聖保羅書院名人舊生 盼助張耀升兒子入爸爸母校

elbar

【明報專訊】牛頭角迷你倉四級火奪去兩名消防員嘅性命，其中高級消防隊長張耀升（圖）遺下4個月大兒子，消防處將於17號為張耀升舉行喪禮。而張耀升嘅中學母校、現為直資嘅聖保羅書院，一班著名校友好有心，幫佢囝囝籌款以供書教學，希望聖保羅書院嘅小學同中學，都能為張耀升嘅囝囝留個學位，學費就由呢班校友全數負責。


學費全由校友負責


呢班校友包括前局長葉澍堃、全國政協委員胡漢清、港區人大代表馬豪輝、九龍表行董事總經理黃錦成、著名骨科專家傅浩強醫生等。有份發起籌款嘅校友Tenny同Emily講，張耀升囝囝中、小學嘅12年學校教育學費，呢班校友都會負責，嚟緊亦會發電郵畀其他校友，若反應熱烈，亦會考慮資助對方大學學費同生活費。


Tenny話，一班校友都好希望書院可預留學位，早前已將建議與聖保羅書院校長商討，對方亦好支持呢個建議，但由於涉及學位，亦要同小學校長傾傾，以及須校董會通過，佢哋希望盡快收到好消息，再向張太匯報同討論。