用戶登入
用戶名稱:
密      碼:
搜索
教育王國 討論區 教育講場 時間沖淡歷史(左丁山)
發新帖
查看: 634|回覆: 0
go

時間沖淡歷史(左丁山)

Rank: 12Rank: 12Rank: 12


72307
發表於 16-11-26 08:30 |顯示全部帖子


大編輯半退休後,到中文大學修讀比較歷史碩士學位,眨吓眼就過咗兩年,喺11月18日參加文學碩士畢業禮,左丁山自然歡迎佢成為中大校友。大編輯現在真係得閒咯,大把時間讀閒書,因為佢兼職開嗰間傳媒機構,前個月正式結業,想唔真正完全退休都唔得。


大編輯話參加畢業禮除咗聽主禮嘉賓陳方正博士演講之外,最欣賞中大當日不設汽車入閘登記,全部車輛自由出入,不似平日咁收停車場費用,令出入閘非常暢通,其次係成為校友後,可取得中大圖書館借書證,每次可借20本書,令佢讀書過足癮。


陳方正博士在中大服務近40年,是哈佛大學物理學博士,馬臨校長年代,調任中國文化研究所所長,一做就做到退休。大編輯話陳方正演講內容有微言大義,語氣中流露對中大之深厚感情,演詞絕非行貨可比。又有乜大道理在內呢?大編輯話:「以我所見,陳博士係講時間可以改變一切,凡事要放長雙眼睇,無須只爭朝夕,心急求變求成。例如陳博士透露李卓敏校長年代,港英政府唔想中大做研究,只想講師講書,不發研究經費,李校長就在預算上下手腳,靜靜雞以其他名義撥錢做研究。到馬臨校長年代,港英逼中大四改三,與中大有連場暗戰,結果梗係政府贏咗啦。但係呢,中大慶祝50周年之時,中大已經係一所成功嘅研究型大學,學制又由三年回復四年,在60、70及80年代嘅爭執,耗費大量精力,現在回頭一望,十分無謂。」


俱往矣,中國人成日講五千年歷史,在歷史長河中,70年、80年,以至100年,眨眼即過,後人讀今天歷史,可能覺得香港人耗費大量精力㖭。11月17日早上舉行中大本科生畢業禮,沈校長先以普通話致辭,其後再講廣東話與英語,給中大七間書院學生會聯署聲明批評之,實在無厘頭,中文大學素來標榜兩文三語,是本港8間政府撥款大學(簡稱公立大學)之中,唯一一間不以英語為正式官方語言的,中大所有正式文件都有中文英文本,文書成本比港大科大等多出一倍,但中大從不以此為苦。至於說話方面,自有中大以來,崇基聯合都講兩文三語,新亞書院由錢穆先生開始,便一直講國語,左丁山讀書年代,上課與聽演講極少聽到廣東話,大家都沒有質疑。今天的學生大概太多疑了,不歡迎老師用普通話講學,反對校長致辭時首先用普通話,未免眼光短淺,氣量狹窄,中大新亞學生尤應記着校歌一句:「廣大出胸襟,悠久見生成。」




左丁山