32網加部份31和40網叩門分享

choikiuma

本帖最後由 choikiuma 於 18-6-6 11:45 編輯

之前參考前人一些分享，做了一個叩門表，有前人話十幾間也不過份，二十幾間也很平常，放榜前一二星期開始download 各學校叩門表，預備定所需文件。

http://www.edu-kingdom.com/forum.php?mod=viewthread&tid=2577913

http://www.edu-kingdom.com/forum.php?mod=viewthread&tid=2757313

http://www.edu-kingdom.com/forum.php?mod=viewthread&tid=2996560

放榜當天，中了寶校，唯有儘叩表上既所有學校。選校策略，本身是32網，新大天3條1，唔夠膽放另三大(舊大天，基榮，協和)入乙二，三，於是放沙崙第二，塘官第三，點知都唔得，跌到第七基全。明年龍年，策略應是選第一心儀，第二塘官，否則會跌去基全。聞說教局派了二百五十位學生比基全，唔怪得咁多人入基全。


我第一選新大天(3條1)抽唔到，叩門都冇消息，此校所有人(超過二佰)都有面試機會，考學術性問題，如spell book,計5+3，等等，不過交叩門表時，要交自行和統一表副本，所以選佢作第一，可能有少少分加。家長不用面試。終於在備取生註冊的第二天，收到offer,皇天不負有心人，這間我寫了好幾封求位信。

第二選沙崙，浪費了，此校選第一才有機會抽到，另外，佢會優先見選第一的小朋友。有人選第二志願，放榜當天一早交表，即日call面試。我們十二點才交表，冇面試機會.（今年消息，有人抽獎放榜前交叩門表，於放榜一星期前已有offer)

第三選塘官，舊年選第四都可以派入，今年選第三唔入。我建議第一選心儀，第二選這間，才有機會。這間學校要考筆試和小朋友面試，家長不用面試。這間我在備取生註冊日第二天收到offer.

choikiuma

大角咀天主教(舊校)，這間學校要選頭三志願，先獲面試機會，我們識人才獲面試機會，雖然有幸入第二輪面試，但校長見我哋頭三志願冇選佢，質疑我哋誠意唔夠，和對學校認識唔深。第一輪面試考畫畫和問問題，第二輪家長和小朋友一起跟校長和副校長面試。所以第一選心儀，第二選塘尾，第三選舊大天(博有叩門面試機會),這應該是龍年32網穩陣選校方法。我32網4大內3間都有offer,唯獨這間沒有，我估呢間應該唔收000

太子協和，面試形式非考卷，是考指令，對阿囡有利，終於這間是阿囡第一個offer。老師有mark到達時間，聞說有睇家長衣著，和觀眾小朋友有冇睇圖書，家長玩手機還是看學校小冊子，這間我有寫叩門感謝信，順利攞咗第一個offer.

基榮，交咗profile,學校選人面試，我們是000，都有面試機會，有人000都有offer,我們在候備生註冊第四天才收到offer.

跟著講31網，基道，應該所有人都有面試機會，我們在備取生註冊當天才有offer。面試前半部老師先見小朋友，計時做卷，後半部見埋家長。我們是最後一個見，老師趕住收工，表現好求其。這間學校好混亂，放榜後打電話問學校，幾時停止接受叩門交表，老師話未定，叫我儘快交，因這間有倆天面試日，第一天是第一個星期六，第二天下一個星期二，咁我當然遲啲交表，博星期二面試，因星期六已有很多面試，但過咗幾日再打去問，學校竟然話已deadline,我話之前有老師話未定deadline,點知會突然deadline,個老師話如你想交叩門表，就照交吧。儘管自己覺得倆母女都表現麻麻，後期唔記得幾時，都有問我哋有冇興趣入讀。

羅裕積，小朋友和家長分開面試，我估小朋友考唔深，好似都是照抄生字。家長面試，問好多關於對學校既認識，如學校有什麼活動等，如何配合學校等，這間我雖然唔係全部識答，但我引導老師同我吹水講關於育兒，面試完後自覺ko了。但是這間學校應該是唯一一間在註冊日當天才通知家長的，我早上未夠九點收call

循道，也是考卷的，自覺無望，結果是rejected.

方樹泉我也照叩，六月尾收call話歡迎入讀

choikiuma

跟著講40網
開平，如你有一條1,和放榜當天即交叩門表，好似即刻面試，小朋友會考一份好淺既卷，如寫A-Z,其他冇選第一就安排後期面試，考一份好深既卷。如ok, 即刻跟家長作第二輪面試，一倆日比offer。開平越來越勁，明年唔知還會唔會對第一志願生有優惠。(更正：有網友話111才卷淺）

善導，這一間是二線頭，一線尾，應較容易攞offer,也是候備生註冊日第二天有offer

荔枝角天主教，這間是放榜後第一個星期六八點幾面試，撞了新大天冇去，因網上冇講幾時面試，白排隊交表

基福，跟開平一樣，如有一條一，會獲優先面試，考得較淺，我們冇第二輪面試機會

瑪神，撞了基福面試日期，冇去。

長沙灣協和，只獲第一輪面試，冇第二輪。

還有倆間神校，都是報來玩吓，當然冇機會。

叩門前預備，早一年半載，要諗定想報咩學校，一二三線也有，因你唔知會唔會被派去寶校。放榜前倆星期，各小學陸續上載叩門表和資料，整定一個叩門表，和影所定所有有關資料，有一些面試唔撞其他學校，又接受放榜前交表，可先交，其他有機會撞面試時間，要策略性交表。如新大天已定第一個星期六九點面試，撞了太子協和面試，於是我在最後一日才交表協和，獲11:15後段面試時間。新大天雖然是全部人九點面試，但還是有分別的。面試當天，等副校一講完嘢，我們即刻排隊佔頭位，可以早一點面試完。當天9:40面試完新大天，跟著10:05去舊大天第二輪面試，10:45面試完舊大天，又飛的去太子協和。

放榜後第二個星期六，一樣有三間面試，第一間是8:30基榮，跟著9:05善導，第三間是中午面試聖羅撤，第一間和第二間只差35分鐘，學校又唔比改時間，唯有硬著頭皮照去，博遲到學校照比面試。基榮九點前面試完畢，上的士已經是九點，去到善導冇咩人，我們已遲到十分鐘，校工只是吩咐我們在課室門外等，幸好上一個學生還未面試完畢，我們到步後還要多等15分鐘才到我們面試。

choikiuma

所講既學校差唔多講完，每一間面試完畢都有寫叩門應謝信，內容包括諗同學校辦學目的，學校三年計劃，講吓女兒的優點，講埋如學校收了，會參加家校活動等。

由於面試完協和後，倆星期後就有offer。所以其他學校就沒有再寫信，只是仍繼續寫信比新大天。六月尾寫了一封信比新大天，更新個人檔案和學校成績表，個人檔案第一版封面阿囡張相是在新大天學校門前拍攝的，跟著最後一封信是在七月三日即備取生註冊當天寄出的，內容是認同校長的話，講吓培養阿囡之道，寄埋阿囡寫字功課比校長睇，當然啲字寫得幾好先比。留意寄信timing也很重要，候備生註冊日是大執位日，前後寄信很重要。

看了很多人問個情形點點點，應該寫信嗎？又有很多負面既人話寫信是冇用的，但我相信是有用的。對神校或名校可能作用不大，但對地區一線或二線，應該有用。事實上，阿囡面試表現平平，但仍收到一些call,相信是寫信所致。整個叩門過程比我想中快完，因七月五日已收到新大天電話。這為整個叩門過程畫上完美句號．其實我已作好最壞打算，作戰到九月頭開學的。

最後贈六個字，不要問，只要寫。

<update> 9月6日剛收到大角咀天主教(舊校)call,不過推了．

W_cindy

獲益匪淺！萬分感謝無私分享！

一個閒人

感謝分享。

我囡囡派左跨網學校（住34網，派43網），不過我無你咁誇張申請超個十間學校既叩門（我只係叩左4間，3間34網，1間41網）。交通接送係我一個重要考慮。

因為我覺得叩咁多間，家長辛苦之餘，小朋友仲辛苦。我既策略係知道4間學校叩門考試既模式，就集中火力係5月頭就開始訓練一下，只要囡囡盡左力就可以。

最後囡囡都叩入到一間唔錯既學校，不過唔係心儀嗰間。我會等七月尾，囡囡間幼稚園派埋成績表及獎狀（囡囡今年獲得品學兼優獎）後，再去寫求位信去我填111既學校，希望學校可以俾個位我囡囡啦。

se6b03

好詳細既資料，其實樓主叩門策略似係大包圍。叩咁多間，其實有d根本上可以唔洗叩。方樹泉應該同基全同級，就算叩到，你都未必會讀，何必花時間同精力去叩一間同級學校呢？基道如果唔計有人放棄學位，只有8個叩門位，位咁少，就算表現好，可能都無位收。

choikiuma

se6b03 發表於 17-7-17 11:32
好詳細既資料，其實樓主叩門策略似係大包圍。叩咁多間，其實有d根本上可以唔洗叩。方樹泉應該同基全同級， ...

是大包圍，當你在谷底就會明白唔放過任何機會，方樹泉排名前過基全，冇人話比我知叩門一定會成功既。

choikiuma

一個閒人 發表於 17-7-17 11:17
感謝分享。

我囡囡派左跨網學校（住34網，派43網），不過我無你咁誇張申請超個十間學校既叩門（我只係叩左 ...

我唔知你是否有私校做backup,我是冇backup的，辛苦都冇法，我叩咁多間，冇人話比我知邊間會收我，可能全部都唔收呢？咁到時你會會怨自己害咗阿囡?點解唔而家寫信，仲等乜? 音樂椅幾時會停，冇人知。

choikiuma

choikiuma 發表於 17-7-17 13:09
我唔知你是否有私校做backup,我是冇backup的，辛苦都冇法，我叩咁多間，冇人話比我知邊間會收我，可能全部 ...

而家冇成績表，寫住其他嘢比校長先，有成績表時再寫都可以，學校由第一批叩門生已經轉咗幾round嘞！

一個閒人

choikiuma 發表於 17-7-17 13:09
我唔知你是否有私校做backup,我是冇backup的，辛苦都冇法，我叩咁多間，冇人話比我知邊間會收我，可能全部 ...

我無申請私校，因為我覺得無需要讀私校。去年有真道既offer，不過係11年制，驚銜接返官津學校會有問題，所以無接受個offer。

叩門前，我跟我太太都已經做好expectation management。叩太多間對小朋友同大人既身心都好疲累。叩到間好既，小朋友、家長固然會好開心；叩唔到既，小朋友自信心有可能會有好大打擊，做家長亦可能無形中埋怨小朋友（其實最太原因，可能係填表填得太進取、又或者運氣不佳）。大抽獎負最大責任係家長，唔係小朋友。

我會用隨緣既心去寫呢封求位信，唔會特別強求。因為portfolio係申請叩門信時已經遞交。不過我都已經寫好左封求位信，只係要等update既資訊，即係幼稚園七月尾時派發成績表同獎狀時至可以寄。宜家寄，下一封都唔知寫乜好。每間學校校長既心態都唔一樣，我覺得求位信，「一封起、兩封止」；太chur，有可能會有反效果。同埋，呢兩年適齡入學既小朋友咁多；個個家長都寫求位信，會加重學校既行政負擔，令到結果可能變差。我手上已經叩到有一間唔錯既學校，寫求位信只係入返我心儀既。

四個字，「一切隨緣」。

choikiuma

一個閒人 發表於 17-7-17 13:44
我無申請私校，因為我覺得無需要讀私校。去年有真道既offer，不過係11年制，驚銜接返官津學校會有問題，所 ...

當然你手頭上已一間，做法會不一樣
，每個人有唔同選擇，祝君好運。

castle100

回覆 choikiuma 的帖子

我e＋都未有一間心儀嘅取録、已經寫左二封信了！又更新左成績表！都唔知要不要繼續寫！我冇郵寄我親自交比學校！我交左2間一間2封！

阿里媽媽

好多謝你嘅分享，真係好有用

choikiuma

castle100 發表於 17-7-17 14:35
回覆 choikiuma 的帖子

我e＋都未有一間心儀嘅取録、已經寫左二封信了！又更新左成績表！都唔知要不要繼續 ...

係呀!寫信唔話係咪一定有用，比我會所有心儀都寫，會預咗作戰到九月頭。

se6b03

想問下你地寫信係咪都係用手寫中文？有冇寫英文信？用英文寫效果會唔會唔同？

castle100

回覆 choikiuma 的帖子

我係打字、請問手寫好嗎？因為自己手字真係唔得

iampizzamum

謝謝分享!

choikiuma

se6b03 發表於 17-7-17 15:24
想問下你地寫信係咪都係用手寫中文？有冇寫英文信？用英文寫效果會唔會唔同？ ...

我是用中文的，覺得用中文更加傳神，但若叩的是英文小學，就另計。