今早K1交書簿費, 啲老師黑口黑面!

blueblueblue

啲老師冇笑容, 有個姓何既老師又粗聲粗氣, 講野又冇尾音, 真係擔心小朋友響呢到讀點會開心。

更奇怪開左冷氣開埋風扇,但又開晒啲窗, 咁開冷氣黎仲咩, 更加唔環保。

棓棓仔仔

我都去左交,不過我無遇到你呢個情況,沿途一入去d老師同嬸嬸都好好笑容呀....
可能咁岩你去果個counter位老師問題呀,但另外仲有兩位幫手,佢地都係咁嗎??

蜜蜜斟

我都去完交書簿同茶點費,一入校門有個修女,跟住有老師呀,工友呀咁指示你去上次面試果個大room,都面帶笑容,過程都ok快
原來6月份要回去做校服...

園月

真系好多老師都黑口黑面,仲十分勢利,慢慢就會慣

CAFECAFE28

黑口黑面的老師.... IN 時都見唔小.

蜜蜜斟

你地都講到咁差既......咁你地仲會唔會係呢間學校讀呀??
但講講下,我唸起樣野,我最初去交表時,我填錯左D野,咁好正常將個頭伸前D望下張form係咪真係錯左,果個老師竟然同我講"你唔駛伸咁埋架"

blueblueblue

其實真係唔明佢地點解要咁, 黑口黑面冇黎笑容, 真係返工時間仲多過響屋企, 對住啲天真無邪既小朋友唔洗咁囉!

不過一早都知呢間學校既老師係咁, 特別係老果班, 後生果班就好啲。

blueblueblue

另外果兩位就好小小, 不過有個比通告我既老師好好笑, 講左成4次叫我睇清楚張通告, 唔好睇錯, 又叫我返屋企要睇幾次, 好似我係三歲小朋友咁, 我係家長啫, 唔係小朋友, 如果係小朋友, 佢咁小事都咁緊張, 小朋友聽到都好大壓力。

0o...雯雯...o0

我今日去d老師都好nice,走個時又有同我地講bye bye,冇見到黑面
係有1,2個講d態度麻麻

0o...雯雯...o0

我都唔記得左問佢地幾時派書,你地有問到嗎??

wpk1030

D老師口黑面黑好正常吖,遲D仲有大把你哋估唔到既野發生tim,唔係嚇你哋,多D問小朋友响學校發生既事,不過都未必有用,要睇你小朋友既性格,老師會幫小朋友洗腦,返到屋企都未必會同你講,總之小心....      祝你們好運....

蜜蜜斟

點解咁多你呢d人要抹黑d幼稚園,講真,間間學校都有好有唔好嫁啦,以訛傳訛....我唔知道你本人 / 你的小朋友係呢間學校有過乜野遭遇 / 陰影,但你的說話,好似有d恐嚇成份,不如你講白d啦,小心,小心d咩?祝好運喎...邊方面先??

blueblueblue

不如你講下啲例子黎聽下啦, 我都知佢地啲老師唔好架啦, 因為我之前有個朋友響入面教, 其實係老果批老師冇咩愛心。

wpk1030

1)我呢d只係識得抹黑你心儀幼稚園既人,所以我講乜都無用,你咪自己慢慢感受吓囉(講多哂氣)
2)我小朋友係呢間學校有過乜野遭遇 / 陰影,我無須向你交代(無謂恐嚇你)
3)恐嚇???你明唔明恐嚇係點解呢???你覺得我邊方面恐嚇呢???
4)小朋友去邊都要小心架啦!
5)祝好運...祝你日日行好運

wpk1030

你之前有朋友响度做,佢無話你知學校有咩問題咩?點解仲比你小朋友去讀呀,其實你覺得間學校有咩咁好呢?

蜜蜜斟

多謝哂!!!!

蜜蜜斟

回復 13# blueblueblue 的帖子



佢驚講d例子出黎,會嚇親我地大家麻,人地咪講左囉,所以佢應該唔會講架喇....
9月開學,我地自己慢慢感受下啦

[ 本帖最後由 蜜蜜斟 於 11-7-2 09:55 編輯 ]

0o...雯雯...o0

不如我咁講啦
其實間間學校都有好同唔好既老師
我大女,k1,k2讀左一間,上至校長,下至嬸嬸都好好既幼稚園,無奈因為要搬屋,所以k3要轉到去另一間幼稚園
k3個間,除左1,2個老師係好的,其他都係hea,出份糧咁
甚至,老師因為阿女因為寫字寫得慢而打阿女個頭..
所以到細女,我唔會報家姐k3個間.

點解我會揀聖心,因為我覺得,聖心學到野
雖然係深,但對小朋友上小學,未嘗唔係一件好事

係呢到,我睇到好多都係話學校唔好,
老師冇愛心,又洗小朋友腦....等等.
但係,如果真係咁負面,點解仲有咁多家長
要同小朋友報呢間呢??

用另一個角度睇,不如當係老師對小朋友有要求
希望小朋友會學到野

有時我覺得,而家d家長個個都當自己既小朋友係寶
小小委屈都唔受得,攪到咁多港童

我有個客都講,叻個d,老師會對佢地好好,冇咁叻可能
待遇會冇咁好,其實我都預左.
但是否好似之前既post所講,d老師咁衰,過多2個月,我地呢一班媽咪就會好清楚了.

最後,希望我地2011-2012開始k1既小朋友,有一個愉快既幼稚園生活.

buzz206

我話wpk1030講的是事實。不過，我地講咩都無用，要自己經歷才知道，我個仔都退學了。

blueblueblue

其實咁講啦, 點解我仲比佢去讀, 係因為我覺得而家啲小朋友太保護, 我亦唔想自己個小朋友變港孩, 經歷唔到錯敗, 唔比人鬧得話得, 小小事就話投訴自殺, 讀書既階段你可以好保護佢, 但到出黎做野就要真正面對一個好殘酷加現實既社會, 到時唔通佢20,30歲先同你下下講阿媽我唔做啦! 試問當年自己咪又係會比老師打手板同埋鬧之中長大, 係而家啲家長放大晒所有野, 以前我地阿媽點會識投訴。

我亦聽到呢間學校老師會用書打小朋友個頭, 但係佢地都係因為唔尊心唔留心懶散, 所以會咁做, 當然做家長一定會肉痛, 但係咪就係要佢地知因為唔尊心所以會咁樣。

雖然好多人讀得唔開心, 但係我亦見到有小朋友係返得好開心, 加上我見啲小朋友寫字好端正, 我亦希望自己個小朋友可以寫得好一手端正既字, 再加上我個女個名有個字, 係我報5間幼稚園啲老師都寫錯架, 唯獨是呢間幼稚園, 佢啲老師寫對呢個字, 所以我就決定比佢讀。

原帖由 wpk1030 於 11-7-1 02:20 發表
你之前有朋友响度做,佢無話你知學校有咩問題咩?點解仲比你小朋友去讀呀,其實你覺得間學校有咩咁好呢?