可以點？

yauyauyau

阿仔今年小一，已經是二線津校，功課亦唔算多。但每日放學返嚟都唔想做功課，又做得勁慢，每日坐佢隔離教到著曬火！下學期開始已唔肯抄手冊，抄詞語龜速，教極都唔跟筆順！ 功課做到10：30pm都做唔哂要欠交！中英默又唔得，早成個星期溫都係緊緊及格！好似冇哂動力咁，我踢一下佢都郁唔到半下！可以點幫佢？
但一到玩嘅時候又精神百倍！

MrBeast

問下佢是否覺得難和辛苦，小一可能未識講什麼地方難，咁你要估，知原因後找方法幫。meanwhile，做一陣玩一陣，易受落d

brother4

懶是正常，男仔要中學才開竅。。見朋友將孩子開補習社，D補習社溫習和做好功課，便可以玩 (看漫畫/玩波子棋等)，小朋友快手快腳做，但字体就。。。想繼續去補習社就keep住成績好。。

yauyauyau

brother4 發表於 17-4-7 19:45
懶是正常，男仔要中學才開竅。。見朋友將孩子開補習社，D補習社溫習和做好功課，便可以玩 (看漫畫/玩波子棋 ...

放學去補習社做功課有用嗎？

little_yolky

yauyauyau 發表於 17-4-10 16:19
放學去補習社做功課有用嗎？

你係full time mom定working mom?

skkeung

yauyauyau 發表於 17-4-7 17:53
阿仔今年小一，已經是二線津校，功課亦唔算多。但每日放學返嚟都唔想做功課，又做得勁慢，每日坐佢隔離教到 ...

十個有五個係咁！

greentea000

MrBeast 發表於 17-4-7 18:29
問下佢是否覺得難和辛苦，小一可能未識講什麼地方難，咁你要估，知原因後找方法幫。meanwhile，做一陣玩一 ...

無錯，既然功課唔多，做下玩下無妨。5~7歲，平均專注力係15分鐘咋。

roybird

回覆 MrBeast 的帖子

認同，呢個情況好常見，有好多可能性，父母一定要先搵到原因，先可以有效咁解決問題，小一學生可能係適應不到小學方式，同同學相處不好影響心情，，甚至係根本唔明點解要上堂做功課，父母可以多啲從日常傾計找端偽幫助了解小朋友go through緊咩，從而搵出最佳方法，當然大部分情況都係需要軟硬兼施

1998Ruby1998

呢種情況好普遍，尤其男仔居多，不過我地要明白，小朋友專注力、忍耐力、自律都比較低，只能夠專注 15 分鐘，如果佢停留左係同一份功課上超過 5 分鐘而冇進度的話，佢一定會放棄。正常一份作業 2-4 頁，如果係識做的話，15 分鐘內應該做完。如果係長篇功課，做到一半就「放羊」，休息 5 分鐘，叉夠電就做埋剩低一半。我同小朋友補習中間一定會畀 5 分鐘佢地休息（其實我都需要抖啖氣），唔係嘅話，佢地好容易進度突然慢／停止，問佢問題就冇反應／畀錯答案，抖左係會好 d。

首先要明白，係邊度出問題。
唔識做？跟唔上學校進度？
太多功課做，消化唔到？呢個唔係話有幾多樣功課，而係以佢能力同埋專注力，呢個份量嘅功課對佢來講吃唔吃力。
同學老師相處有冇問題？呢個唔好睇少，如果你初次入公司打工，同事同阿頭相處得唔好，你都唔會咁願意落力同老細做野啦，你就話有人工要養家所以繼續做，但係個小朋友睇唔到讀書帶來嘅樂趣，感覺唔到有得著。

第一個問題如果你或者另一半要返工，跟唔到仔仔學習，可以嘗試下補習社或者私人睇功課老師（1 對 1，中間做到一半／溫書前有 5 分鐘小休就最理想）。跟得上，自然會願意做，自自然然功課量就唔成問題（除非你學校係真係多複雜同消時間嘅功課）。

第三個問題，一定要父母幫手，冇得假手於人或者等佢自然解決。臨訓前同佢傾下「老師惡唔惡／有冇鬧人」／「班入面有冇小霸王」／「好朋友叫咩名／體育堂係咪同佢一組」，呢 d 問題雖然唔直接，但係仔女答案一定會提供到好多資料。

wan_sosin

1998Ruby1998 發表於 17-4-11 01:33
呢種情況好普遍，尤其男仔居多，不過我地要明白，小朋友專注力、忍耐力、自律都比較低，只能夠專注 15 分鐘 ...

好同意！尤其是要同小朋友多些傾偈，小朋友得到足夠關心，情緒，態度都會好些，如果小朋友覺得自己的困難無人理，無人認同，好有可能會自我放棄，反正都無人care.

事實小一生好多能力都仲有待發展，家長真的需用超級有耐性，種一棵植物，佢幾時會開花，真係天先會知。樓主可以同小朋友傾下偈，了解下佢自己對學業，校園生活的睇法，可能會有新發現。

MrBeast

wan_sosin 發表於 17-4-11 02:22
好同意！尤其是要同小朋友多些傾偈，小朋友得到足夠關心，情緒，態度都會好些，如果小朋友覺得自己的困難 ...

v well said，有時只需放學問下累不累，溫書溫得耐叫佢休息下，已goes a long way

greentea000

回覆 little_yolky 的帖子

話明係平均專注力，梗係有人多Ｄ有人少Ｄ。但係一個平均數字起碼等父母心裏有數，方便安排時間，唔使有錯誤期待。
年齡 專注時間（平均分鐘）
2 歲 約 7 分鐘
3 歲 約 9 分鐘
4 歲 約 12 分鐘
5 - 7 歲 約 15 分鐘
8 歲或以上 20 分鐘或以上

資料來源：羅澤全 《教養問題解答》<<< 好多學校同社福機構有關專注意力問題都有引用呢個資料

little_yolky

greentea000 發表於 17-4-12 02:28
回覆 little_yolky 的帖子

話明係平均專注力，梗係有人多Ｄ有人少Ｄ。但係一個平均數字起碼等父母心裏有數 ...

5-7歲15分鐘, 8歲或以上20分鐘...........所以同學仔上堂發夢都唔好話佢哋了, 係生理問題..............但何解叫佢哋玩, 可以玩足成日都咁專注呢? 就算阿妹, 叫佢抄寫好似想死咁, 但叫佢做手工, 佢可以坐响度連續唔停咁剪剪貼貼三粒鐘唔離開個位喎?

greentea000

little_yolky 發表於 17-4-12 09:03
5-7歲15分鐘, 8歲或以上20分鐘...........所以同學仔上堂發夢都唔好話佢哋了, 係生理問題..............:ti ...

就咁，我做咁耐學生，只得2個老師係風趣幽默，上佢地堂好享受既，每次都感覺時間飛逝。其他，一係課堂上有小休(3~5分鐘)，一係佢講書一陣又小組討論/玩遊戲一陣都無咁悶，呢兩種起碼有針對性咁控制學生既專注力，最唔好係由頭到尾照本宣科果Ｄ，同自己睇書完全無分別，當然會發白日夢。老師一定知唔同年級專注力時間，學校無可能唔同年級一節課唔同時間咁安排，但老師完全可以運用教學技巧去調節，點解唔咁做？咁好傷神好花時間備課，直接推個問題俾家長囉，唔使面對自己既不作為/無能。運用教學技巧最多既係教院實習老師，上一堂搞埸大龍鳳咁，花樣百出，為咩？因為有觀課考核。
上堂係有壓力既，因為知道之後要做功課仲要測考。玩有咩壓力呢？加上有興趣又享受，因果循環又更有興趣更享受，玩全日都得。玩又可以隨時停，有控制感，好high架。上堂可以隨時唔上咩？被控制自然痛苦。

Doray

yauyauyau 發表於 17-4-7 17:53
阿仔今年小一，已經是二線津校，功課亦唔算多。但每日放學返嚟都唔想做功課，又做得勁慢，每日坐佢隔離教到 ...

不要太心急，我大嗰個之前都係龜速咁，你坐喺隔離真係好火，後來覺得咁好傷感情，唯有接受佢，俾佢用佢自已的節奏, 佢慢慢都調節番快，我亦唔再坐佢隔嚟睇功課，但小一就冇辦法，唯有忍耐一下了。

1998Ruby1998

回覆 little_yolky 的帖子

我係畀學校投訴「唔專心」嘅常客，老師見一次家長就講一次。

玩係興趣，步伐、主題全部自訂，幾時開始幾時受手都得，玩得慢玩得快、動態靜態都唔會有人理，自己鍾意就得。但係課堂限制活動範圍，步伐，主題，所有野都唔係小朋友可以話事，好彩咪人夾人，上堂開心，唔好彩就遊雲，我到依家仲做學生，有一堆老師嘅教學方法我係唔鍾意，專心唔到。
例如我鍾意打機，但係恐怖「貓捉老鼠類」遊戲我冇興趣，但係邏輯推理、策略分析果類我會玩到好耐。

又比如我鍾意語言堂，所以如果叫我上 Physics 堂我坐到 30 分鐘肯計數已經好畀面，如果係語言堂，我上 3 個鐘都可以應付到。我鍾意上堂節奏快，畀一堆例子我，我自己搵出關係。如果上堂係我已經學識嘅課題或者課堂係討論為主的話，我會悶死。功課的話，由少到大我都唔鍾意重重複複嘅練習，做一兩份我就夠曬，唔明我會問。

little_yolky

1998Ruby1998 發表於 17-4-12 23:30
回覆 little_yolky 的帖子

我係畀學校投訴「唔專心」嘅常客，老師見一次家長就講一次。

前排家姐開始預習。有一晚阿妹同我講：媽咪, 你千祈唔好同我預習, 如果識咗上堂我會好悶, 上堂先學識會開心D。我當時仲心諗：你懶就懶啦。

Soundervolt

brother4 發表於 17-4-7 19:45
懶是正常，男仔要中學才開竅。。見朋友將孩子開補習社，D補習社溫習和做好功課，便可以玩 (看漫畫/玩波子棋 ...

学習應該係需要有惯性勳力，係一種对從小到大培养出学習既Momentum。如果只期望中學才開竅係十分危险既事，万一等到中學都唔開竅，咁点算?

S-Kwok

little_yolky 發表於 17-4-13 10:16
前排家姐開始預習。有一晚阿妹同我講：媽咪, 你千祈唔好同我預習, 如果識咗上堂我會好悶, 上堂先學識會開心 ...

我仔係嗰種識咗上堂會遊魂，所以我會唔同佢預習。
不過，上到中學，就應該要預習囉。

S-Kwok

1998Ruby1998 發表於 17-4-12 23:30
回覆 little_yolky 的帖子

我係畀學校投訴「唔專心」嘅常客，老師見一次家長就講一次。

我想問吓你以前做功課/測考會否因為覺得無挑戰性而不認真睇題目？

我仔一直有一個問題： 做功課、温習、測考睇題目都好似只係睇一半咁，唔會好認真睇題目/做題目，會經常會錯一些簡單嘅題目，如會寫漏“s”、要畫線dot to dot就畫穿都唔理，點樣可以令阿仔小心、認真做？