囡囡13個月仲未識叫爸爸媽媽,點教佢好？

monkeydiary

如題,請幫忙,謝謝！

wilyun

咁細個未識都好正常喇!我個仔咁大個都一樣未識...你比多D時間,同佢講多D野,好快佢就會識叫你地架喇~

monkeydiary

但佢而家14個月都仲係唔多肯講野，雖然佢而家已經識叫〝媽〞、〝爸〞、〝婆〞(講得唔正，成日講成〝a ball〞), 但每次都係我不斷同佢講〝叫媽媽〞,不斷咁講左十幾次，佢先肯講一句〝媽〞,要佢講多次，就發晒脾氣，我都唔知點教佢好，又就黎in N班， 之前已經俾3間幼稚園reject了，我驚佢唔識講野，就算俾佢見多幾間，個結果都係一樣。唉！我真係唔識教，但又知唔可以放棄，有冇人可以幫下我呀?

monkeydiary

不過如果我不斷咁同佢講野(咩都同佢講，見到咩就講咩),佢就會用一大堆bb話回應我

bluefox140

回復 monkeydiary 的帖子

我個仔以前都系咁。最好系他要你幫他做野的時候要求他叫你。 我識得一個言語病理學家，她會定期開家長同小朋友一起上堂的workshop, 教好多如何在日常生活中同小朋友溝通的方法，同埋點樣處理滴情緒同埋行為問題。她好好，好專業，唔使擔心她Sell你參加咩班。 你需要的話，再pm我。

monkeydiary

好呀!我有興趣上呀，可以pm我嗎?

康晴比比

健康院要求18個月講到十個單字就合格。你女才14個月末講唔太遲，BB一個月已可進步神速，所以唔洗太擔心。現階段唔好迫佢講嘢以免佢驚咗仲唔肯開聲。宜家你要做的是咩都同佢講，好似旁述咁見咩講咩，做緊咩又一路做一路描述。等BB盡量吸收多啲詞彙，到佢儲埋儲埋就識講。我個B大約在19個月開始講多啲，宜家兩歲半已口不停。當然同BB講話唔好又中又英，不要太複雜太長。要講BB眼前嘅嘢，為令佢加深記憶，要用實物或動作輔助。如同佢講「橙」就比個橙佢摸下望下聞下。同佢講跳字，就一路跳一路講。一開始用簡單句子先，等BB掌握到才將句子慢慢加長。但唔好迫佢，你講得夠多佢自然跟你講。努力加油！敎BB漫漫長路，唔好心急！

Surveyor

回復 bluefox140 的帖子

I am interest pls PM to me

monkeydiary

其實我覺得佢唔鐘意聽人指揮，例如：叫佢錫媽媽，就一定唔肯錫，但有時又會突然走埋黎錫你一啖，叫佢嗌爸爸，又唔肯叫，但有時又會突然叫爸爸(尤其是喊緊既時候) , 所以我覺得個囡唔係好聽話，但問題係考幼稚園時就一定要老師叫你做咩就做咩，否則無分，所以我而家都煩緊唔知應該點教，有冇人有心得可以分享下口呢?

康晴比比

考N班唔洗識講嘢，做到動作，指到答案，有反應就得。我女那時十五個月去見都係咁，報兩間兩間都收。點會期望一個十幾個月大開口答問題。而且就算第時in K班，小朋友本身識講，去到面試都末必肯講啦。所以搵學校都係順其自然，到臨開學一定有位放出來。帶咁細個去面試都係當帶佢去玩去見識下好啦。同埋敎BB係要大人自己不斷做做咗比佢睇先，佢睇睇聽聽埋埋係會學到，有日佢會自己做返出來。不是一味要求個BB做這做那，十個有八個都唔會聽㗎。

康晴比比

那時我女十幾個月，我出街一定抱住佢，一路行見咩指咩，一路講解沿路事物。語氣誇張咁講，再唔係同佢唱兒歌。返到屋企到住佢更加做每個動作都講，媽咪飲水，媽咪掃地，呢個係XXx，BB宜家玩波。。。。又唱又跳大大動作語調抑揚頓挫啲去引佢注意，做乜都好似同佢玩。多同佢睇書，講故事，日日對住佢好似做舞台劇咁表情豐富語氣誇張。到宜家佢兩歲半佢好活潑，表情多多，好好反應，講嘢好叻。宜家出街會好似我以前咁描述番比我聽。暫時N加K班加埋報過四間學校有三間都收。所以要敎係要由細比多啲input。不可急於一時。

monkeydiary

回復 康晴比比 的帖子

多謝你既指導,我照你咁講，日日咩都同佢講，真係好左好多，而家識講〝爸爸〞,〝媽媽〞,〝姨姨〞,〝婆婆〞,〝抱抱〞,〝橙〞,〝熱熱〞,〝奶奶〞,動作都識做5、6個(仲要叫佢做10次，有7、8次都會做到)之前你提到話會同bb睇書，其實我都有做，不過通常都係睇教〝ABC〞,〝123〞,或者一版有一大幅圖畫加一、二句句子的書，我覺囡囡好似冇咩興趣，每次同佢睇，唔夠5分鐘就走左去，係咪d書太悶呢？我應該搵d咩書比佢睇？

康晴比比

嘩，咁咪好囉，BB真係可以一日千里㗎。指導？唔敢當！只是分享下我的做法。Hehe，其實我在女歲幾時，我冇特別買咩書比BB。那時冇同佢睇英文字母或數字，因我覺得字對BB係無意義的，結果我女後來唱ABC Song自己學識。那時我只是隨手拿家中多圖片嘅書或雜誌，如親子雜誌，旅遊書咁同佢掀。我指住啲圖，就住BB當時嘅認知範圍看圖作文。如指住一幅下雨街景嘅相話，下雨了，要擔摭啦。當然要加埋下雨動作，最好攞埋把摭開比佢睇下掂下。増加趣味。(到第時真係下雨時，再同佢講下，就會識咗）之後大啲明多啲可以再作得複雜啲。如佢真係冇興趣就由佢先，唔好迫。或可買些有好多圖片嘅如my first word 啲BB書，啲圖片多是日常見的物件，你又可以形容下幅圖，就算如Cup, 你可以話呢隻係杯，用來飲水，最好有隻真嘅杯在手，飲比佢睇。所以睇咩書唔緊要，最緊要聯係到佢周圍嘅嘢等佢明，再加埋動作和道具，BB應該有興趣，當然同佢睇書前要有少少預備了。

康晴比比

盡量利用BB嘅觸覺，視覺，聽覺，味覺，嗅覺，去敎佢。佢地會學得好快。