人生VS籃球比賽；DSE VS三分球比賽

dativebond

我成日討論時都發現大家對小朋友教育失焦，因為大家對小朋友需要培養的元素有分岐，所以我作以下比喻，讓大家能理解我的看法。 假如人生和籃球比賽相似，你要成功需要好多元素：包括學習能力、性格、態度、創意、抗逆能力、膽量、衡量風險、人際關係、親和力。。。等等；而打籃球比賽亦需要很多不同的能力：體能、攔截、射球、突破、防守、意志。。。等等。 簡單而言，小朋友教育應當很全面，不只側重一兩方面，讀書唔係大晒，有很多元素對其人生更重要，例如性格和態度。 DSE作為一個評核幾萬人基礎能力的機制，佢評核既都係政府認為最基本既野，例如語文能力、分析組織能力和掌握基礎知識能力，而呢D野要盡量客觀公平，所以一D更高層次而且更重要既野佢唔會考到，例如解難能力、抗逆能力、創意。。。等，因為呢D野有主觀成份，好難量度。 如果人生比喻為籃球比賽，咁DSE也可比喻為三分球比賽。 你要玩贏呢個遊戲其實只要練好三分球就得（即係語文能力、分析組織能力、掌握知識能力），其它野唔係唔重要，果D野對人生好重要，但對贏呢個遊戲唔重要。 等於一個籃球員佢平時緊係乜都要練，但如果佢知道黎緊要參加一個好重要的三分球比賽，佢事前一定要先搞掂練射三分球呢樣基本野先啦，行有餘力，咪繼續練其它野囉。

dativebond

所以有時我見有人話要贏呢個遊戲唔駛操咁多，我會好震驚。你等於話要贏個三分球比賽唔駛射咁多波。。。

dativebond

又或者如果DSE係花式入樽賽，Stephen Curry唔會贏到，但咁就代表佢係人生呢個旅程實唔掂咩？事實當然唔係啦。所以有時如果你有洞察力，知道個仔好難係呢個遊戲贏，更加要培養佢其它野，有一兩野叻其實已夠佢係呢個社會生存，唔需要將DSE放到咁大。等於Stephen贏唔到花式入樽賽，亦唔會令佢得唔到應有成就，因為佢有其它野叻，做到頂尖嘛。

dativebond

所以DSE叻唔需要自滿，你只係呢某一方面叻，唔保証你會成功。DSE差又唔需要自悲，你如果有其它野叻一樣可以成功。DSE極其量只係一個平靚正既方法去將人分類，所以你見一份工學歷重要，係因為資訊不對稱，你除左學歷，無野可以說服人。但第一份工後，你有其它更重要既特質可以展示比老闆睇。問心，除左畢業後幾年，之後再有無人理你考試幾多分？就係咁簡單。

MASAYA

DSE有幾多學生唔需要考？將DSE比喻為三分賽？大部份學生都要經歷既，唔係應該同常規賽對比？過到關上大學係季後賽？

三分賽唔係必然參加，三分唔得咪玩入樽係冇錯，當課外活動咁睇囉

努力練習當然係成功必需，問題係唔同階段有唔同努力既地方，初小操卷為乜？等於你講既三分，初學走去練三分？練好帶波傳波先啦，有幾多人會話預備DSE唔需要操練

dativebond

原帖由 MASAYA 於 16-07-14 發表
本帖最後由 MASAYA 於 16-7-14 12:59 編輯

DSE有幾多學生唔需要考？將DSE比喻為三分賽？大部份學生都要 ...

我試下用一個令你容易接受既方法講你知我的諗法，因為我感到你對我有一點誤解，當然我唔知我呢個感受係真實定我諗多左。

你對我的抨擊是「越早操卷越好」。我的做法唔係咁極端，我明白小孩子的認知能力會隨時間而增加，太早比佢學深既野反而打擊自信，拔苗助長反而令佢討厭學習。這點我絕對認同。

從我成長經歷，我認為小學和初中的課程實在太簡單，咁我能夠理解，因為課程係為大眾而設，佢唔係純設計比尖子，所以程度唔可以太深。如果你自己經歷過高考或者你真心有認真了解過，你唔一定事事都跟學校schedule。以前高考得一年半度比你準備，但你學既野係多過會考幾多，我可以話個範圍和難度高兩三倍都唔止，咁佢先能夠係會考A中，分到高考既A至C。呢個係統計學上成立，從前會考A既學生人數就和高考A至C人數相若。

我就係經歷過高考，我先會回想「如果我細個咁做，有人說服到我多點時間練習，成績應該好好多。」我因此係果一年半，因為時間是有限的，我只係操自己鍾意既科目，咁的確有操練的科目起碼高過無操練的科目一兩個grade。呢個係我親身經歷，無話啱定錯，但令我深信有時間去的做練習的重要性。

番黎你對我的抨擊話「初小就操卷」。第一，其實我係話小學初中就講多點高考既key concept比佢知，無叫操卷。最理想當然如果佢中四至中五就學晒DSE的內容最好，因為佢仲有一年時間操卷，而呢個時間我諗有經歷過高考的人都會認同係合理的。

我以前中六有個同學自學Pure Maths，一早識晒，駛鬼等老師教。佢日日連小息去操卷，咁咪攞A囉，最後做醫生。我以前都會取笑佢，駛唔駛咁痴線，學校都未教。而家回望，他的選擇是合理的，亦能達到佢自己做醫生的目標。

當然，我提出的方法有人受有人唔受，好正常。呢個只係個人分享，我無義務要說服你，而且我都會謹記路唔係得一條，我一定唔會乜都啱。人生係要選擇。

另外，極端咁講，呢個世界真係唔係得DSE一條路，雖然事實上大部份人都會參與。但好似我咁講，呢個世界除了DSE，仲有IB、GCE、外國升學、唔讀大學創業或工作、以運動或其它卓越成績入大學、唔讀大學做工作做到卓越（例如酒店大廚）。每個人叻既地方唔一樣，做家長要hope for the best, prepare for the worst，提醒小朋友路真係有好多條，點解大部份人選擇DSE，原因可能只係因為制度個設計係咁、個個都咁揀、入大學讀專業科會令你有一條比較低風險但有中回報的工作。。。等

ABC-DAD

我真係好想睇下樓主分享一下做十五個月孩子家長嘅喜悅。
咁得閒，小朋友好易揍，應該多啲陪下佢，小朋友大得好快

ABC-DAD

而家興“何不食肉糜咩？”，可能係，除非唔係

dativebond

其實而家湊佢真係好搞鬼，亦都好得閒，因為我其實有排都未駛煩佢教育問題，佢暫時認知能力未到，哈哈！

我老婆都話我無聊，你都無著數花咁多時間打字把鬼。認同你既人一早做左，唔認同既人只更鞏固佢本身諗法。我明，睇過「人性的弱點」呢本書都會明，人的觀念很難改變。我承認我好多缺點，尤其鍾意發表偉論鍾意說服人，可能現實工作生活未做到頂尖，我其實深深體會咩叫知易行難。不過，自己做唔到其實又唔代表你講既野係錯。大家做家長盡力做囉，始終小朋友教育要好多方面配合：家長、小朋友、學校等等人。最緊要盡左力，問心無愧，無怨無悔。

dativebond

你串我「何不食肉糜」其實真係無所謂，可能你的含意係話「你個仔得15個月大，你有乜資格教人做家長？你都未試過。呢D叫紙上談兵！」你是對的。不過，呢個世界好多野唔駛一定親身做過先識，果D叫常識和人生經驗。你啱聽就聽，玩暗串好型？我都無串過你。

dativebond

既然大部份人都被迫要玩呢個遊戲，點解唔試下諗人地講既野係咪真係對你玩贏個遊戲有幫助？你記住，我而家無搵你著數，亦唔係補習老師，我呢番分享都係我真心諗法，而我深信其實跟唔足呢個做法都唔會令個小朋友成績太差。Aim high fly high嘛。你玩得遊戲（無論自願定被迫）緊係想贏，重要係個方法你認真思索work唔work，覺得有可能work咪賮力做囉，當然前提係要誘發小朋友學習的成功感，願意配合。就算最後個小朋友考唔到頂尖，我相信都唔會差得太離譜。

dativebond

如果你覺得講野離地，有可能我和你背景唔同。講真，如果你自己係經歷過會考高考，入讀本地大學，撫心自問，係咪真係咁難？我講既野係咪唔合理？如果你自己都無經歷過，你覺得我自吹自擂，傷害到你自尊心，我願意道歉，我無意冒犯任何人。可能我誤解左，我以為黎得教育群組既家長都會好想了解前人經驗。我的方法一定唔係唯一一條，要想達到入大學目標其實好多方法。

dativebond

其中一條好易，「成功靠父幹」，送去外國囉公大囉，實入到架嘛～不過如果一早諗住行呢條路既人根本就無視DSE。所以唔係我討論對象。

dativebond

仲有一樣野大家一見到就起晒干，就係「操卷」。我想講多點。高考攞A至C既人絕大部份都係會考攞A攞B既人，高考既非語文科絕少出現升grade既現象（除非你突然覺悟或突然發奮好多），大部份人都會保持同級至降兩級。其實高考攞A至C既成績無大家想差咁遠，好可能只係總分差十零分，可以話攞C或以上都係叻仔，大致掌握該科的知識。咁個分野係乜？我經驗就係有無put one more step，有無操past paper。我舉例，譬如有一條Long Question，佔成20分，大家都識答，有操past paper攞足20分，但無操既往往可能攞得一半，因為有另外一半可能唔係咁緊要，但改卷守則要呀嘛。我只係覺得唔抵，大家付出時間一樣，都係用十幾年去準備，大家掌握該科知識能力唔差得好遠，但忽略了操卷就令你得唔到你應有的績。你唔覺得好唔抵咩？

ABC-DAD

對自己有信心，又何必介意其他人寸或呎呢？
心中有花，自然容易見到花

dativebond

哈哈。其實你講野既模式都幾有趣～我都學到野！

ABC-DAD

對自己有信心，又何必介意其他人寸或呎呢？
心中有花，自然容易見到花
公開討論，好難唔（遇）到我呢類水平普通嘅花生友，煩到你，唔好意思，好在你又睇得開

dativebond

網上討論其實有好處，大家都比到最真心諗法，唔需要討好任何人，亦唔怕招惹任何人，所有野以真為先。
不過，壞處好多時道理好難一五一十咁講清楚。
不過唔緊要，最緊要係真。
不過我真心鍾意你呢種講野方式，好搞鬼

HKTHK

回覆 ABC-DAD 的帖子

呢個世界有計劃係好的, 不過實踐又係另外一回事! 更何況個計劃本身 .......

dativebond

我明我明。計劃可能唔落地，所以咪上黎諗住拋磚引玉囉。我點估到大家一見「贏在乜乜乜」就起干啫，諗住噱頭咋嘛。
你有經驗。醒一兩招比細佬分享下啦～