本帖最後由 ethanmom2012 於 16-11-16 18:02 編輯
我個仔4歲1個月，而家讀緊一間國際學校幼稚園K2，該校一直出名於小班教學及有愛心的。10月份時老師突然特別約見了我們，說了好多仔仔的問題:
“佢好易分心，又成日騷擾同學” “叫佢做工作紙，佢唔願做，又趴係度” “我地用哂所有方法喇，但佢依然沒有改善” “我地只係老師，無咩建議可以俾到你喇” “我地建議你帶佢去做評估”
小朋友有另外一位校外中文老師(由2 歲playgroup 睇到佢4歲，教左20年幼兒教育，經驗豐富又有愛心既老師) 一直對佢稱讚有加，係活潑但一直聽教聽話，又鐘意學習，唔覺得佢有發展問題，而佢係屋企我地都覺得雖然有頑劣既時候，但都可以接受既。我地作為家長突然聽到學校咁樣既評價，當然又擔心又驚訝。
學校咁講，我地就去左做評估(評估包括到校評估及一對一評估) 。評估結果出嚟，個clinical psy話，佢認知能力無問題(視覺感知測試發展如做puzzle/matching/picture/words 去到5歲程度)，小肌肉較弱差少少慢了幾個月，但係容易心散分心既，又坐唔定，又易衝動，但佢唔認為嚴重到下判斷確診佢有ADHD，而且佢好含蓄咁話，(唔係批評學校呀下，老師有愛心既，不過佢地欠缺經驗，好多野唔識得做) ，應付呢d 坐唔定既小朋友，有好多野可以做。例如: 1) 稱讚好行為 –佢話到校評估時，阿仔可以坐定定聽左20分鐘故事，但沒有人去稱讚佢，反而佢一郁，老師/助教就會不斷話佢; 2) 忽視唔好既行為。clinical psy話，阿仔一悶就周圍搞搞震，跟住佢地就不停提佢唔好咁做，其實正正跌左落左呢個attention seeking 既陷阱，阿仔就繼續樂此不疲咁吸引老師注意。如果佢唔搞到人，應該由佢，如果佢搞到人，就應該搬開佢，唔好望著佢唔好理佢。但老師無咁做，反而不斷俾attention 佢。3) 要堅持。clinical psy話係學校度，阿仔搞搞震，老師不停提佢唔好咁做，但阿仔唔聽，老師又由佢，無堅持要佢停。唔堅持，小朋友就自然唔聽你支笛。
我聽完真係火都嚟，我知阿仔係活躍頑皮，所以我地係屋企一直都有做類似clinical psy既建議方法。我地好堅持，同埋我地會有獎有罰，稱讚好行為，責備唔好既行為。所以我會覺得係屋企佢有頑皮既時候，但基本上佢都有規有距。但係學校老師好似連呢D基本教育知識都無咁，要等到clinical psy去提出!
我一直以為，國際學校，出名有愛心加上小班教學，應該會更加理解學生既學習差異，更加照顧到學生唔同既需要，更加知道如何應付較活躍既學生。例如佢應該講可能佢小手肌比較弱，導致佢無心機寫工作紙或者佢覺得工作紙好難，而唔係只係同我講佢唔肯寫，趴係度，寫得好慢，但佢地完全唔知原因係邊。
佢同我心目中既期望落差好大。我地以為係個別老師問題，但學校見面時副校長在場，亦都支持老師既說法。所以即使已經K2，即使有小學直升，我地都決定安排小朋友轉校。
我唔係新手，今次用新ACC 係唔想俾大家知係邊間學校。我目的唔係在於唱衰某一間學校。每人經驗不同，可能一個好乖既學生係我間學校會好開心。寫出嚟俾大家睇，係希望各家長唔好覺得有愛心既國際學校一定等於適合你小朋友既學校。揀學校時，一定要親身了解下學校，老師既經驗及質素先再選擇。
| 
發表於 16-11-16 17:47
