資優小朋友適合傳統名校嗎？

piglet0529

原帖由 小曳人 於 15-06-25 發表
我有時都懷疑阿仔佢....不過好多時樣樣都有dd，只係未到"確診"嗰條線

小兒小一派位派得很差, 派左去跨區借位天水圍區, 已經成功叩回第二志願, 是新界西區的資優總部, 但區內名氣不及第一志願, 第一志願係區內名校, 叩門未放榜, 活動教學, 教學模式較適合小兒, 但第二志願已開始各樣新生安排, 老公說不如唔好諗就算第一收也放棄, 我心中有不捨所以貼文問一下

anubisking

既然第二係新界西區的資優總部.咁會更啱佢.

做家長唔應該只求面子, 名氣有乜咁大不了,
教學模式應係第二志願啱D,因為你話係資優總部,應有特定課程配合

小曳人

樓主，如果學校多已受訓的老師，對孩子係好事，教學模式反而係其次，一個資優嘅小朋友，佢嘅學習主要不在學校教科書所教嘅

maymay321

小曳人 發表於 15-6-26 07:58
樓主，如果學校多已受訓的老師，對孩子係好事，教學模式反而係其次，一個資優嘅小朋友，佢嘅學習主要不在學 ...

你認為資優私校好，定津校好些？你兩者都讀過，可分享轉校原因嗎？

piglet0529

原帖由 小曳人 於 15-06-26 發表
樓主，如果學校多已受訓的老師，對孩子係好事，教學模式反而係其次，一個資優嘅小朋友，佢嘅學習主要不在學 ...

即是活動教學相對傳統教學對資優小朋友冇大分別?

jimmyveron

現在讀真辛苦，還要考慮學校是否適合小朋友，又要考慮功課量，又驚教深一年，點解以前讀書整係考慮邊間學校最近，當年入讀到間最近中學反而係最開心。

piglet0529

原帖由 jimmyveron 於 15-06-26 發表
現在讀真辛苦，還要考慮學校是否適合小朋友，又要考慮功課量，又驚教深一年，點解以前讀書整係考慮邊間學校 ...

依家資訊發達, 想當年有的依家睇番應你資優兒但學術很差, 因為當時已經歸類為曳及不守課堂規則

wan_sosin

樓主，我識一個我叫佢三重特殊資優，自閉+專注力不足+資優，資優已確定咗，佢讀普通津校，成積普通，只係數學分數稍好，學校根本睇唔出學生係資優，亦留意唔到佢其他特殊問題，佢只係係學校唔多同同學玩得埋。資優唔一定會係學校表現到佢嘅個人才能，尤其是連帶有特殊情況的小朋友，其實如果個小朋友能適應校園生活，能開心返學，已很足夠，優異才能唔一定要係學校發展，係學校能做個平常小朋友仲開心！

小曳人

piglet0529 發表於 15-6-26 09:02
即是活動教學相對傳統教學對資優小朋友冇大分別?

活動教學會用簡易方法明白事物，亦有機會俾資優兒明白到更深層嘅智識但以我個仔，佢大部份嘅嘢本身都識，就算未接觸過，一聽就明
所以响兩種環境... 分別唔太大，只要老師接納並樂意俾多d表現機會，我發現傳統學校都可以幾好玩 (其實大部份學校初小都係比較活動教學！)

講到底，係老師識唔識(有無時間)同個小朋友溝通，如果唔溝通嘅，好快就被label係曳仔
仲有，就係小朋友有幾肯坐定定喇！

piglet0529

原帖由 小曳人 於 15-06-26 發表
活動教學會用簡易方法明白事物，亦有機會俾資優兒明白到更深層嘅智識但以我個仔，佢大部份嘅嘢本身都識，就 ...

咁我仔係幾肯坐定定的

Charlotte_mom

朋友個女係雙特殊(資優+聽障), 果時唔知訂人揀佢又揀, 揀左區內最top果間, 又近屋企, 又俾佢抽中

去新生簡介已經知出事, 校長不停講自己學生點叻叻叻叻叻叻叻, 點勁勁勁勁勁勁, banding升中又點點點點點, 不過洗濕左個頭就去啦

我朋友已經不斷將評估報告交俾學校, 每次見完醫生都update, 學校從來零feedback, 佢打電話去問, 學校都話無咩觀察到 (我朋友唔係覺得自己個女叻, 佢係知佢有d聽力情緒問題, 無理由學校無事需要溝通)
佢女情緒上有時比較扭計, 試過唔肯返學, 大遲到, 返到去老師無問過一句, 亦無任何老師社工出現過去了解, 就咁不了了之
佢個女拎住醫生信, 話某d聲音聽唔好, 建議坐前面; 有次個女話老師掉左去後面, 家長打電話去了解, 老師解釋就係一句: 無, 想睇下效果點姐

讀左一年, 我朋友逃亡式轉校

學樓上話齋, 學校教咩唔係最重要, 皇要係佢肯唔肯花心機去了解小朋友需要, 在小朋友做錯時提點輔導, 在小朋友做得出色時令佢有機會更上一層樓, 呢d係心機

睇下校務報告可以知道學校做左幾多野

beastiebistro

piglet0529 發表於 15-6-26 09:22
依家資訊發達, 想當年有的依家睇番應你資優兒但學術很差, 因為當時已經歸類為曳及不守課堂規則



  ...

我覺得首先要接受資優不等如績優。對有興趣的科目，資優小朋友一定會自學，勒都勒唔住。相反，對無興趣或相對較弱的科目，分分鐘比平常小朋友成績更差。如果家長可以接受，那麼學校的教法（傳統或活動）根本不是問題。

小曳人

maymay321 發表於 15-6-26 08:00
你認為資優私校好，定津校好些？你兩者都讀過，可分享轉校原因嗎？

學術型私校，大班，小朋友一定要坐得定
津校，點都少d人，幸運地此津校教法出奇地生動好玩！
我唔會話邊類學校好d，只會話响唔同學校會得到唔同嘅嘢，而亦唔係個個人仔都適應到超大班坐定定嘅校園生活

私校，阿仔得到嘅會係課後資優活動，認識自己，增強某d方面嘅能力，學校教育心理學家嘅寶貝
津校，一視同仁，無特別照顧，想見教育心理學家都話資優唔係SEN！除非你有其他同資優無關嘅難題！老師一方面要照顧學習差異，一方面要睇住上堂紀律，難得教法活潑生動，起碼無上堂遊雲先啦！

至於點解要轉校，主因係有細佬跟尾，哥哥想同細佬一齊返學，而我地覺得細佬唔適合該私小，所以諗轉校，但轉唔到都無所謂，我地對私小滿意，哥哥亦讀得好開心

jimmyveron

原帖由 piglet0529 於 15-06-26 發表
依家資訊發達, 想當年有的依家睇番應你資優兒但學術很差, 因為當時已經歸類為曳及不守課堂規則



  ...

以前讀書差吾會比人趕出校，而家讀書差好比學校當怪物看待

piglet0529

原帖由 beastiebistro 於 15-06-26 發表
我覺得首先要接受資優不等如績優。對有興趣的科目，資優小朋友一定會自學，勒都勒唔住。相反，對無興趣或相 ...

我是接受他不會績優的, 但如果被一間學校定為曳唔專心, 只會投訴家長的話, 小朋友成績只會更差

beastiebistro

piglet0529 發表於 15-6-26 10:32
我是接受他不會績優的, 但如果被一間學校定為曳唔專心, 只會投訴家長的話, 小朋友成績只會更差



  ...

每間學校都會有規則，不見得活動教學的學校就會接受不守規則的小朋友。教導小朋友遵守任何活動（包括上學）的規則是父母的責任。個人覺得「資優 〉上堂悶 〉亂搞」不應是小朋友上學「曳」的藉口。若你真的擔心有這個問題，現在就是調整小朋友心態的時候。

singwin

原帖由 Charlotte_mom 於 15-06-26 發表
朋友個女係雙特殊(資優+聽障), 果時唔知訂人揀佢又揀, 揀左區內最top果間, 又近屋企, 又俾佢抽中

去新生簡 ...

這些所謂名校當自己是上市公司,只為利潤（成績),剝削員工(學生),沒有任何人情味.走得好正石確

小曳人

beastiebistro 發表於 15-6-26 14:04
教導小朋友遵守任何活動（包括上學）的規則是父母的責任。個人覺得「資優 〉上堂悶 〉亂搞」不應是小朋友上學「曳」的藉口。

如果一個熟悉資優兒心理嘅教育工作者，唔應該講呢類說話，佢地應該比家長更明白呢類小朋友嘅需要
正如，我地唔應該怪過度活躍嘅小朋友"曳"，因為佢地控制唔到自己！
上堂聽書覺得悶，係資優兒特質，老師嘅責任就係要令佢地明白都一樣可以投入課堂！
當然，曳嘅定儀人人唔同，有d老師連自己發夢都唔俾！有d就積極令小朋友有成功感，努力投入參與
所以同一個小朋友，面對唔同老師，都可以係乖巧同唔聽話！

分別係個老師有幾了解唔同特質嘅學生

小曳人

早前資優教育學院一班家長，曾去信特首，要求增加資源培訓教師，令到更多老師識得點處理班房裡面呢班會搞事嘅資優兒，同時希望能夠幫到嗰批雙重特殊資優，照顧到佢地嘅特殊需要

希望呢班被認為得到上天禮物 (gifted)嘅小朋友，唔好被遺忘，了解佢地同時係有特殊學習需要嘅一群，好需要有了解佢地嘅教育工作者，唔單止令善用上天賜與嘅禮物，更重要嘅係得到接納，並愉快成長！

四隻貓

piglet0529 發表於 15-6-26 10:32
我是接受他不會績優的, 但如果被一間學校定為曳唔專心, 只會投訴家長的話, 小朋友成績只會更差



  ...

我都擔心這問題.
我仔係幼稚園有段時期做堂課快, 其他同學未完成, 佢便會無所事事四圍走或遊雲. 好彩學校老師明白, 會俾佢做完去睇書或幫老師做野.
朋友女女津校小一, 因為數學叻, 上堂好快做晒成本數學書既題目, 悶便無心機聽書, 自己畫圖畫同練習寫字, 老師投訴家長, 話唔允許學生上堂做其他野. 之後朋友女女就更無聊, 遊雲到悶便喊或發脾氣, 情況就更差了. 後來社工幫手, 最後學校允許佢上數學完成左題目可自己練習寫字, 朋友女女情緒就好多了. 但數學老師就好唔喜歡佢, 經常投訴家長. 朋友都想轉校...