個同學搏老命讀，我囡3科9字頭，1科8字頭名次也大跌廿名 
，失望是有的，但阿囡已盡了力，有時考試講運氣，課內有範圍個個讀到滾瓜爛熟攞滿分是正常，大部分同學都係衰課外，如果課外問正果D嘢你識，考試就會高分，反之咪失手無咗幾分至十幾廿分，隨時可以跌一個grade，所以要在學校做頭果浸絶對唔係一件容易的事⋯⋯ 
上到六年班，開始考學校，我哋呢D無中學的學校對升中支援係非常之好的，學校自小四起已有升中講座，每年又有已經升中嘅師兄師姐回校分享中學生活。小四暑假起已經開始要上面試班，小五又要上、小六又要上，又小組又個人又中普英，學校又會教做portfolio 又要作中文英文自我介紹又要背比老師聽，六年班開學無幾耐就要逐個逐個見校長模擬面試，學校又會出推薦信，又會針對每間學校比返D舊題目去做練習，校長成日都講，機會是留比有準備嘅人，學校幫得幾多得幾多。
到了埋身考學校，男有男考女有女考，教練拉隊去DBS interview，10月已經有offer，連第二次呈分都未考，收得嘅係讀書又叻運動又叻的男同學，心儀喇沙嘅在自行時如果得咗會收到brother強烈明示，坐定粒六等放榜。但女仔無呢支歌仔唱，要憑實力逐間逐間考，DGS、HY、Paul Con、GH...咁多間學校，德望收我哋係收得最多，今年第一round收咗13個女仔，排名去到四十幾五十都收，我以為我囡好大機會，點知second in時唔識答一條關於學校的問題，變咗waiting，係waiting，排名在阿女之後的全部入哂，失望是有的，排名前前後後的全部都入哂係賴低我囡一個，唔識答一題啫唔洗死得咁慘烈，唯有收拾心情準備自行......
自行阿囡揀了兩間top school，一間在學校前一條街，一間在尖沙咀，前一條街果間係全in，我哋學校有10幾20個女仔去in，有D排名在我囡前面，但佢哋已經個個有直資offer，所以今年一個都收唔到。至於尖沙咀果間，佢係揀人in兼最遲成4月先in，在全港申請表揀60個女仔in，最終收11個。唔知點解...呢間學校我哋年年都無女仔去in，唔係因為睇唔起，而係因為位少唔敢搏，因為in得呢間，一定要做前面果浸才有機會，好彩阿囡呈二爭返氣上返級十幾，前前後後的同學已經有直資收哂，賴低我囡孤兒女無人理，唯有把心一橫考呢間top school，全校得我囡一個去考，最終結果就係擔驚受怕幾個月之後先知道美夢成真 
回想這個升中遊戲，係好難玩，在私小內....頭個浸多數一早已有直資offer唔會等放榜，小學比開錢嘅唔會介意中學繼續比，而且大部分學費都平過我哋學校，大家都覺得好抵讀。尾果浸會考一D二線直資，而且學校的校內及校外的運動教練識人多，好多時都會做推薦，其他學校會比面留返D位比我哋，坦白講叩門時係比官津尾果浸著數少少，所以私小支援大這個是肯定的，但不能預測的是結局，就算在私小頭果浸，也不能坐定粒六預計自己一定會入到乜乜乜學校，太多因素影響結果，所以...如果你心儀德中，咁德小一定最大機會，但如果你覺得只要是一間band 1學校都OK，咁私小會係一個唔錯的選擇。
我的分享係咁多，希望各位的小朋友最終也能有美滿的大結局
| 
發表於 17-7-26 11:27
