學2種樂器問題~~

nakoko

7歲仔,學鋼琴差唔多3年,準備考2級,每日練琴半個鐘,近一個月,同我講想學小提琴,初初我否決左佢,話佢應付唔黎云云,但佢就好堅持咁,話唔比佢試下點知佢唔得,我話比我考慮下,於是,佢隔一兩日就問下我考慮成點,佢話真係好有興趣想學,點解唔比,我就同佢講,我首要條件係唔可以放棄鋼琴,每日要同時練鋼琴同小提琴,佢應承左我,我話咁ok,等我夾下d時間如何安排,所以,想問下有經驗既家長,我見琴行好多都係話學小提琴送小提琴,係咪一般都要一次比幾個月學費既呢?我驚個仔只係3分鐘熱度,堅持唔到會side左個琴,有咩好提議?另,你地如何安排練琴上?每樣20分還是每樣30分鐘?還是一日練鋼琴一日練小提琴好?thx~~

marcuscyrus

其點解一定唔可以放棄鋼琴？如果學落左發覺佢興趣同能力係其中一樣高D，可能都要主力一樣哦
我見阿仔拉琴初期都幾攰(可能佢細)，所以開頭佢係小提琴+percussion咁練(加埋30min-45min)，琴又另外練，拉左一排佢冇咁攰，同埋要練的東東多左，就分開3樣練，但有時佢興之所至都會練完一樣又練第樣
另外你提到仔來就黎考琴?專心考好琴才加小提琴會好d哦

bebebe12345

鋼琴差唔多3年,準備考2級,相信要求不會高!讓孩子試試,或許從另一角度考慮.
小提琴將來可以入樂團,尤其是學校有,一直到中學畢業,未嘗不是一種樂趣,

totochu

其實，佢真係鍾意，就唔會覺得好辛苦。我阿女五歲開始學鋼琴和小提琴，差不多四年，都好彩堅持到。佢考完四級琴試後，便停了學琴，專心拉琴，不過最後佢都要彈番，所以有興趣就可以堅持到，不妨俾小朋友試一試。

原帖由 nakoko 於 11-8-12 09:32 發表
7歲仔,學鋼琴差唔多3年,準備考2級,每日練琴半個鐘,近一個月,同我講想學小提琴,初初我否決左佢,話佢應付唔黎云云,但佢就好堅持咁,話唔比佢試下點知佢唔得,我話比我考慮下,於是,佢隔一兩日就問下我考慮成點,佢話真係好 ...

fcbttkw

難得是小朋友自己提出，就讓他試試吧！

有些琴行付兩個月學費就送小提琴，你可以去找找，不過多數是細琴行。

mio8390

如果佢喜歡又沒有影響學業，做父母當然支持他，我囝囝和他的同學，好多都是會兩種或以上樂器，都沒有影響學業，至於練習時間上分配合，每個人都不同，要看看小朋友的吸收能力，如果上手快，每星期練幾十分鐘都可以，但有些比較慢熱，可能每星期要練數小時，這個要學了才可了解吸收情形。

nakoko

謝謝各位意見

小豆媽

我個大女, 依家都係7歲, 佢學piano + flute.
piano係我安排佢學的, flute就係佢自己好想學.  
呢一年, 因為佢好鐘意吹flute, 所以花在flute的時間都多d, 同埋睇得出佢係好鐘意.  不過佢係明白學琴係對佢學其他樂器係有幫助的, 所以佢會keep住學piano.
佢話開左學想加埋支clarinet添, 如果佢應付到, 有練習, 錢又ok, 我都會比佢試.
講真, 7歲係有足夠能力知道自己喜歡乜野.

fcbttkw

我仔剛換了3/4，如你不介意又合用，我可以將個1/2送給你囝囝初學用，有興趣可PM我！

nakoko

原帖由 fcbttkw 於 11-8-12 19:16 發表
我仔剛換了3/4，如你不介意又合用，我可以將個1/2送給你囝囝初學用，有興趣可PM我！

實在太好了,很多謝你呢
check pm

nakoko

原帖由 小豆媽 於 11-8-12 17:48 發表
我個大女, 依家都係7歲, 佢學piano + flute.
piano係我安排佢學的, flute就係佢自己好想學.  
呢一年, 因為佢好鐘意吹flute, 所以花在flute的時間都多d, 同埋睇得出佢係好鐘意.  不過佢係明白學琴係對佢學其他樂器係 ...

從來我都冇諗過比佢學2樣架,見到你地既case,我都覺得應該要比佢試下,上面媽媽講得好岩,佢想做,做媽媽既梗支持

fcbttkw

請Check PM

louis媽

我大仔之前個case係咁:

大仔當年11歲,功課,活動越來越多,很難兼顧兩樣樂器

大仔學大提琴有5年,考了2級,他不喜歡練大提琴,老師幾惡幾嚴,會責備他唔練琴,大仔上課試過喊過幾次

大仔上年年頭開始學豎琴,剛考了2級,他喜歡練豎琴,我唔叫他練琴,他會主動去練,可能豎琴比較特別,看起來比大提琴容易,加上老師幾nice唔會責備他,大仔同老師幾夾,我和大仔都喜歡這位老師

身為媽媽, 事實上我想大仔繼續學大提琴,感覺上豎琴不適合男仔,此外大提琴可以參加管弦樂隊

但大仔又好唔想學大提琴,他又承諾會積極練豎琴

和先生討論這件事,決定比大仔放棄大提琴,全神貫注豎琴上,大仔高興,我們再不需要嘥時間和晒錢學大提琴,一家人高興

下星期2大仔會考5級豎琴,共學了3年.

marcuscyrus

原帖由 louis媽 於 11-8-13 15:40 發表
我大仔之前個case係咁:

大仔當年11歲,功課,活動越來越多,很難兼顧兩樣樂器

大仔學大提琴有5年,考了2級,他不喜歡練大提琴,老師幾惡幾嚴,會責備他唔練琴,大仔上課試過喊過幾次

大仔上年年頭開始學豎琴,剛考了2級,他 ...

讚!!!恭喜你仔仔可以搵到自己喜歡的樂器

man666

原帖由 nakoko 於 11-8-12 09:32 發表
7歲仔,學鋼琴差唔多3年,準備考2級,每日練琴半個鐘,近一個月,同我講想學小提琴,初初我否決左佢,話佢應付唔黎云云,但佢就好堅持咁,話唔比佢試下點知佢唔得,我話比我考慮下,於是,佢隔一兩日就問下我考慮成點,佢話真係好 ...

1. 我覺得值得俾佢學多樣，小朋友學野真係要試吓，有時試兩三樣野，先發現到一樣啱佢自已興趣和能力的。試問一下：唔試，你又點知邊樣適合佢？有d錢，真係唔慳得。

2. 話唔定佢學學吓，發覺小提琴更適合佢。又兼顧唔到兩樣的話，我覺得真係停左鋼琴都接受到。

3. 學兩樣的話，我會建議每日都練兩樣，每樣20min.

4. 買小提琴錢，應該唔係考慮的問題。因為初學，可能一兩年就要換琴(換大d) ，唔駛買咁靚，三、五百元一件已ok。(你驚side左個琴，我就話呢d錢係值得side。講真而家一個月的英文班4堂都6,7百蚊啦！) 上面有朋友有1/2 小提琴，我估未必啱7歲小朋友，除非你個小朋友特別高大，手又長。(一般7歲我估1/4就差唔多。不過可以試下先。)

5. 應唔應付到，就真係要試過先知。建議你先和他談好條件，例如：每日要練幾多幾多邊樣樂器，甚至要求佢做好埋其他野都得添(例如英文習作，生活常規等......睇下佢係咪真係咁有誠意學小提琴？)

[ 本帖最後由 man666 於 11-8-13 23:52 編輯 ]