黃大仙BAND3仔仔如何填大抽獎？？

hi_baby

我想分享我囡囡上年升中派位，佢小六呈一呈二呈三成績唔錯，班主任果時話佢入band1冇問題, 但小六第三次考試衰咗，雖然唔係呈分試但級名次跌咗會好影響排位，佢叫我揀band1尾band2頭嘅中學，但阿女本身成績唔差，因為一次失手跌到落band1尾band2頭佢好唔甘心，而且德愛可立佢唔鍾意，最後我冇聽班主任意見，由阿女自己揀，第一第二揀區內band 1學校.... 第二打後我選擇他區band1中學，他區通常只有兩個位，結果我囡囡好好彩，竟然入到誇區嘅band1b中學，佢呢家讀得好開心，成績都慢慢追返上來，知道中學嘅溫習技巧！ 所以大家都可以試下誇區～

momamy

回覆 hi_baby 的帖子

多謝樓上媽咪分享經驗，其實爸爸都係甘樣行偏鋒，想到甲部搏跨區的直資位，其實我系心驚驚，男人D思維真係好難理解，佢大安主意，話反正點樣派都係BAND3啦，無所謂！我覺得點都好啦，希望派間離屋企近少少就得，個仔考完呈分試后反而好似對讀書多番D興趣，尤其數學方面覺得方程解題好有意思，老師都贊有進步，不過發力發錯時間啦，點都好，只望上左初中會開竅，急起直追啦！

hi_baby

momamy 發表於 17-6-22 11:26
回覆 hi_baby 的帖子

多謝樓上媽咪分享經驗，其實爸爸都係甘樣行偏鋒，想到甲部搏跨區的直資位，其實我系 ...

你大可以問下囝囝嘅意見，此終佢先係用家，入到佢唔鍾意嘅中學佢會埋怨你一世，家長只能從旁俾意見。

momamy

終於塵埃落定啦，上來寫個總結，希望可以供黃大仙下年準備小升中的媽咪參考一下。首先仔仔的成績真係過山車一樣，五上跌五下升，六上又跌六下又升翻，品行兩年都係B，六下B+，7月10日拿最後一期成績表時還有個品行進步獎到手。心電圖一樣波動的成績但年級排名都始終40/76左右，切切實實系BAND3仔。所以爸爸決定甲部填跨區的BAND2直資中學搏一搏，結果亦真係好彩，派到甲一，九龍城區勞校，講真其實我地都幾滿意勞校，校舍雖然舊但係好大班房又闊，午餐系學校食，直資當中又算平，一個月先400幾，至於校風方面眾說紛紜，最可靠都係自己試過先知。
之前報志願時個仔可能覺得甲部無咩可能派到，對於我地的策略無意見，點知道一拿到派位紙后黑嗮面，覺得系左仔學校，又要升紅旗又要愛國主義教育，反正就係好唔滿意。仔仔當時情緒非常低落要我地即刻翻屋企（可能覺得無面），話想打機發洩下，後尾電話知道D好朋友有派培敦/彩天，就話一定要去呢兩間叩門，當然我亦提前準備好十份叩門資料（因為預左派BAND3），大概上午10點幾，學校班主任竟然打比我老公同佢講勞校好麻麻，問我地有無需要出推薦信去叩門，我老公聽完電話馬上動搖左，加上仔仔都有決心去扣，所以即刻出動，趕翻小學穩班主任，原來學校只會出一封推薦信比中學，必須考慮清楚去邊間扣，我個仔都好硬頸，堅持要去培敦扣，想起都覺得好難堪，坐系教務處外面三個我仔仔的任教老師一齊做佢思想工作，勸我個仔唔好寫培敦，因為真係浪費時間（鬼叫系BAND3咩）,我都無嗮意見，唯有額佢培敦照去交表但係推薦信寫另一間永光（乙一志願），因為老師講希望會大D，結果順路先去培敦交左表，永光好過分，要三科兩年全B以上先派表填，系門口食左個大檸檬，乘機教育個仔現實的殘酷，連推薦信都白白浪費嗮。最後彩天都交埋表，下午已經收到彩天電話約12號上午去面試，至於培敦其實都預左無機會面試。
感覺11號時間真係過得好慢，接到彩天面試后開始做仔仔的思想工作，希望佢可以慢慢接受勞校（畢竟同區叩門可能性好低），問題系豬一樣的隊友（即爸爸）竟然時不時講下勞校的負面野，我已經好忍耐，終於忍唔住鬧佢地兩個，真係想讀書去邊間中學都一樣，難道名校就無打爛仔交咩，兩個被我鬧到無聲出。個仔系PC game的安慰下下午已經恢復生氣，反而個爸爸就啰啰嗦嗦，質疑自己幫個仔撿錯學校。
12號早上9點半去彩天面試，爸爸繼續請假，面試都幾順利，一家三口入去面試，彩天面試占40%，而且學校對家庭的價值好認同，所以連家長都要一齊面試，面試分為兩部分，第一部分仔仔自己同兩個MISS傾，英文自我介紹，問下最中意的科目，最近提左乜嘢電影，中意邊個角色之類，然後英文讀一段話，MISS問左幾個相關問題，跟住就轉翻中文問問題。仔仔表現都還可以，就係細聲左D，略顯不夠自信。第二部分就係家長都坐前去一齊傾，問下仔仔對爸爸有乜嘢評價，平日會有乜嘢家庭活動，又問仔仔如果要提高成績會點樣做，點解中意彩天，可能平時都口花花，竟然話因為D老師所以中意彩天，擺明聊女MISS，然後又擦爸爸鞋，話欣賞爸爸夠上進，晚晚翻夜校進修。估計因為甘樣留到比較深刻印象，老師最後贊仔仔把口好犀利，又贊我地教的好好。最後問我地面試完會做咩，我剛好個日要去圖書館還書，脫口而出講左去圖書館（估計都有加分）。
其實本來都無預計培敦有面試機會，因為成績差之餘中要乜嘢獎項都無，填申請表時根本無內容可以寫，但係個仔一直唔肯放棄，13號早上再去多次培敦話因為11號太急無填齊資料，希望學校可以比多次機會入翻資料同求情比面試機會，結果中午打電話來通知下午2點去面試，面試家長唔使入去，系男老師，啊仔出來時面無表情，我知道肯定唔得啦，又將工作重點改為催谷勞校，後尾下午培敦已經通知落選。
14號仔仔毫無心機跟住我去勞校註冊，升旗隊D大哥哥系咁聊佢，問有無興趣加入，仔仔好嫌棄。註冊手續辦到買校服同買課本時，佢堅持唔肯買住，話要等埋下午彩天有無消息，我覺得都可以等下，於是搞定註冊就翻左屋企，大概下午3點幾就接到彩天電話，話兩個MISS都幾中意我仔仔，所以決定收，啊仔開心到爆，我地大人反而爭論左一陣，爸爸認為直資學校資源點都充足D，最後全家投票決定順個仔意思，改彩天，畢竟來緊6年都係佢讀書，最緊要佢中意。急急腳5點幾趕去勞校拿翻個註冊證，當時都碰到3個家長同樣來退註冊證，真係可憐天下父母心，個個都為仔女奔波勞碌。
15號早上去彩天註冊完，又開始陪太子讀書，準備18號的分班試，希望入到英文班，其實都知無咩可能啦，已經懶散左大半個月心散到離嗮譜，不過都要逼一逼，唔可以輕易放過佢。系呢一刻都仍然無辦法放鬆個人，開篇時講話塵埃落定，其實應該系更恐怖的開端，中學6年，12歲-18歲，真係唔知自己可唔可以招架得住，希望一家人可以互相配合，仔仔可以盡快開竅，知道讀書的重要性啦。

cwaisum

momamy 發表於 17-7-18 18:34
終於塵埃落定啦，上來寫個總結，希望可以供黃大仙下年準備小升中的媽咪參考一下。首先仔仔的成績真係過山車 ...

你真是一個好媽媽。
相信兒子明白到辛苦得來的東西要好好珍惜。
彩天成績雖然麻麻，但係學生好乖，好純。
希望你兒子努力讀書，不要浪費今次的機會。

tiads

momamy 發表於 17-7-18 18:34
終於塵埃落定啦，上來寫個總結，希望可以供黃大仙下年準備小升中的媽咪參考一下。首先仔仔的成績真係過山車 ...

天下父母心,希望仔女會明白..
培敦我地都又叩,但唔成功入左另一間,
父母都希望仔女會成材

chanwendy

黃大仙唔係不接受本區叩門架咩?

momamy

系啊，好彩掛，昨晚開家長會都話今年其實只有3個叩門位，不過我14號去註冊見到告示板上貼住D中一新生註冊名單，都有七八個無去註冊，所以我推測其實都有十個左右去叩門的小朋友被收左

lololala

momamy 發表於 17-7-18 18:34
終於塵埃落定啦，上來寫個總結，希望可以供黃大仙下年準備小升中的媽咪參考一下。首先仔仔的成績真係過山車 ...

多謝妳無私的分享。

momamy

回覆 lololala 的帖子

因為我發覺討論區內都好少人講起黃大仙區，主流都係談論band1生升學，作為暫時落後分子的家長都幾彷徨。不過我相信上來穩資源的媽咪都係用心為仔女學業做準備，所以將個人經歷分享出來，希望可以幫到有需要的家長作為參考。尤其系被學校老師定性為band3的小朋友家長千奇唔好輕言放棄，開花期有快有慢，可能只系等待過程長一點。好似我個仔，一直被學校老師判定為band3，但係而家都可以靠自己努力入左彩天，pre-S1考完試后分左入英文班，都算系唔錯的回報。老人家有句話"寧做雞頭莫做鳳尾"，都係有D道理。我相信個個小朋友都會有發光發熱的機會。