用戶登入
用戶名稱:
密      碼:
搜索
教育王國 討論區 教育講場 幼稚園面試(左丁山)
發新帖
查看: 448|回覆: 0
go

幼稚園面試(左丁山)

Rank: 12Rank: 12Rank: 12


71379
發表於 15-12-1 09:00 |顯示全部帖子
前幾日本欄講辦學一條龍,就有老友A同左丁山講不是笑話的笑話。呢日大家約咗在皇朝會吃便飯,傾到不亦樂乎。皇朝會年前裝修之後,咖啡室大躍進,價錢與食物水平皆令人驚喜,比起其他會所嘅咖啡室類別餐廳,例如馬會之六化郎與銀袋,領先成條街,左丁山每到灣仔公幹,就會心思思行去皇朝會咖啡室食吓嘢,嗰味百零蚊嘅葡國雞飯嘅份量等於Zuma三個定食午餐,皇朝會有不少內地人會員,有一次見到兩位內地婦人就係叫一個葡國雞飯兩人共食。

同老友A坐在皇朝會中菜廳飲茶,叫做唔錯咁啦,並無驚喜,但聽老友A講笑話,就有啲驚驚地。老友A話為咗個細女入幼稚園,自己親自出馬,搵人介紹,卒之有幸在一間巴閉到極嘅幼稚園報到名,可以參加面試,未考乖女之前,先問父母若干問題,第一條標準問題就係:「你地點嚟學校㗎。」老友A答:「我揸車嚟。」只見校長面色一沉,老友A心知不妙。校長再問:「好似香港名人榜,富豪榜之中,未見過你大名噃,請問你做盛行?」老友A一時之間唔知點答,只能講自己係投資專家,校長又哼咗一聲,最後面試完畢,校長冷冰冰咁話:「我地稍後會書面通知你是否取錄令千金。」

老友A住在南區獨立屋,時值起碼兩三億,又在海外有唔少物業,點會吞得落呢口氣呀,於是四出打聽呢間巴閉幼稚園係誰人開辦,邊個係大股東,卒之俾佢搵到一個小股東係佢嘅賽馬團體(Syndicate)成員嘅太太,呢位成員唔話得,叫太太打個電話搵校長,於是A千金順利入學,所以話馬場就係超級聯繫點!左丁山瞪住老友A講:「咁我地點辦?」老友A大笑:「你地咪讀番學券制本地幼稚園囉!」咁樣係輸在起跑線噃?老友A話:「時代需要啫,想當年,我去到美國第二日就被安排到酒店廚房洗碗碟,洗足兩年搵學費,你左丁山自己出身band5私校,咁又點啫!」講番自己,當然如此,但下一代個個爭住送子女入貴到無倫嘅幼稚園,唔去爭吓,似乎會跑輸大市,家長點會甘心俾子女讀band3學校㗎!食完飯與記者小G講起,佢話:「你個師弟一田莊偉忠講過,跑一百公尺就話怕輸在起跑線啫,人生係馬拉松噃,只怕輸在終點前直路!」咦,又講得幾啱聽噃,見到莊偉忠就讚番佢幾句先。


左丁山