每年小一派位放榜，有人快活有人愁，有人花幾千萬買九龍塘豪宅，為的是替兒子考喇沙，結果落空；有人旁門左道借地址報瑪利諾修院小學，不費一文入了心儀學校，開心過中六合彩。好多年輕夫婦唔敢生仔，因為怕搵學校；有些膽正命平，生咗再算，原來BB唔夠一歲就要搵學校，一歲多些就要為N班面試。四百日人仔面試，睇下佢天庭飽滿鼻夠直，抑哭聲震天夠殺氣？真係玩死家長，嚇壞小哪吒。入了幼兒園，只是噩夢開始，幼稚園入小學才是大難關，有人津、私、直報齊，20間報名費已經唔少錢。再睇返幼稚園報名，有官價及枱底價，教育局有規定報名費上限40元，但又有40間幼稚園可以超過呢過上限，有一間甚至收三千七百蚊咁多。
錢財身外物，最慘是面試撞期，唔好彩的一日撞三單，趕到裙甩褲甩。小寶寶驚魂未定，得個喊字，「肥」完一間又一間，讀完幼稚園，入了小學才知做人父母甚艱難，陪太子讀書唔在講，功課一籮籮，補充練習似天書，題目刁鑽過碧咸的旋風斬，準備升中竅門足夠寫三篇博士論文。唔肯生仔養狗仔，聰明之舉，全世界兒童讀書，無邊度難過香港。 新制不如舊制 有人把教育制度搞到如此畸形入晒吳克儉數，做人要公道些，歷任教育頭頭都要分擔責任，畸形是「積積復積積」而來，吳克儉唔好彩標尾會而已。有客問﹕「如何把局面改變？讓小朋友輕鬆入學。」小婦人斬釘截鐵答﹕「神仙難救。」嘩！王師奶，你灰唔灰啲吖。小婦人好懷念以前教育制度，讀一年班之前根本唔一定要讀幼稚園，夠六歲就報名，𠵱家唔讀幼稚園想讀一年級？一定係腦生蟲，或畀人揶揄﹕「去德國啦！」以前入中一前要考升中試，升中試考中、英、數，更早之前有常識科。選校好自由，你鍾意邊間就揀邊間，無地區限制，住沙頭角可以揀淺水灣，只要成績好，天空海闊任鳥飛，否則錦田鄉姑如王師奶就無機會入九龍塘褐色磚牆校舍的美國修女學校，跟修女學英文之餘再學Table manner。𠵱家諸多限制，又話英文班中文班，一校兩制，入唔到英文班等於額頭刺了「籮底橙」三個字。王師奶知道有跨網選校，但名校網本身已爭到頭崩額裂，就算你成績好標青，如果你家住天水圍，你都無乜機會去英皇做梁振英師弟，因為跨區獲取錄機會蝕底好多 。「人不如故，衣不如新」，只對一半，如果故人是騙子，是歹徒；如果新衣質料粗糙，衣不稱身，捉襟見肘，你仍認為故人好，新衣好？可見新制度不一定好，王師奶頭腦古舊，認為舊制度自由、公平。以前做父母容易得多，幾時見有人怕搵學校麻煩唔生仔？鍾意生幾多件悉隨尊便，多好！讀書也是樂事，讀完幼稚園讀小學，中學自己揀，筲箕灣、銅鑼灣、尖沙嘴、大角嘴，無人阻你，多好！ 抽籤最公平 今日派位制度立立亂，搞到四百日人仔去面試，年輕男女最驚唔覺意有咗。王師奶心血來潮，想到治亂世要用重典，消除畸形入學現象要用奇招，這奇招土名為「抽籤」，摩登叫法為「攪珠」，每一個學生配一個號碼，不論貧富，話知你係超人個仔抑或賣魚勝個孫女，各安天命，攪到去邊就去邊，公平、公正，無得拗。幼稚園如是，小學如是，中學如是，大學嘛，諗諗先。 正為諗到絕世好「橋」而開心之際，有人用力搖我肩膊，問我發乜嘢夢發到手舞足蹈？具告知，枕邊人冷然道﹕「繼續發啦！黐黐哋」。
| 
發表於 17-5-20 03:32
