請大家分享或訴說一些旁人地眼光及言語的傷害經歷

xixi1218

開這個話題，主要是經歷過不少，最近一次是家中嫲嫲帶孩子出去時遇到的，讓我非常憤慨。由於孩子要買麵包，但是條隊很長，嫲嫲就叫孩子去另一家買，因為孩子喜歡那一家並且當時他很想吃那個麵包，於是孩子就接受不了，大哭，并睡地下大叫。由於嫲嫲雖然到香港幾十年，但普通話口語還很重，當時有一位阿伯，就諷刺地對大家說：“國民教育，這些就是國民教育出來的。”嫲嫲當時已被孩子弄到不知所措，也沒有心力去應付這位阿伯，但是她說她當時真是很難受，回家后她講述給我聽，我亦很惱很無奈。

其實，真的希望有些人不要出聲，不瞭解情況就去大發言論，以為自己很在理，誰不知深深地中傷了別人。我們不可能幫孩子掛個牌子說他是特殊的，但是，當孩子出現一些不尋常的行為，其實，旁人只需要不去講不去用厭惡地眼色，對我們來說已是極大的安慰了。

每次出街都是一個心理壓力很大的活動，心中一條弦緊緊繃住，就擔心孩子突然的問題行為出現。哎，有時真想把他放在家中，不去見人。但是理智告訴我，我不可以那樣做，出街也是我孩子的權力，那些低素質的人也是可悲的。

wan_sosin

路過這裡,看到你的遭遇感到很難過!
我相信我細個時是有輕微自閉的,到現在仍不易辨識別人的面孔,在街上也常看不見我認識的人,總是別人叫我.我細個都有很多古怪行為,當年也沒有什麼特殊教育,也沒有什麼叫自閉症的,所以我常給同學取笑,功課完全跟不上,老師就駡我懶惰!自信心極低!
現在我兒子是懷疑ADHD,未確診,但走在街上,他的行為都帶來很多人側目,當然說話也聽了不少,有時連朋友也會說些不諒解的說話,我也不太能向他們解釋,因為未確診,我沒有東西能証明小朋友有些特別!
所以我也受慣了別人眼光!
但沒經歷過的,不論素質如何,總是很難明白的,有時連老師都不免會有些偏見,最初我仔的班主任也認為我是管教不力!
遇到這樣的事情,總會不快,但盡量叫自己放低.生活已不易過!唔好自己唔放過自己!

autunmbb

說真的，要傷心的情境每天都會有發生，行為問題日日新鮮，大叫瞓地發脾4周圍走樣樣齊～～～ 別人總有不同的眼光，我叫我自己就不要太在意，就管好孩子的行為就好了，經過一年多的爭鬥，已經有點改善，但..... 別人看來都是不聽話的孩子吧！

自己的孩子最緊要，別人點諗就由得佢啦。未有這個孩子以前，我自己也試過對其他人的怪異行為側目，都只係一刻間的事，轉眼又忘記了。所以啦，現在變成了當事人，別人看不過眼都係一刻間的事，都是我的人生旅途的過客，唔好將呢d事放得咁重。

好多時難受的以為只有自己？！不要忘了你身邊的孩子，雖然他們不懂表達，但心靈也很敏感的。為了孩子，都放下這些繃繃緊吧，要教孩子放下些不開心的事，還是要先教會自己，我也不想我的孩子一生就活在別人的眼光中，我希望他不要被困難繞著，希望他能在他有限的能力，活得開心自在。

媽媽，我們自己心要寬一點，還回基本步，為小小事而開心，不要被小小事小小的眼光壓倒！

努力！加油！

mckm2007

Hi xixi1218,
我小朋友以前都有似你小朋友嘅行為，可能比你的更激，不過，我好少理會別人的批評或眼光，因為響當時的環境下，根本冇時間去在意其他人.有時我都會同其他人解釋，佢地聽得明慨就當我教識佢地一樣，唔明我就當佢地都有問題。好彩嘅係我好小遇到街上比人話/串，其中有一次係響評估中心比人話我小朋友。事原我地去評估中心見doctor, 等待中，我小朋友走入一個玩具屋入面玩而地上又鋪了膠地墊，所以一定要除鞋，我小朋友除左鞋向墊上面玩，玩到走來走去，跟著評估中心個嬸嬸叫佢唔好走來走去，要響墊上面玩，嬸嬸叫了好幾次都唔聽，跟住佢講左句：睇你(我小朋友)個樣斯斯文文，點解噤樣？唔聽人講。我99聽到好嬲，話佢講左幾次，99話佢冇啲愛心，再講就鬧返佢。我叫99唔洗閙，只係同佢講，小朋友有問題先會來評估中心，你知唔知評估中心做乜㗎！

金瑪姬

成曰比人Jeep架啦！
我會向d人講，你5洗Jeep佢，佢有病架！！！

金瑪姬

比人話~種壞晒！

misshk12

不要面子，只要孩子。大家努打啊!

kc61282

最唔開心係親戚唔體諒, 街外人我唔會理佢講乜, 把口生係人地度你鍾意點就點, 不過唔好郁手攪我個仔

owl_2046

保護個仔係我地責任.
星期日去永安, 有個客係收銀處檢查個佢想買既杯, 我比緊錢, 亞仔隻手係枱面掃來掃去, 個收銀好有禮貌咁講:小朋友, 小心D, 個杯成$2xx蚊, 陣間比你打爛都唔知叫唔叫你賠好. 我: 啊!唔好意思, $2XX蚊咋, 只要係我個仔打爛, 幾多錢我都會賠, $2XX濕濕碎啦. 我知我好寸, 但果一刻唔LIKE佢話我個仔

chowqv

我唸大家要搵個平衡，我自己盡量做到不卑不亢。

個仔有病係事實，旁人唔知都係事實；唔需要人地講幾句就勞氣，因為我已經教仔教到無氣。

會體諒我既自然體諒，唔體諒既，就算至親，都會俾說話你聽。佢地講既內容已經唔再重要。

Mao

重要的人不介意
介意的人不重要

共勉之

ka-sandra

我今早見到情況都差不多. 有個a仔伸個頭要去看一個女人的袋, 那個人立即蓋袋,動作好快. 另一個情形, 一個女人在看報紙,小朋友又想伸個頭去看.那個女人唔like. 做人唔洗咁,擺明係歧視. 小朋友而已.  如果他們不是a仔, 我們都不用那麼辛苦,天天去逼搭mtr. 那2個女人那麼怕小朋友,就不要坐,應該企係度,鬼去睇你地做咩. 只可以講,我們的小朋友不幸運有這個症,不是他們自己選. 外人為何不去體諒他們呢? 根本不關我們識唔識教仔,而是他們是a仔,我們還沒打開他們的鎖匙. 如果打開了鎖,我們還會那麼辛苦嗎? 我現在都不理別人的眼光, 他們喜歡用什麼眼光就用什麼眼光,用冷言冷語給我們就給吧. 干什麼要怕他們? 又不是為他們而活. 我只可以說:祝他們好運. 所以不用理他們的眼光,關他們什麼事. 評估出來的結果,根本不需要向別人解釋. 醫生說只是對座入號. 這條漫長的路對於我來說才剛開始,大家加油. 把氣力留下來教我們的小朋友. 他們會成長.

xixi1218

多謝各位的回覆。我相信有一日，我會不再在乎別人的眼光。其實我已比以前好一些了，相信以後亦會更加坦然。加油！

jjcow

xixi1218 發表於 12-9-14 22:47
多謝各位的回覆。我相信有一日，我會不再在乎別人的眼光。其實我已比以前好一些了，相信以後亦會更加坦然。 ...

我從來都不會在乎別人的眼光。我唯一嬲的係知情的人，包括我老爺同一位某家長資源中心阿嬸。
先講老爺，阿仔一有事我地已經同佢地講得好清楚佢咩病，會點樣。但我老爺總係時時批評阿仔脾氣大，去佢地到，有時阿仔因為固執發脾氣，我唔想再刺激佢，我亦唔鍾意係出面教仔。我會採取較溫和嘅做法，包括不予理會或暫時滿足佢部分需要。結果換來嘅係：點解佢脾氣咁臭，梗係你種慣佢啦！

呢句真係腰心腰肺... 我都好想種佢呀，但我地 A 仔家長從來都係無本錢種啲仔嘅

再講某會的家長資源中心。兩次都係為咗架有路軌嘅火車玩具，唔好講話我地啲係 A 仔，普通細路仔玩，玩玩下都會散啦。中心個阿嬸兩次都係，一出嚟見到散咗，一手撥開我仔，以責備嘅口脗怪我仔整散佢，話佢砌得好辛苦，仲特登搵膠紙黐實。最無辜係其中一次，我仔係啱啱坐埋去。當時我仔得兩歲半咋！

之後我都無再去參加個度嘅活動，仲對該會有咗戒心。後尾派咗位去該會另一中心，好在個度啲職員個個都好友善。我先洗去陰影咋。

alicekg

大家要繼續努力 !

Qlau

臉皮已有一尺厚, 訓練成一副金剛不敗真身...

autunmbb

回復 owl_2046 的帖子

咁都唔係好寸姐，我諗如果有一日我心情勁差，我會投訴佢。

idak

班朋友其中一個生日約出街食飯, 無邀請我哋,係fb睇到佢地食飯d相,  我老公話有無搞錯﹗果時個心好唔舒服,(因為老公之前成日話因為個女無晒朋友) 其實人哋唔叫都知乜事, 囡囡坐得難會發皮四, 吓吓要早走, 人哋又唔好理意收錢, 佢地次次食飯都食四五個鐘, 囡囡最多坐定定兩個鐘都好叻啦﹗最後我咪話有小朋友都好難坐咁耐啦﹗

pinkdoll

其實 家陣啲人好鐘意批評人 就算係正正常常既仔 啲人都好多負面嘢講 所以對於我哋啲a仔 更加多位比人講 真係唔介意得咁多 留番啖氣訓練個仔好過

pinkdoll

有次去澳門 因為過澳門海關好多人 咁我個仔情緒唔係咁好 咁啱有個STAFF係度 咪多口問下佢 係咪殘疾人士另外有條通道? 我老公問個陣 我找到個傷殘症

咁職員見到我個仔咁樣 就話係呀 重指咗我哋去個度

咁好少人排因為係65以上及殘疾人士先可以排 排咗一陣 有個阿伯行個嚟排隊 唔夠二秒就好大聲問我哋 乜你哋係65歲咩? 我老公望下佢 佢又好大聲問乜你哋係65歲咩? 我老公答佢: 我小朋友係有殘疾 ... 佢聽到之後 條氣都好唔順咁 不停話做父母要教好自己小朋友....要佢哋讀書...要乜要乜 ...EE哦哦咗一陣....(我冇理佢)....輪到我哋啦....我哋已經好煩又忙住俾症同夾住個仔...佢又大大聲問我哋: 咁佢边方面殘疾呀?...(其實已經有好多人望住我哋)

我回頭望一望佢....就係這時.....個A伯伯後面排個另一個B伯伯...B伯伯頂佢唔住 好大聲同A伯伯講..關你乜嘢事呀? 係咁問人 你想點呀? 咁個麻煩A伯伯就同佢鬧交 你一句我一句 咁個麻煩A伯伯重不停話 同我哋傾下計之嘛 關你(B伯伯)乜嘢事? 又伸個頭個嚟同我講: 我哋傾下計之嘛? 同我哋傾下計之嘛?

我頂佢唔順 我好平靜咁答佢: 我冇興趣同你傾計 同埋你有懷疑的話 你去問海關啲STAFF 人哋唔會無啦啦俾我排呢條隊

之後, 搞掂晒, 我哋一家人走, 佢哋重鬧緊交,最後我聽到麻煩A伯伯話B伯伯係度撩是鬥非, B伯伯就話:家陣係你撩是鬥非先至真!! 不停係到問問問 人哋都已經咁慘 你重要係到搞搞震