盧寵茂言重了（左丁山）

elbar

http://hk.apple.nextmedia.com/supplement/columnist/左丁山/art/20131011/18458576


十月三日本欄寫「中大新生剪影」，一位讀者Anthony來郵詢問：「IB或GCE A Level學生又如何？」照左丁山所知，呢類學生可透過非聯招（non-JUPAS）方法申請入學，每年都有唔少，特別係法律及商科、醫科方面。至於要求成績如何，「中大通訊」冇講，但按文憑試學生入學成績推算，都係要高成績學生先至有希望嘅嘞。有一點未必有人留意到嘅，就係英國A Level之考試難度與俾分鬆緊，近年來飽受英國報章批評，認為不如十年前，十年前又不如二十年前，香港學界早已知得清楚，在英國高考得到六A、五A，申請入本地大學嘅話，不相等於本地之高考狀元，每間本地大學，每個學系都會有不同考慮及將GCE成績調整。

講到大學，呢輪見到港大校友，人人有嘢講，中環價值素來崇尚國際化，反對本土化，主張開放門戶，延攬各方英才，不怕競爭，不止IFC，擺花街亦擠滿外國人，英語法語德語意大利語與普通話，隨街聽聞，故此港大選出一位英國人做校長，大家都冇乜反應，點知港大知名教授發重炮猛轟候任校長，港大醫學院權威教授盧寵茂大罵馬斐森三無（無知、無能、無心），語氣之重，得未曾有，整個中環為之吃驚。睇番布里斯托大學之世界排名，該大學之醫學院地位，確係與港大相差一大截，馬斐森本人之學術地位，亦與徐立之相差幾條街，但如果報名參賽（或獵頭族所能搵到之最佳候選人）皆是一班尾、二班頭之馬，內裏無「雄心威龍」、「精英大師」、「原居民」呢類超級名駒，則巧婦難為無米之炊，港大校長遴選委員會都冇辦法㗎，選個最好嘅都係「紅山茶」、「牛精大師」呢啲級數嘅箒。以佢嘅資歷及學術地位（如蘋果所報道），假若佢真係一位姓馬名斐森之華人，港大未必會選佢做新校長。之不過，盧寵茂之攻擊，涉及人身，尤其是批馬斐森不懂中文，不能與香港以至內地社會各界溝通，是為無能，未免言重。如果係咁，哈佛劍橋校長想應徵港大職位，都係唔及格，無能吖嘛，此點有排外之嫌。呢日在置地廣場碰到賓架Ｐ與投資Ｆ，兩人都不是港大畢業生，但兩人異口同聲大罵盧寵茂，反而同情馬斐森喎。  


左丁山