星級爸﹕坐牢與上學

uncleedward

原帖由 csy_ma 於 11-1-19 00:06 發表

......無奈有需要暫離BK，先向您、Awah、Sumyeema1、Uncle等道個別

Dear All

呢期玩自大、炫耀。告別之作，繼續此調。以下所說，除誇大之言，皆為真心話。

從小到大，不知為甚麽，自己甚受女生歡迎。(小男人唔炫耀呢樣，點似小男人？) 當然會有網友說，你有啲受歡迎，皆因你夠畸形(身邊細路教的，出處未明)。但我的情况有點特別，準確一點說，我是特別受人家的媽媽鍾愛。從小到大，每次到女孩子家後，再見面時女孩子總是說：我阿媽話佢好鍾意你。

妻子說我人長得有點醜，但卻給人家媽媽有可以將女兒一生託付的感覺。

老師之中，特別喜歡我的，都是人家的媽媽。我老掛在口邊的常拖着我手的中五的陳老師，更是人家的婆婆。

我的秘書們都待我很好，年青時秘書也年青，第一個秘書移民加國後成了會計師，第二個也跑到理工唸了個學位，但遺憾的是，二人尚未結婚，也不知鼓勵二人讀書是否有錯。但照顧得我最無微不至的是我最後一個秘書，是一子一女之母，我總感覺她也把我當成她的兒子照顧。

幾年前進醫院ICU，裏面的護士都是天使，其中一位護士媽媽，至今尚久不久打電話來討論子女教育的事情。妻子笑說：「估唔到你剩番1/10條人命都有啲吸引力呀吓，但我保證唔關你身體事。」(因入ICU係人都要剝光豬，方便啲喉周身插。)後轉到普通病房，在那長長的完全不能吃喝的大半個月當中，護士長媽媽也經常坐我床邊與我閒談解悶。她說對我的好感源於我被送往做磁力共振時怎樣也不肯除下結婚介指。我不好意思告訴她其實是手指受損事小，若不見了介指我怕就可能即時有生命危險的真正原因；當然亦存歹心，萬一出不了院，將來在追思會上，除了自負獨斷，任性妄為外，人家勉強重會有啲好嘢講。幾個月前，護士長媽媽還 emailed 了一份神奇減肥餐單給我，每七天就可以有一天任食，吃甚麽都可以。可惜自己記性不好，老忘記食到第幾天，又貪方便的由任食那一天重頭再來。

其實，以上所說，例子都是真的，但命題却不真。一生之中，身邊的天使實在太多，不分男女，不分中外。在仕途上一直扶持我，揠苗助長的都是幾個外國人爸爸。


其實，男女之別，在於女性往往較善於表達自己的感情。當日自己差不多每星期都要坐飛機出差，為了一天的例會每個月都要飛歐洲一次。每次飛機在香港機場準備起飛時，我就已經開始掛念妻子女兒。只要是在亞洲，我周末一定要回家(所以不要以為我聖誕不讓女兒回來是一個容易的決定) 。但我總羞於表達這感覺。相反，我身邊的女性就強多了，秘書很多時會大方地說：「老板，呢兩日你唔喺度，有啲掛住你。」語氣之坦然，連善妒的妻子也能接受。妻子更不用說，我乘飛機回來都會有司機來接，但只要時間許可，大都能見到太太身影。有了女兒後更會抱/拖着女兒前來。有時甚至還叫女兒跌跌撞撞的走來獻花，扮久別重逢。

這一段日子放肆了。一言一行，無不帶點委瑣齷齪，五十步笑百步的味道。「非誠勿語2」老說的一句話：人生是一場修行。猛然看一看鏡中自己，怎麽越修越醜了？

佛祖有命，馬騮仔休息時間已過，係時侯向前走回五十步，再翻兩個跟斗回五指山下面石修行。對於一眾爸爸媽媽這段時間的包容，甚至厚愛，在此一併謝過。

csy_媽，與您共進退，夠仗義啦啩。

[ 本帖最後由 uncleedward 於 11-1-20 09:13 編輯 ]

uncleedward

原帖由 hog.wash 於 11-1-20 16:04 發表
Dear All

uncleedward 講道別又點少得我。等我臨走爆啲料俾你哋知。呢條友仔認屎認屁，又話識呢個；又話識嗰個，查實如果唔係因為我，佢點會識咁多人。

話說佢中年失業，見佢咁慘(你咪信佢話自己可以担担抬抬，實情係担唔担得， ...

Dear All

(純粹博大家一粲)

本來話走就應該走，但唔抵得嗰個衰人 hog.wash (個人衰，改個名都衰過人，邊有人叫自己做豬食，分明係唔多識英文俾人點，以為改個英文名會潮啲)玩踢爆，忍唔住最後講多兩句。

妻子本乃鹹水大學生，絕非此卑鄙小人(成日以為介紹份看更替工俾我就乜嘢大恩大德咁，人哋只不過好似囝囝爸話齋，體驗生活咋嘛。) 所話嘅字都唔識多個，淨係識冧巴。其實，妻子只不過是中咗降頭中，古往今來，殺人無數，至陰至毒的「冧巴降」(出自黃子華) 。(咦，嗰個叫阿Joe嘅一向剩係吟詩，但最近無端端吟完詩後「up」咗串數字。查勻成本 Da Vincci Code 都木宰羊，唔通佢都係妻子病友？妻子每日中午起床後都有幾個鐘頭降毒發作，猛咁同我up啲我聽唔明嘅數字。好似前兩日中午貪得意，放一大塊頭菜墊底，加銀魚仔乾(浸透) 同大量薑絲嚟蒸大魚腩，問妻子好唔好。點知撞啱佢降毒發作，話「5354」，「95搭8」，搞到我個心「15、16」，「7上8落」，好彩見到妻子「3下5去2」，就張碟魚食個「7086」，仲話舊16蚊嘅魚食落有層次。嗱，佢冇事嘅時侯都幾有文化，唔係好似嗰個Judy或者嗰個林夕話「雞有雞味，魚有魚味」已經係最高境界(Judy，咪駁嘴，明屈你嘅)。

好彩自己生性愚鈍，又記性極差，對冧巴降有天然免疫能力。前幾年妻子駛咗幾十萬(我都好奇怪佢啲錢點嚟，唔通佢半夜落麥記做清潔？) 醫我，送我去埋啲乜嘢記憶訓練班，話係佢啲師弟妹啲徒孫開嘅。點知駛咗幾十萬，都剩係記得8號仔一個冧巴。妻子見我蠢過郭靖，佢縱有黃蓉之資，亦不會教出個所以然來，也就作罷。

最衰就係 hog.wash 一句「睇嚟中國仲有幾年好」引發妻子降毒發作。前兩日仲俾我見到佢哋細細聲講，只聽見妻子最後兩句「……9394，你幫我住佢。」我查勻都查唔到9394係邊隻股。咦，唔通 hog.wash個衰人想呃埋妻子啲棺材本。唔得，我都係要吸緊啲，費時人財兩失。聽講雲貴地方有一名山的捨身崖(廣告時間：所有名山都有捨身崖，因為佢哋冇東堤小築。) 下有一隱世名醫，專醫冧巴降，一於執埋行李，同妻子盡快起程。

咦，Annie 成日上山落山，唔知好唔好問吓佢有冇多兩枝行山拐扙可以借呢？試吓佢係唔係真係咁好人都好，話唔定佢都都係好似 judy 咁孤寒？重有而家天寒地凍，Wunma 郁下就周身慶，唔知係識得獨門氣功抑或有啲勁爆暖包呢？真係要請教吓。去巫蠱之地，好唔好叫 ChiChiPaPa 教番兩句咒語呢？唔知點解，我總覺得 Chi—Chi—Pa—Pa-- 好似咒語，我唸一唸就成個人就正經哂。最後唔駛講，我唔喺度，eviepa 你點都要過嚟幫我頂頂。

好了，真的要走了，要真的走了。有緣再聚。

uncleedward

大概不得不出來謝幕。

Sumyeema若你有女(你應該有吧？)就要教佢：男人嘅說話都係靠唔住。annie40，似乎新朋友中，知我莫若你。係咁就唔客氣，已將波鞋呎碼pm你，但我唔要Xdous。唔多好意頭，聽起嚟我好似要著草咁。

正在寫一回帖，講講人類學，保證悶瓜你哋後收工。連粗疏二字都講唔上嘅人類學都掂埋，露饀露倒穿底，真係唔走唔得。加上醫生拎着我啲 posts 同我講，人格分裂越嚟越嚴重，hog.wash隱隱然已成獨立人格，可能已被人視作另外一個人；加上當自己係馬騮，呢舖有排醫。

哎，eviepa 究竟你有冇聽清楚我嘅請求？If this is your way to get me to say something, you have succeeded. 我叫你幫我頂兩嘴，你知唔知乜嘢叫做「頂嘴」？