用戶登入
用戶名稱:
密      碼:
搜索
教育王國 討論區 教育講場 老師叫苦(左丁山)
發新帖
查看: 228|回覆: 0
go

老師叫苦(左丁山)

Rank: 12Rank: 12Rank: 12


70806
發表於 15-1-7 12:30 |顯示全部帖子
政府卒之票控亞洲電視及一名董事(據悉係執行董事葉家寶),控罪包括由2014年7月1日至9月30日故意及無合理辯解下拖欠工資;董事涉嫌同意、縱容或疏忽於不發放工資。亞視欠薪,早已成為傳媒新聞,上到法庭,亞視代表實不知如何解釋,如亞視各位主要股東繼續不合作,不注資,不貸款俾亞視的話,亞視不知如何營運下去,以目前情況睇,可能已經技術上周轉不靈(technically insolvent)。

記者K講起呢單事件,十分同情亞視員工,原來佢幾年前曾經跳槽過亞視做記者,過吓曝光癮,在六時新聞出鏡,但做咗冇幾耐,發覺好唔對路,要乜冇乜,急急又搵過另外一份工作,走人先。佢話最近聽到,昔日亞視在邱德根時代傳聞有過限制員工用公司廁紙之事,今日仲慘,員工要自己買廁紙返工自用,簡直係聞所未聞。不過廁紙用得幾多錢吖,大凡一間公司推出限制員工飲咖啡、用廁紙等等慳錢措施,銀行家即刻睇到紅燈警告,準備收遮可也。

今年勞工市場好景,失業率偏低,亞視員工早走早着。以前時興農曆年過後,打工仔就會搵工跳槽。近日招聘網站Recruit調查發現,74%打工仔打算今年轉工,比例之高實在驚人,做乜要轉工呢?32%話要追求工作生活平衡(即是嫌棄太長時間工作),27%不滿現職工作環境,19%話晉升機會少,14%不滿意加薪幅度。至於轉工後,工作環境會否更好,工作時間是否會減少,其實係冇保證嘅,但起碼會加咗人工先啦。80後,90後打工仔,最緊要嘅係每周五天工作,要員工星期六返工嘅公司,已經out晒,平時放七、八點,唔緊要,但要做到晚上八點後,老闆即係想趕員工離職箒,做個現代老闆,留住人才,要懂得員工心態至得。有人以為做教師最多假放,夠輕鬆,殊不知並非必然,教中文、英文嘅老師因要改作文功課,經常在家改卷改到暈,左丁山就認識一位英文老師聖誕放假期間改作業,改英文卷,真係改到強顏歡笑,因為英文係主科,校長睇到緊一緊,不停催谷學生,英文老師自不然陪埋學生辛苦。不過有一位老師(通識)好幽默,佢對左丁山講「最辛苦不是改卷,而係帶學生到內地進行國情教育,了解祖國!」旅行都話辛苦?原來係一班學生上到大陸打開iPad、手機完全受防火牆困擾,睇唔到gmail,睇唔到YouTube,上網遇不少困難,有學生話:「乜祖國咁㗎,好彩我地住在香港!」上完大陸,年青學生更難與祖國心連心,老師話難以交差呀!


左丁山