出街街唔比媽咪拖？

colin0409

我個囝囝１７個月，佢由小到大，都唔鐘意受束縛。初初學行路，我們會扶著佢。到現在已識跑，佢一向都唔比我們拖，要強行拖佢，佢就發「皮」氣大哭。
現在出街好多時我只有抱著佢或坐bb車，因為怕佢唔拖著手，自己萬一走出馬路，就會有危險。

我問過有些媽咪，佢地的bb會比大人拖手出街街，但我個bb就唔肯，可以點教佢？

Imagist

我亞囡依家28個月大, 佢由細到大都好獨立, 唔鍾意比人拖住. 但是我由佢識自己行開始同佢講出街一定要比大人拖住, 如果係安全既環境MAMI就會比妳自己行. 初初佢都唔肯架! 咁我咪同佢講唔比人拖就要比人抱住, 如是者, 佢唔比我拖我就會抱起佢, 咁之後佢就肯比我拖住行街啦!

lun_shan925

你好,我個仔而家20個月,佢都係咁..
佢由學企開始就唔俾人掂...
學行果陣想拖o下佢都唔得...
到學識行就當然更加唔俾人拖啦...
每次出街俾佢落地,
我o地第一件事都係拖住佢講:"要拖住媽媽".
但係每次拖到兩秒佢就會fing開我/我老公隻手.
佢又唔鍾意望地下,成日行幾行就仆...
佢已經行得好穩,只係佢太興奮...
成日行得好急...又成日望天花板...

我記得早兩個月我o地開始教佢要拖手..
佢一唔肯我o地就會同佢講唔拖手就無得行,
如果佢都係唔聽,我o地就會即刻抱起佢...
佢會反抗要落地行,之後我o地又再重覆..
果排都好o左d,十次有幾次都俾拖幾分鐘..
但係而家佢仲衰...一要佢拖就坐地下唔行..
佢而家好似同我講條件咁...
一係就要自己行,一係就唔行...激死...
其實我每次都想由佢坐,直到佢肯屈服..
但係奈何條街又有人踩單單經過...又多人..
所以每次最終都係抱走佢就算...

平時我都好想俾佢學o下自己行...
但係四周圍都有馬路,都唔知點算...
多數我o地都係o係公園或者商場先俾佢行.
當然每次都會有兩個大人望實佢...

不過佢都有俾人拖o既時候...
每次佢行一d斜o既地方佢都會主動拖我..
不過一行完佢就即刻fing開我果隻...

希望多d媽媽俾意見我o地...
因為真係好煩惱...
好想放手由佢行,但係周圍都係馬路...
叫佢拖住佢就寧願坐地唔行或者扭抱..
好怕會縱到佢第日唔識行路...
好想可以好好咁拖住佢慢慢行...

11月要面試...
佢連拖都唔肯...
如果到時要抱住佢入去面試就真係慘..

kmmum

我囡囡2歲3個月. 都係唔俾人拖. 唔知係咪因為. 工人日日帶佢去會所/平台,由得佢自己玩.  習慣左不受束縛.
去街.完全唔肯俾人拖.

試過係街訓係地下.  現在,我盡量一出街,就指著車車. 話'危險' ,一定要拖手!.   有時帶埋糖/餅出街.
佢肯俾我拖手, 便讚下佢, 俾糖佢食.

唉, 我都好頭痛. 出街唔拖實. 真係好危險.
有時去酒家食飯. 囡囡又係坐唔定,要落地.
我相信平日.無好好管束佢. 佢習慣鍾意行左就行左, 行右就行右.
各位家長,大家盡力la.

ttlucky0303

我女女以前都係咁呀, 不過教得多同習慣之後大約2.5歲就肯拖番...

我係女仔

我仔都係咁呀, 要強住拖佢, 佢會坐地同訓地哭

ttlucky0303

如果2歲半可以同佢講, "你唔拖住, 你會唔見左我地, 你就再見唔到我地"
同佢講下道理....慢慢佢就會明白

Joshua_BB

我個女都3歲啦, 佢出街都係唔多肯俾人拖, 好有性格咁, 我都

jc2009

我囡囡都係2歲2個月, 出街唔俾人拖, 真係好難搞...迫又發脾氣, 所以我只會講, 如唔俾媽咪拖, 下次無得出街....

原帖由 kmmum 於 10-9-28 10:19 發表
我囡囡2歲3個月. 都係唔俾人拖. 唔知係咪因為. 工人日日帶佢去會所/平台,由得佢自己玩.  習慣左不受束縛.
去街.完全唔肯俾人拖.

試過係街訓係地下.  現在,我盡量一出街,就指著車車. 話'危險' ,一定要拖手!.   有時 ...

joannejojo

同佢講，拖住就會帶你去買糖糖或者玩具，
唔拖住就冇。

Imagist

我之前試有1個方法, 暫時都work! 就係如果佢唔比我拖手, 就拖住佢耳仔, 佢一定唔LIKE架! 咁就問佢要拖手定拖耳仔! 咁佢就會識趣比妳拖手仔架啦!

愛貓

在家多玩"拖手仔"遊戲; 一出門口就要孩子拖住, 否則立即回家.

孩子肯拖手仔便多給予讚賞, 可一邊唱歌一邊拖手. 多點互動交流.

"拖手仔"是嚴規, 必須遵守.

IJai

我個仔拖到實 ga wo-.-

willytcf

以上有父母話買糖，又拖耳仔，又抱等其實都不是一個好辦法！

其實只要肯堅持，他一定會就範的！這階段的幼兒，始終比較自我，喜歡和不喜歡都比較明確地表現出來！

你可以平時多些在家說教和練習，堅持不拖的話，便不可以去街！如果你覺得當時他發脾氣的地點有危險的話，你便先把他抱埋一邊，讓他發脾氣發個夠便行了！他發覺不能得逞的話，便會自動自覺執行你的要求，小朋友不是傻的，他們很聰明呢！哪一方不夠堅持，那一方便是輸家了！

VincentYaki

係呀，堅持係好重要o家，我個仔唔肯拖，訓地，我唔理佢照拖lor，佢發覺唔work，就起身行ka la，但係我老婆就堅持唔到，次次都輸lor。

yfchoy

當小朋友開始學行時好多時都唔俾人拖。其實大家有否想過試吓用背帶呢(俗稱"狗帶仔")？我的囡囡現在兩歲，有時佢都要自己行，但我只會喺安全情況下俾佢咁做。回想之前佢初學步行時，我一定會幫佢穿上背帶，有時就算佢突然fing開我隻手，佢都知道走唔遠。等佢知道可以自己行，但點都唔能夠離開父母太遠。
現在已開始冇再用背帶，但佢一扭計就會緊緊的抱起然後同佢講如果要鬆手就冇得行！

chinyuentung

我個囡15個月大都係咁, 佢唔俾我哋拖, 即刻抱返佢, 唔俾佢落地, 然後問佢, 係咪想落地行行, 如果係就一定拖住媽媽/爸爸手手, ok? 咁佢就點頭, 我就放佢落地行, 同埋即刻拖住佢隻手囉~
我都好同意willytcf所講堅持好緊要, 16個月開始bb開始有自主能力, 佢會不斷去測試你哋嘅底線, 有d野係唔可以做的話, 一開始就要明確話俾佢知"唔可以/ no", 仲要持之以行, 有耐性去實行, 千萬唔好期望一次, 兩次會有成效......有耐性同堅持係好重要, 千萬唔好give up呀~一齊努力, 一定得架

Olympian

我囝囝都係咁，要自己行。拖佢就會放鬆全身。

之後，我"暫停"了拖佢行路，多數抱佢，不過唔會比佢自己行。

而家佢2yr7mth，唔知點解又肯拖手行，仲成日主動要拖大人隻手行。真神奇﹗