有關閱讀問題，請大家賜教

samhongkong

小女愛看書，但只喜歡  LAAP呢睇，我要兩分鐘睇一版既書，佢大約10秒LAAP完一版，從來唔肯細讀，遇到唔識既字亦都唔理，結果就係睇書無進步，只會揀淺白書來睇。
想請教大家點樣可以誘導小朋友去學書中既生字？

JC_mami

回覆 samhongkong 的帖子

小兒跟你女兒的問題相似，我前兩天都出左個post問，有時間可看看，似乎唔同人有唔同睇法。

JC_mami

回覆 samhongkong 的帖子

小兒還有一點是，佢喜歡看故事內容精彩的書，所以往往看些我覺得能力範圍以外的書，但有唔識又唔問，水過鴨背睇完便算。我現在的方法是分開佢的休閒書和伴讀書。
伴讀書要佢讀我聽，make sure 佢明。
兼做少少讀後感想。

samhongkong

回覆 JC_mami 的帖子

睇左你個post, 我就係唔想迫佢，所以問大家有咩方法可以誘導佢去主動學生字。
我知道呢度有好多成功父母，希望大家可以分享下經驗。

我自己就英文佢自己睇，中文我讀。小學功課多，無時間連英文都伴讀喇。

ABC-DAD

見到“閱讀派”三個字就掉頭走。

samhongkong

回覆 ABC-DAD 的帖子

好吧，我册掉那三個字，雖然唔知點解你唔高興。我只係希望有人賜教，無心得罪人。

shadeslayer

samhongkong 發表於 17-3-18 17:26
回覆 ABC-DAD 的帖子

好吧，我册掉那三個字，雖然唔知點解你唔高興。我只係希望有人賜教，無心得罪人。

有人buy 閱讀，有人 buy 練習，有人buy 閲讀加練習，有人 buy 字咭/迪迪尼，自然不過。

QQpa

samhongkong 發表於 17-3-18 15:13
小女愛看書，但只喜歡  LAAP呢睇，我要兩分鐘睇一版既書，佢大約10秒LAAP完一版，從來唔肯細讀，遇到唔識既 ...

能夠培養到小朋友閱讀習慣已經好好喇！唔好樣樣計較成效，唔係，好事都變壞事

以前好多同學從小有睇書習慣的，語文成績都很好，佢地都係讀書靠自己，根本唔使人地教點睇書

samhongkong

回覆 shadeslayer 的帖子

原來係咁，謝謝你。你所講既我都試過，唔知邊樣較好，亦無意爭論。

1998Ruby1998

首先要謹記呢條：睇書為興趣、為娛樂，學到書入面嘅生字唔係必然。

可以協議，父母買 LAAP 唔係唔得，不過你要睇一本父母想你睇嘅書（rainbow magic 啊），睇完之後講本書大概講咩，有咩人物，結局點、最鍾意邊個情節＋點解。然後父母抽三個生字出來，你口頭解釋生字嘅意思同埋做一個句子。你解釋得到，父母就唔會理你點睇 LAAP。

因為口頭完成，小朋友會冇咁大壓力，唔會當係功課。

初時一定要逼，踢一踢，又或者你畀 d 甜頭、誘因佢，話做一次「閱讀後檢查」，獎勵係糖、朱古力、玩 X 分鐘、錢（呢個唔係咁多父母接受到，同埋唔係個個小朋友都識得當錢係寶）如果一個禮拜累積到 X 次檢查，就有更大嘅獎勵（例如：星期六日有一段時間可以任玩，父母唔會逼做任何野，呢段自由時間自己管理）

但係唔好話要佢日日向你回報，你要話：「依家阿媽、阿爸得閒，如果你呢段時間唔主動回報。就冇獎勵架啦，自己諗下啦」咁樣佢會更容易自動自覺向你「投案」。

如果係容易達到，次次都有獎勵，小朋友會比較有奮鬥心去為左獎勵而去做。雖然為獎勵而做唔係一個正確嘅目的，但係呢個階段，唔可以要求咁多，佢肯做就收貨。

不過都係呢一點，睇書唔係講有冇進步，係講興趣。

JC_mami

samhongkong 發表於 17-3-18 16:41
回覆 JC_mami 的帖子

睇左你個post, 我就係唔想迫佢，所以問大家有咩方法可以誘導佢去主動學生字。

我跟你實在太似，就是一直都有伴讀中文書，k3開始已經停了伴讀英文書，上到小一就發現中文的語感比英文好，測驗考試基本上都不需要跟他温習，已經有很好成績。幸好阿仔做事很快手，所以每天功課可以在學校完成，課外活動除了學校要求一定要學樂器，也沒有其他課外活動，所以他有很多時間睇書，現在也不敢懶，每天也要抽時間伴讀英文書，我還有一個小兒子，每天讀書讀到口水乾。
另外，我很欣賞學校安排下午除了功課堂外還有一堂自修堂老師要求孩子一定要在自修堂閱讀課外書，這安排非常好，孩子會彼此分享好看的書，令小兒看多了中文書。

samhongkong

回覆 QQpa 的帖子

謝謝你既意見。我自小就喜歡看書，而且會在心裡讀出來，遇到唔識既字也一定會查字典。
我有教小女看書時，由心讀出來，但係佢唔願意，我亦都無勉強佢。
你講得啱，唔應該破壞佢閱讀興趣，所以請教各位有咩方法，去誘導小朋友去學生字。

notcool

Discuss with her. Highlight good sentences. Interact with her and encourage her to express using new vocab.

samhongkong

回覆 JC_mami 的帖子

你就好啦，間學校肯培養學生睇書。小女果間，話就重視閱讀，但每日都好多功課，根本無乜空閒時間，佢自己每日睇一本已經好勉強，好多時未必做到。
反而係測考既日子，小Ｄ功課，佢仲可以去玩／睇書。

yovin

JC_mami 發表於 17-3-18 17:56
我跟你實在太似，就是一直都有伴讀中文書，k3開始已經停了伴讀英文書，上到小一就發現中文的語感比英文好， ...

我個仔都喜歡睇中文書，上到中學，中文成績可能係另一回事。俾定心理準備你！

samhongkong

根據Ruby 同notcool 既建議，都係同佢一齊睇，然後要佢嘗試造句。因為平時功課多，為左有充足休息，真係好難做到。得返星期六日，但係又要學游水，同學gathering ,家庭樂，好難取捨啊~

ABC-DAD

回覆 samhongkong 的帖子

傾下閒偈，你小朋友幾大？有咩興趣？閱讀何種類型嘅書多呢？

shadeslayer

samhongkong 發表於 17-3-18 18:00
回覆 QQpa 的帖子

謝謝你既意見。我自小就喜歡看書，而且會在心裡讀出來，遇到唔識既字也一定會查字典。

我有教小女看書時，由心讀出來，但係佢唔願意，我亦都無勉強佢。

Xxxxxx

千其、千其、千其唔好要求佢由心讀出來，仲衰過要求孩子朗讀。我看書慢過阿女10倍8倍，就係因為我細個習慣左要在心讀出來。

好多時家長的好意係有害而不自知。

有D似養魚，只要留意水質，不過量餵食便可，魚兒自會健康生長。如果養魚者成日擔心這擔心那，擔心唔夠飽又餵多次，整天拿起魚兒看看有無白點，魚兒藏身石中，養魚者又擔心自閉，趕它出來，魚兒嚸會好？

samhongkong

回覆 ABC-DAD 的帖子

小女六歲，興趣係跳舞，可惜無時間學。
因為識字唔多，所以都係睇故事書為主，例如treetops 系列。唔鐘意睇中文書，除非有人讀比佢聽。

samhongkong

回覆 shadeslayer 的帖子

知道，謝謝提醒。