學生壓力瀕爆煲 教育混亂添悲劇（東方功夫茶）

elbar

俗語有云︰「井無壓力不出油，人無壓力輕飄飄。」前美國國務卿基辛格亦講過︰「鑽石係煤炭壓力下形成嘅精品。」即係話，適當嘅壓力往往可以轉化為動力。不過講就咁講啫，如果唔識得排解壓力，特別係年輕人抗逆能力不足，谷埋谷埋好容易出事嘅咋！

唔係講笑o架，最近頻頻發生學生自殺悲劇，引起社會高度關注。有政黨調查發現，超過八成受訪家長認為子女處於壓力之下，其中近七成表示主要壓力來自學業，其次係人際關係及前途。最得人驚嘅係，三成受訪學生表示曾因壓力而發脾氣、哭及失眠，百分之二更表示曾經萌生自殺念頭添！

話時話，青少年自殺好似傳染病咁，一個接一個，都咪話唔得人驚。點解咁多年輕人走上不歸路？上述調查已經提供咗答案，今時今日學生為咗應付繁重嘅功課及沒完沒了嘅考試，搞到日操夜操，壓力唔爆煲至奇喇。


最令人詬病嘅係，本港教育制度朝令夕改，一時母語教學，一時語言微調，一時上車，一時落車，五時花六時變，學生同家長無所適從，疲於奔命，加上教育局添煩添亂，淨係全港性系統評估（TSA）已經搞到天怒人怨。難為人稱「吳得掂」嘅教育局局長仲話，對於有人將年輕人自殺問題歸咎教育制度「深深不忿」、「好唔順氣」喎。其實，如果唔係教育制度失敗，學生壓力沉重，又點會搞成咁吖。


可能有人會話，部分父母擔心子女輸喺起跑線上，要求佢哋十八般武藝樣樣皆能，報讀各式各樣嘅興趣班及補習班，結果揠苗助長，適得其反。呢個無疑係事實，有啲家長望子成龍，反而害咗子女，但亦有唔少家長係身不由己o架。正如上述調查顯示，大部分家長知道子女學業壓力大，但只有一成多認為學校應該減少功課。咁又難怪嘅，家陣升學競爭激烈，加上社會上流機會愈來愈少，即使入到大學亦唔代表前途一片光明，讀書不成更加前路茫茫，家長催谷子女嘅心情完全可以理解。


諗落都幾唏噓，當年香港經濟仲未起飛，生活條件差，各種壓力都遠遠大過今日，但整個社會奮發向上，人人埋頭苦幹，穿膠花又好，織假髮都好，一樣過得開開心心；依家社會愈來愈富裕，年輕人反而愈來愈消沉，愈來愈悲觀，究竟係乜嘢原因，市民固然應該反思，港府更加應該檢討。


所以話，要救救孩子，父母有責任，政府亦有責任，淨係叫學生簽署「不自殺契約」，或者派幾千蚊畀學校搞生命教育講座，根本係敷衍了事，點可能解決問題吖！

superccc

原帖由 elbar 於 16-03-26 發表
俗語有云︰「井無壓力不出油，人無壓力輕飄飄。」前美國國務卿基辛格亦講過︰「鑽石係煤炭壓力下形成嘅精品 ...

剛又一名學童自殺
on.cc 東網專訊：復活節假期完結，在明日恢復上學前夕，一名17歲女學生，傍晚6時許，被發現從長沙灣昌華街38號高處墮下，跌落後巷，救護員接報到場將女事主送院救治，惟經搶救後證實不治，現場遺下事主波鞋及手袋，警方正調查其墮樓原因。